ފިހާރައަކަށް ވަދެ ވަޅިން ބިރުދައްކާ ފޭރުނު މައްސަލައެއްގައި މީހަކު ހައްޔަރުކޮށްފި

އައްޑޫ ސިޓީ ހިތަދޫގައި ފިހާރައަކަށް ވަދެ ވަޅިން ބިރުދައްކާ، ފޭރުނު މައްސަލައެއްގައި މީހަކު ހައްޔަރުކޮށްފި އެވެ.

ފުލުހުން މީޑިއާއަށް ފޮނުވި މެސެޖެއްގައި ވަނީ އައްޑޫ ސިޓީ ހިތަދޫއިން ފިހާރައަކަށްވަދެ ބިރު ދައްކާ ފޭރުނު މައްސަލައެއް އެ އިދާރާއަށް މިމަހުގެ 14 ވަނަ ދުވަހު ރިޕޯޓް ކޮށްފައިވާކަމަށެވެެ. އެ މައްސަލައާއި ގުޅިގެން އުމުރުން 40 އަހަރުގެ ދިވެހި ފިރިހެނަކު އިއްޔެ ހައްޔަރުކޮށްފައިވާ ކަމަށާއި މި މައްސަލަ އިތުރަށް ތަޙުޤީޤު ކުރަމުން ދާކަމަށްވެސް ފުލުހުން ބުނެފައިވެއެވެ.

ސޯޝަލް މީޑީއާގައި ދައުރުވަމުންދާ ސީސީޓީވީ ފުޓޭޖުން ފެންނަ ގޮތުގައި، ދެ މީހަކު ވަދެ  ދަނޑިބުރިއަކުން އަދި ތޫނުއެއްޗަކުން ސޭޓަށް ބިރުދައްކައި، ފައިސާއާއި ބައެއް ތަކެތި ފޭރިގެންދެއެވެ. އެ މީހުން ފޭރުމަށް ފަހު، ނުކުމެގެން ދިޔަ ވަގުތު ފިހާރައިގެ ސޭޓުގެ އެމީހުން އަތުގައި އޮތް ދަނޑިބުރި ހިފައިގެން ފަހަތުން ދުވާ މަންޒަރު ފެނެއެވެ. 

ފިހާރަތަކުންނާއި ގޭގެއިން މީހުންނަށް ބިރުދައްކައިގެން ފޭރުމަކީ މާލޭގައި ވަރަށް އާންމުކޮށް ހިނގާ ކަމެކެވެެ. މިމަންޒަރު މިހާރު އަތޮޅުތެރޭގެ ރަށްތަކުންވެސް ފެނުން ވަނީ އާންމު ކަމަކަށް ވެފައެވެ.