ޤަވާއިދާ ޚިލާފަށް އުޅެމުންދިޔަ 15 ބިދޭސީއަކު އިމިގްރޭޝަންގެ ބެލުމުގެ ދަށަށް

ހުޅުމާލޭގައި ޤަވާއިދާ ޚިލާފަށް މަސައްކަތްކުރަމުން ދިޔަ 15 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ. 

މި ބިދޭސީން ހައްޔަރުކޮށްފައިވަނީ 2 ޖުލައި ހަވީރު ހުޅުމާލެ ފޭސް 1 ގައި ހުންނަ "ރަށު މާރުކޭޓު" ގައި އިމިގްރޭޝަންގެ ޓާސްކްފޯސްއިން ކުރި ރެއިޑް އޮޕަރޭޝަނެއްގައެވެ.

އިމިގްރޭޝަނުން މައުލޫމާތު ދެއްވާފައިވާ ގޮތުގައި މި އޮޕަރޭޝަނުގައި ޖުމްލަ 37 ފަރާތެއް ޗެކްކުރެވުނެވެ. އޭގެ ތެރެއިން ޤަވާއިދާ ޚިލާފަށް ވިޔަފާރިކޮށް މަސައްކަތްކުރަމުންދިޔަ 10 ފިރިހެނުންނާއި 5 އަންހެނުން ވަނީ ހައްޔަރުކުރެވިފައެވެ.

އިމިގްރޭޝަނުން ބުނާ ގޮތުގައި މި އޮޕަރޭޝަންތަކުގެ މައިގަނޑު މަޤްޞަދަކީ ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމެވެ. މީގެ އިތުރުން އާންމު ސިއްޙަތަށް ނުރައްކާވާފަދަ ކަންކަން މަދުކޮށް، ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް މަސައްކަތްކުރުމެވެ.

ދިވެހިރާއްޖޭގައި ގަވާއިދާ ހިލާފަށް ދިރިއުޅޭ ބިދޭސީންގެ މައްސަލައަށް ހައްލެއް ހޯދުމަށް ކުރެވެމުންދާ މަސައްކަތުގެ ތެރެއިން، ޓާސްކް ފޯސްއިން ވަނީ އިއްޔެ ހަވީރު ހުޅުމާލެ ފޭސް 1 ގައި ހުންނަ "ރަށު މާރުކޭޓު" ގައި ރެއިޑް އޮޕަރޭޝަނެއް ކުރިއަށް ގެންގޮސްފައި. އެގޮތުން، މި އޮޕަރޭޝަނުގައި… pic.twitter.com/G5piyyX5ad

— Maldives Immigration (@ImmigrationMV) July 3, 2025

އަދުގެ ސަރުކާރުން ވަނީ ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް ޚާއްސަ އިސްކަމެއް ދެއްވާފައެވެ. މި ގޮތުން ޤަވާއިދާ ޚިލާފަށް ބިދޭސީން ގެންގުޅޭ ފަރާތްތަކަށް ފިޔަވަޅު އެޅުމުގެ އިތުރުން، ރާއްޖޭގައި ދިރިއުޅޭ ބިދޭސީންގެ ބަޔޯމެޓްރިކް ޑޭޓާ ނެގުމުގެ މަސައްކަތްވެސް މިހާރު ވަނީ ފަށާފައެވެ.

އިމިގްރޭޝަނުން މިހާރުވެސް ދަނީ ސައްޙަ ވިސާއެއްނެތި ވިޔަފާރިތައް ހިންގުމުގައި އުޅޭ ބިދޭސީން ދެނެގަތުމަށް ޚާއްސަ އޮޕަރޭޝަންތަކެއް ކުރިއަށްގެންދަމުންނެވެ. އަދި މިފަދަ ޤަވާއިދާ ޚިލާފު ޢަމަލުތަކުގައި ބައިވެރިވާ ހުރިހާ ފަރާތްތަކަށްވެސް ޤާނޫނީ ފިޔަވަޅު އެޅޭނެ ކަމަށް އިމިގްރޭޝަނުން ވަނީ އަންގަވާފައެވެ.