މަތީ ވޯލްޓޭޖުގެ ޓްރާންސްމިޝަން ވިއުގައެއް ޤާއިމުކުރަން ސްޓެލްކޯއިން ޗައިނާގެ ޓީބީއީއޭ ގްރޫޕާއެކު ފަހުމުނާމާއެއްގައި ސޮއިކޮށްފި

ދިވެހިރާއްޖޭގެ ކަރަންޓުގެ ޚިދުމަތް ފޯރުކޮށްދޭ މައި ކުންފުނި ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އާއި ޗައިނާގެ ޓީބީއީއޭ ގްރޫޕް ކޯ. ލޓޑ. އާ ދެމެދު ފަހުމުނާމާއެއްގައި އެއްގައި ސޮއިކޮށްފިއެވެ. މި އެއްބަސްވުމަކީ ދިވެހިރާއްޖޭގެ ހަކަތައިގެ ދާއިރާ ހަރުދަނާކޮށް ކުރިއެރުވުމަށް އެޅޭ އެންމެ ފާހަގަކޮށްލެވޭ ފިޔަވަޅުތަކުގެ ތެރެއިން އެއް ފިޔަވަޅެވެ.

މި އެއްބަސްވުމުގައި ސްޓެލްކޯގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަލްފާޟިލް ހުސެއިން ފަހުމީއެވެ. އަދި ޓީބީއީއޭ ގްރޫޕް ކޯ ލިމިޓެޑުގެ ފަރާތުން ސޮއިކުރެއްވީ އެ ކުންފުނީގެ ވައިސް ޕްރެސިޑެންޓް މިސްޓަރ ސަންގް ހޮންގް ޒޮންގްއެވެ. އެފްރިކާ އަދި ޗައިނާގެ އެކި ސަރަޙައްދުތަކުގައި ހަކަތައިގެ ގިނަ މަޝްރޫޢުތަކެއް ހިންގަމުންދާ ކުންފުންޏެއްގެ ގޮތުގައި ޓީބީއީއޭ ގްރޫޕް ކޯ ލިމިޓެޑް ފާހަގަކުރެވެއެވެ.

މި އެއްބަސްވުމުގެ ދަށުން ކުރިއަށް ގެންދިއުމަށް ރޭވިފައިވާ މުހިންމު މަޝްރޫޢުތަކުގެ ތެރޭގައި މާލެ، ވިލިމާލެ، ގުޅީފަޅު އަދި ތިލަފުށި ގުޅުވާލާ މަތީ ވޯލްޓޭޖުގެ ޓްރާންސްމިޝަން ވިއުގައެއް ޤާއިމުކުރުން ހިމެނެއެވެ. އަދި މީގެ އިތުރުން 150 މެގަވޮޓުގެ ޑުއަލް-ފިއުލް ޕަވަރ ޕްލާންޓެއް ތަރައްޤީކުރުމަށްވެސް ވަނީ ރޭވިފައެވެ. މި މަޝްރޫޢުތަކުގެ ސަބަބުން ރާއްޖޭގެ ކަރަންޓު އުފެއްދުމުގެ ޤާބިލުކަން އިތުރުވެ، އިތުބާރުހުރި އަދި ދެމެހެއްޓެނިވި ގޮތެއްގައި ކަރަންޓުގެ ޚިދުމަތް ފޯރުކޮށްދިނުމަށް މަގުފަހިވެގެންދާނެއެވެ.

މި ޕްރޮޖެކްޓުގެ ދަށުން ޤާއިމުކުރާ ޕަވަރ ޕްލާންޓް ހުންނާނީ ތިލަފުށީގައެވެ. މި ޕަވަރ ޕްލާންޓަކީ ޑުއަލް ފިއުލް ޓެކްނޮލޮޖީ ބޭނުންކުރާ ފެސިލިޓީއެކެވެ. މި ޕްލާންޓް ހިންގުމަށް ޑީސަލް، ގޭސް އަދި ބަޔޯ ފިއުލް ފަދަ އެކި ބާވަތް ބޭނުންކުރެވޭނެއެވެ. މި ޕްރޮޖެކްޓުގެ މައިގަނޑު މަޤްޞަދަކީ ބައިނަލްއަޤްވާމީ ބާޒާރުގައި އަގުތަކަށް އަންނަ ބަދަލުތަކާ އެއްގޮތަށް، އެންމެ އަގުހެޔޮ ގޮތެއްގައި ކަރަންޓު އުފައްދައި ފޯރުކޮށްދިނުމަށް މަގުފަހިކުރުންކަމުގައި މައުލޫމާތުލިބެއެވެ.

ސްޓެލްކޯގެ ފަރާތުން ފާހަގަކޮށްފައިވާ ގޮތުގައި މި އެއްބަސްވުމަކީ ކުންފުނީގެ ދުރުރާސްތާ ތަރައްޤީގެ ތަޞައްވުރާ އެއްގޮތަށް، އަވަސްވެގެންދާ ހަކަތައިގެ ޑިމާންޑަށް އިންޤިލާބީ ހައްލުތަކެއް ހޯދުމަށް އަޅާ މުހިންމު ފިޔަވަޅެކެވެ.

މި ޒަމާނީ މަޝްރޫޢު ކުރިއަށް ގެންދިއުމަށް ދެއްވާ އެއްބާރުލެއްވުމާއި ދުރުވިސްނުންތެރި ލީޑަރޝިޕަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ސްޓެލްކޯއިން ޚާއްޞަ ޝުކުރެއް އަދާކޮށްފައިވެއެވެ. އަދި ދިވެހި ރައްޔިތުންނަށް އިތުބާރުހުރި، ދެމެހެއްޓެނިވި އަދި ފުދުންތެރި މުސްތަޤުބަލެއް ބިނާކުރުމަށް މަސައްކަތްކުރުމަކީ ސްޓެލްކޯގެ އަގުހުރި ޒިންމާއެއް ކަމުގައިވެސް ބަޔާންކޮށްފައިވެއެވެ.