ޚަބަރު
ޓެކްސް ބޮޑު ކުރިޔަސް ޚަރަދުތައް ކުޑަ ނުކުރާނަމަ އެއިން ކުރާނެ ރާޙަތެއް ނެތް: މެމްބަރު ސިޔާމް
މީދޫ ދާއިރާގެ މެމްބަރު އަޙުމަދު ސިޔާމް މުޙައްމަދު. ފޮޓޯ: މަޖިލިސް
ހުލާސާ
ޓެކްސް ބޮޑު ކުރިޔަސް ޚަރަދުތަައް ކުޑަ ނުކުރާނަމަ އެއިން ކުރާނެ ރާޙަތެއް ނެތް ކަމަށް ދ.މީދޫ ދާއިރާގެ މަޖިލިސް މެމްބަރު އަޙުމަދު ސިޔާމް މުޙައްމަދު ވިދާޅުވެއްޖެއެވެ.
ސިޔާމް މިހެން ވިދާޅުވީ މިއަދު މަޖިލީހުގެ ތަޅުމުގައި ޓޫރިޒަމުން ނަގާ ޓެކްސް ބޮޑުކުރުމުގެ އިސްލާހަށް ބަހުސް ކުރައްވަމުންނެވެ.
ސިޔާމް ވިދާޅުވީ ފަސްބިލިއަން ޑޮލަރު ލިބޭއިރު އޭގެން ދެބިލިއަން ޑޮލަރު ކަނޑަށް އަޅާނަމަ އެއިން ކުރާނެ ފައިދާއެއް ނޯންނާނެ ކަމަށެވެ.
“އަޅުގަނޑުމެން ކުރަންވީ އެންމެ މުހިންމު ކަމަކީ އަޅުގަނޑު މެންގެ ޚަރަދުތައް ކުޑަކުރުން” މެމްބަރު ސިޔާމް ވިދާޅުވިއެވެ.
ސިޔާމް އިތުރަށް ވިދާޅުވީ އިންތިޚާބުވާ ކޮންމެ ރައީސަކުހެން އެބޭފުޅަކު ބޭނުންފުޅުވާ ކުންފިނުތައް އެބަ އުފައްދަވާ ކަމަށާއި ކުންފުނި ހިންގަނީ ފައިދާ ހޯދުމަށްޓަކައި ކަމަށެވެ. އަދި ކުންފުނިތަކަކީ ގެއްލުން ހޯދައިގަތުމަށް ޓަަކައި ހިންގާ ތަންތަން ނޫން ކަން ސިޔާމް ފާހަގަކުރެއްވެވިއެވެ.
ސިޔާމް ވަނީ ސަރުކާރުގެ ކުންފުނިތަށް ހިންގުމަށްޓަކައި ހިނގާ ޚަރަދުތަކުގެ ޢަދަދުތައް ވިދާޅުވެ އެކަން ކަމަށް ކަންބޮޑުވުން ފާޅުކުރައްވައިފައެވެ.
ސިޔާމް ވިދާޅުވީ މިއަދުން މިއަދަށް މިހާރުން ކުރަންވީ ކަމަކީ މިހިންގާ “ޖަރީމާ” ކުންފުނިތައް ވަގުތުން ހުއްޓާލުން ކަމަށެވެ. އެކުންފުނިތައް އުވައިނުލައިފިނަމަ މި ޤައުމު އިނދަޖެހިގެންދާނީ އަންނަން އޮތް ޖީލު ތަކަށް ކެތް ނުކުރެވޭ ވަރަށްކަމަށް ސިޔާމް ވިދާޅުވިއެވެ.
"އަވައްޓެރި ސްރީލަންކާ ބަނގުރޫޓުވީ ވެސް އެ ފަދަ އިސްރާފުތަކުގެ ސަބަބުން. އެ ގައުމު ބަނގުރޫޓު ވީއިރު 1،000 ކުންފުނި އޮތް ރާއްޖެ ވެސް މިހާރު ފެންނަނީ އެ މިސްރާބުން އިސްރާފުކުރާތަން." ސިޔާމް ވިދާޅުވިއެވެ.
ސިިޔާމް ވިދާޅުވީ ޓެކްސް ނެގުމާއި އެމަނިކުފާނު ދެކޮޅު ނޫން ކަމަށެވެ. އެހެންނަމަވެސް ޓެކްސް ނަގައިގެން ލިބޭ ފައިސާ ރަނގަޅު ގޮތުގައި ބޭނުންކުރަން ޖެހޭ ކަމަށް ސިޔާމް ވިދާޅުވިއެވެ. އަދި ޓެކްސް ފައިސާއިން ވައްކަން ނުކުރުމަށާއި އެފައިސާ ނުފޭރުމަށް ސިޔާމް ގޮވައިލެއްވެވިއެވެ.
