ވޯރަން ބަފެޓް އޭނާގެ ކުންފުނީގެ ހިއްސާގެ 6 ބިލިއަން ޑޮލަރުގެ އަގު ހުރި ހިއްސާ ފަސް ފައުންޑޭޝަނަކަށް ހަދިޔާކުރައްވައިފި

މަޝްހޫރު ފިނޭންސީ އިންވެސްޓަރު ވޮރަން ބަފެޓް، އޭނާގެ ކުންފުނީގެ ހިއްސާގެ 6 ބިލިއަން ޑޮލަރުގެ އަގު ހުރި ހިއްސާ ފަސް ފައުންޑޭޝަނަކަށް ހަދިޔާކުރައްވައިފިއެވެ. މި ހަދިޔާ އާއެކު، 2006 ވަނަ އަހަރުން ފެށިގެން މި ފައުންޑޭޝަންތަކަށް އޭނާ ދެއްވާފައިވާ ހިއްސާގެ ޖުމްލަ އަގު، އެ ހިއްސާތައް ލިބުނު އިރުގެ އަގަށް ބަލާއިރު، ގާތްގަނޑަކަށް 60 ބިލިއަން ޑޮލަރަށް އަރާފައިވާ ކަމަށް ރިޕޯޓުތައް ބުނެއެވެ.

ހުކުރު ދުވަހުގެ ރޭ ނެރުނު ބަޔާނެއްގައި ބަފެޓް ވިދާޅުވީ، ބަރކްޝަޔާރ ހެތަވޭ  ކުންފުނީގެ މި ހިއްސާތައް ހޯމަ ދުވަހު މި ފައުންޑޭޝަންތަކަށް ފޯރުކޮށްދެވޭނެ ކަމަށެވެ. ބަރކްޝަޔާރ ހެތަވޭއަކީ ޖެއިކޯ އާއި ޑެއިރީ ކުއީން  ފަދަ އެތައް ވިޔަފާރިއެއް ހިމެނޭ ބޮޑު ކުންފުންޏެކެވެ. ބަފެޓް މި ހަދިޔާކުރައްވަނީ އެ ކުންފުނީގެ ކްލާސް ބީ ހިއްސާގެ ގާތްގަނޑަކަށް 12.4 މިލިއަން ހިއްސާއެވެ. މި ހިއްސާތަކަކީ ކުންފުނީގެ އަސްލު ކްލާސް އޭ ހިއްސާއަށްވުރެ އަގު ދަށް އަދި ފަސޭހައިން ބެލެހެއްޓޭ ހިއްސާތަކެކެވެ. ހުކުރު ދުވަހު މާކެޓް ބަންދުކުރި އިރު، ކޮންމެ ކްލާސް ބީ ހިއްސާއެއްގެ އަގު ހުރީ 485.68 ޑޮލަރުގައެވެ.

މި ހަދިޔާގެ އެންމެ ބޮޑު ބައި ލިބިގެންދާނީ ބިލް އެންޑް މެލިންޑާ ގޭޓްސް ފައުންޑޭޝަން ޓްރަސްޓް އަށެވެ. އެ ފައުންޑޭޝަނަށް 9.4 މިލިއަން ހިއްސާ ލިބޭނެއެވެ. ސޫޒަން ތޮމްޕްސަން ބަފެޓް ފައުންޑޭޝަން އަށް 943,384 ހިއްސާ ލިބޭނެއިރު، ޝެރްވުޑް ފައުންޑޭޝަން ، ހޮވާޑް ޖީ. ބަފެޓް ފައުންޑޭޝަން އަދި ނޯވޯ ފައުންޑޭޝަން މި ތިން ފައުންޑޭޝަނަށް ވެސް ކޮންމެ ފައުންޑޭޝަނަކަށް 660,366 ހިއްސާ ލިބޭނެއެވެ.

ބަފެޓް ވަނީ މިދިޔަ އަހަރު، އޭނާ ނިޔާވުމަށްފަހު ބިލް އެންޑް މެލިންޑާ ގޭޓްސް ފައުންޑޭޝަނަށް ދެމުންދާ ހަދިޔާތައް ހުއްޓާލާނެ ކަމަށާއި، އޭނާގެ މުދަލުގެ ބާކީ ހުރި ބައި ދިނުމުގެ ނިންމުން އޭނާގެ ތިން ކުދިންނަށް ދޫކޮށްލާނެ ކަމަށް ވިދާޅުވެފައެވެ.

ފާއިތުވި 12 މަސް ދުވަހު ބަރކްޝަޔާރ ހެތަވޭގެ ކްލާސް ބީ ހިއްސާގެ އަގު ވަނީ 19.1 އިންސައްތަ މައްޗަށް ގޮސްފައެވެ. މިއީ އެމެރިކާގެ ސްޓޮކް މާކެޓްގެ އާއްމު ކުރިއެރުން ކަމަށްވާ 14.1 އިންސައްތައަށްވުރެ މަތީ އަދަދެކެވެ.

ވޯލް ސްޓްރީޓްގައި ބަފެޓް މަޝްހޫރުވެފައިވަނީ ރަނގަޅު އަގުތަކުގައި ކުންފުނިތައް ގަނެ، އަގުތައް މަތިވެފައިވާ ނަމަ އިތުރަށް ސަމާލުވެ ރައްކާތެރިކަމާއެކު އަމަލުކުރާ އިންވެސްޓަރެއްގެ ގޮތުގައެވެ. މިގޮތަށް އަމަލުކުރުމުގެ ސަބަބުން އޭނާއަށް ގާތްގަނޑަކަށް 145 ބިލިއަން ޑޮލަރުގެ މުއްސަނދިކަމެއް ލިބިފައިވާއިރު، އޭގެ ގިނަބަޔަކީ ބަރކްޝަޔާރ ހެތަވޭގެ ހިއްސާތަކެވެ.

“ބަރކްޝަޔާރގައި ހާއްސަ އެއްވެސް ކަމެއް ހިނގާފައެއް ނުވޭ. ވަރަށް ދިގު ދަތުރެއް، ސާދާ އަދި އާއްމުކޮށް ރަނގަޅު ނިންމުންތަކެއް، އެމެރިކާގެ ތަރައްޤީގެ ރޯޅި، އަދި ކޮމްޕައުންޑިންގގެ ސަބަބުން މިހާރުގެ މުއްސަނދިކަން ލިބުނީ،” ބަފެޓް ބަޔާނެއްގައި ވިދާޅުވިއެވެ. "އަހަރެންގެ ވަޞިއްޔަތުގައި ވަނީ އަހަރެންގެ މުދަލުގެ ގާތްގަނޑަކަށް 99.5 އިންސައްތަ ހެޔޮކަންކަމަށް ހަދިޔާކުރުމަށް ކަނޑައަޅާފައި."