އޫރީދޫއިން އެއަރ އެމްބިއުލާންސް ޚިދުމަތަށް 16 މިލިއަން ރުފިޔާގެ މެޑިކަލް އިކުއިޕްމަންޓް ހަދިޔާކޮށްފި

އޫރީދޫ މޯލްޑިވްސްއިން ޤައުމީ އެއަރ އެމްބިއުލާންސް ޚިދުމަތަށް 16 މިލިއަން ރުފިޔާގެ އަގުހުރި މެޑިކަލް އާލާތްތަކެއް ހަދިޔާކޮށްފިއެވެ. މިއީ އެ ކުންފުނީގެ އިޖުތިމާޢީ ޒިންމާގެ (ސީއެސްއާރު) އިސްނެގުމުގެ ދަށުން ކުރި ހަދިޔާއެކެވެ.

2024 ވަނަ އަހަރުގެ މާރިޗު މަހުގެ 1 ވަނަ ދުވަހު އޫރީދޫގެ އެހީތެރިކަމާއެކު ފެށުނު އެއަރ އެމްބިއުލާންސް ޚިދުމަތަކީ މިހާރު ރާއްޖޭގައި ފުރާނަ ސަލާމަތްކުރުމަށް ދެވޭ އެންމެ މުހިންމު ޚިދުމަތްތަކުގެ ތެރެއިން އެއް ޚިދުމަތަށް ވެފައިވެއެވެ. މި ޚިދުމަތް ފެށުނީއްސުރެ މިހާތަނަށް 436 ކުއްލި ނުރައްކަލުގެ ހާލަތުގައި 517 ބަލިމީހުން އުފުލާފައިވާކަން ފާހަގަކުރެވެއެވެ.

މި ހަދިޔާ ޙަވާލުކުރުމަށް ބޭއްވުނު ޚާއްޞަ ރަސްމިއްޔާތުގައި ވާހަކަފުޅު ދައްކަވަމުން އޫރީދޫ މޯލްޑިވްސްގެ ސީއީއޯ ޚާލިދު އަލް-ހަމާދީ ވިދާޅުވީ، "އަޅުގަނޑުމެން ޤަބޫލުކުރާ ގޮތުގައި އެންމެ މުހިންމު ބޭނުންތައް ފުއްދުމަށް އެންމެ ބާރުގަދަ ވަސީލަތަކީ ޕާޓްނަރޝިޕެވެ. 16 މިލިއަން ރުފިޔާގެ މި އިންވެސްޓްމަންޓުން ދައްކުވައިދެނީ ކޮންމެ ރަށެއްގައި ދިރިއުޅުނު ނަމަވެސް މުހިންމު ޞިއްޙީ ފަރުވާ ލިބޭނެކަން ކަށަވަރުކުރުމަށް އަޅުގަނޑުމެން ކުރާ މަސައްކަތުގެ ނަތީޖާއެވެ."

ޞިއްޙަތާބެހޭ ވަޒީރު އަބްދުﷲ ނާޒިމް އިބްރާހީމް ވާހަކަފުޅުގައި އޫރީދޫގެ މި މުހިންމު ހަދިޔާއަށް ޝުކުރު އަދާކުރައްވައި، ޤައުމުގެ ޞިއްޙީ ނިޒާމަށް ވިޔަފާރިތަކުގެ ޒިންމާދާރު ޙަރަކާތްތަކުން ކުރާ އިޖާބީ އަސަރު ފާހަގަކުރެއްވިއެވެ. "މިއަދުގެ މި ހަދިޔާއިން ދައްކުވައިދެނީ ރައްޔިތުންގެ ދުޅަހެޔޮކަމަށް އިސްކަންދޭ ވިޔަފާރިތަކަށް ގެނެވޭނެ ފާހަގަކޮށްލެވޭ ބަދަލެވެ. މިއީ އިޖުތިމާޢީ ޒިންމާގެ ރަން މިންގަނޑެކެވެ،" އެމަނިކުފާނު ވިދާޅުވިއެވެ.

އޫރީދޫގެ މި އެންމެ ފަހުގެ ހަދިޔާއާއެކު، އެއަރ އެމްބިއުލާންސް ޚިދުމަތުން މުޅި ރާއްޖޭގައި އިތުރު ރައްޔިތުންނަށް ފުރާނަ ސަލާމަތްކުރުމުގެ ފަރުވާ ފޯރުކޮށްދިނުމަށް މަގުފަހިވެގެންދާނެކަން ކަށަވަރެވެ.