ގިނަ ޢަދަދެއްގެ މަސްތުވާތަކެއްޗާއި އެކު މާލެއިން ހައްޔަރުކޮށްފި

ދިވެހި ފުލުހުންގެ ޚިދުމަތުގެ ޑްރަގް އެންފޯސްމަންޓާއި އިންޓެލިޖަންސް ގުޅިގެން މާލޭގައި ހިންގި ހާއްސަ އޮޕަރޭޝަނެއްގައި، ގިނަ ޢަދަދެއްގެ މަސްތުވާތަކެއްޗާއެކު މީހަކު ހައްޔަރުކޮށްފިއެވެ.

ފުލުހުންގެ ފަރާތުން މަޢުލޫމާތު ދީފައިވާ ގޮތުގައި، ހައްޔަރުކުރެވުނު ފަރާތަކީ ށ. ކޮމަންޑޫ / ސާތީ، އުމުރުން 24 އަހަރުގެ ޙުސައިން ޝާނިމެވެ. މި އޮޕަރޭޝަން ކުރިއަށް ގެންގޮސްފައިވަނީ މިމަހުގެ 2 ވަނަ ދުވަހުއެވެ.

ފުލުހުން ހާމަކުރި ގޮތުގައި، ޙުސައިން ޝާނިމު ހައްޔަރުކުރުމާ ގުޅިގެން، އޭނާއާ ގުޅުންހުރި 3 ތަނެއް ބަލާ ފާސްކުރެވުނެވެ. މި ތަންތަން ބަލައި ފާސްކުރުމުގައި 338.51 ގްރާމްގެ މަސްތުވާތަކެތި ކަމަށް ޝައްކުކުރެވޭ އެއްޗެއްސާއި، ރާއްޖެއަށް އެތެރެކުރުން މަނާ 32 ގުޅަ ބޭސް ހޯދާފައިވެއެވެ.

މައްސަލައާ ގުޅިގެން ޙުސައިން ޝާނިމުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، 5 ދުވަހުގެ މުއްދަތަށް ޕޮލިސް ކަސްޓޯޑިއަލްގައި ބަންދުކުރުމަށް ކޯޓުން އަމުރުކޮށްފައިވެއެވެ.

މި މައްސަލައިގެ ތަޙުޤީޤު ފުލުހުންގެ ޑްރަގް ޑިޕާޓްމަންޓުން ދަނީ ކުރިއަށް ގެންދަމުންނެވެ. ރާއްޖޭގައި މަސްތުވާތަކެތި ވިއްކުމާއި ބޭނުންކުރުން ހުއްޓުވުމަށް ފުލުހުން ދަނީ ޚާއްޞަ އޮޕަރޭޝަންތަކެއް ކުރިއަށް ގެންދަމުންނެވެ.