ޓެކްސް ބޮޑުކުރުމާއި ބެހޭ ބިލް ތަކެއް މަޖިލީހުގެ ކޮމިޓީއަށް ފޮނުވައިފި!

ޓެކްސް ބޮޑުކުރުމާއި ބެހޭ ބިލްތަކެއް ރައްޔިތުންގެ މަޖިލީހުގެ ކޮމިޓީއަށް ފޮނުވައިފިއެވެ.

ރައްޔިތުންގެ މަޖިލީހުގެ ކޮމިޓީއަށް ހުށައަޅައިފައިވަނީ ގްރީން ޓެކުހާއި އެއާޕޯޓު ފީ ބޮޑުކުރުމުގެ ބިލެވެ. 

  ރާއްޖެއިން ބޭރަށް ފުރާ ބިދޭސީންގެ އަތުން ނަގާ އެއާޕޯޓް ފީ ޓެކްސް ބޮޑުކުރާ ގޮތަށް އިސްލާޙު ހުށަހަޅާފައިވަނީ ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ޓެކުހާއި ފީ ނެގުމާ ބެހޭ ޤާނޫނަށެވެ. އަދި ގްރީން ޓެކްސް ދެ ގުނަ ބޮޑުކުރަން އިސްލާހު ހުށަހަޅާފައިވަނީ ޓޫރިޒަމްގެ ޤާނޫނަށެވެ.

އެއާޕޯޓް ފީ ބޮޑު ކުރުމާ ގުޅޭ ބިލުގެ އިބްތިދާއީ ބަހުސް އިއްޔެ ވަނީ މަޖިލީހުގައި ނިންމާލާފައެވެ. އަދި މިއަދު ގްރީން ޓެކްސް ބޮޑު ކުރުމަށް ހުށަހެޅި އިސްލާހުގެ އިބްތިދާއީ ބަހުސް ވަނީ ނިންމައިފައެވެ.

އެ ދެ ބިލު ވެސް ކޮމިޓީއަށް ފޮނުވަން ނިންމާފައިވަނީ މިއަދުގެ މަޖިލީހުގެ ޖަލްސާގައި ބައިވެރިވެވަޑައިގެންނެވި 58 މެމްބަރުންގެ ވޯޓާއެކުއެވެ. އެކަމާ ދެކޮޅަށް ވޯޓު ދެއްވީ އެމްޑީޕީގެ 10 މެމްބަރެކެވެ.

ޓޫރިޒަމްގެ ޤާނޫނަށް ގެންނަ އިސްލާހުގައި ވަނީ ރާއްޖޭގައި ފަތުރުވެރިން ހޭދަ ކުރާ ކޮންމެ ދުވަހަކަށް ދައްކަން ޖެހޭ ގްރީން ޓެކްސްގެ އަދަދު ތިން ޑޮލަރުން ހަ ޑޮލަރަށް ބަދަލުކުރަން ހުށަހަޅައިފައެވެ. އަދި 2025ގެ ފަހުން އެ އަދަދު 12 ޑޮލަރަށް ބޮޑުކުރަން ވަނީ ހުށަަހަޅައިފައެވެ.

އެއާޕޯޓު ފީ ބޮޑު ކުރަން ނިންމާފައިވަނީ އިކޮނޮމީ ކްލާހުން ފުރާ ބިދޭސީންގެ އަތުން ނަގާ ފީ 30 ޑޮލަރުން 50 ޑޮލަރަށް، ބިޒްނަސް ކްލާހުން ފުރާ މީހުންގެ އަތުން ނަގާ ފީ 60 ޑޮލަރުން 120 ޑޮލަރަށް، ފަސްޓް ކްލާހުން ފުރާ މީހުންގެ އަތުން ނަގާ ފީ 90 ޑޮލަރުން 240 ޑޮލަރަށް އަދި ޖެޓުގައި ފުރާ މީހުންގެ އަތުން ނަގާ ފީ 120 ޑޮލަރުން 480 ޑޮލަރަށެވެ.