ޚަބަރު
ބީއެމްއެލްގެ ސީއީއޯ އަކަށް ފުރަތަމަ ފަހަރަށް ދިވެއްސަކު އައްޔަނުކޮށްފި!
ބީއެމްއެލްގެ ސީއީއޯގެ މަޤާމަށް އައްޔަނު ކުރެވުނު މުޙައްމަދު ޝަރީފް. ފޮޓޯ:ބީއެމްއެލް
ބޭންކް އޮފް މޯލްޑިވްސްގެ ޗީފް އެގްޒެކެޓިވް އޮފިސަރަަކަށް ދިވެއްސަކު އައްޔަނުކޮށްފިއެވެ.
ބީއެމްއެލްގެ ސީއީއޯ އަކަށް އައްޔަނުކޮށްފައިވަނީ، މާލީ ދާއިރާގައި 25 އަހަރުގެ ދިގުމުއްދަތަކަށް ޚިދްމަތްކޮށްދެެއްވައިފައިވާ މުޙައްމަދު ޝަރީފެވެ.
ޝަރީފަކީ ބީއެމްއެލްގެ މަޤާމުތަކެއް އަދާކުރައްވައިފައިވާ ބޭފުޅެއްކަން ފާހަގަކޮށްލަން ޖެހެއެވެ.
އެގޮތުން ޝަރީފް ބީއެމްއެލްގައި ހޭދަކުރި މުއްދަތުގައި އޭނާ ވަނީ ބޭންކްގެ ޚިދުމަތްތައް ޒަމާނީ ކުރުމުގައި އިސް ދައުރެއް އަދާކުރައްވާފައެވެ.
މީގެއިތުރުން ޝަރީފް ވަނީ ކޯބޭންކިންގ ސިސްޓަމްތައް ޤާއިމްކުރުމާއި، ޑެބިޓް އަދި ކްރެޑިޓް ކާޑް ތަޢާރަފްކުރުމާއި، އަދި ބޭންކުގެ ޚިދުމަތްތައް ޑިޖިޓަލް ކުރުމަށް ކުރެވުނު މަސައްކަތްތަކުގެ ދަށުން އިންޓަރނެޓް އަދި މޯބައިލް ބޭންކިން، ސެލްފްސަރވިސް ބޭންކިންގެ އިތުރުން އީކޮމާސް ޕޭމަންޓް ގޭޓްވޭ ތައަރަފްކުރުމަށް އިސް ދައުރެއް އަދާކުރައްވާފައެވެ.
ބީއެމްއެލަށް ޚިދުމަތްކުރެއްވި މުއްދަތުގައި ޝަރީފް ވަނީ ބޭންކްގެ ސްޓްރެޓެޖީ ހާސިލްކުރުމަށް ކުރެވުނު މުހިންމު މަސައްކަތުގެ ގިނަ މަސައްކަތްތަކެއް އިސްވެކުރައްވައިފައެވެ.
ޝަރީފް އަކީ އިނގިރޭސިވިލާތުގެ ޔުނިވަރސިޓީ އޮފް މެންޗެސްޓަރ އިން އެމްބީއޭ ހާސިލްކުރައްވާފައިވާ ބޭފުޅެކެވެ. މީގެ އިތުރުން ލަންޑަން ބިޒްނަސް ސްކޫލުންނާއި ސީއީއޯ އިންނާއި ސީނިއާ އެގްޒެކްޓިވުންނަށް ފަރުމާކޮށްފައިވާ "ސީނިއާ އެގްޒެކްޓިވް ޕްރޮގްރާމް" ވެސް ފުރިހަމަ ކުރައްވާފައެވެ.
ބީއެމްއެލުން ބުނީ މާދަމައިން ފެށިގެން ޝަރީފް ރަސްމީކޮށް މަޤާމުގެ ޒިންމާތައް އަދާކުރައްވަން ފައްޓަވާނޭ ކަމަށެވެ. ބީއެމްއެލްއިން ބުނީ އެ ބޭންކްގެ ސީއީއޯ މަޤާމަށް ދިވެއްސަކު އައްޔަނުކުރުމަކީ ރާއްޖެގެ މާލީ ދާއިރާއަށްވެސް ލިބިގެންދިޔަ ކުރިއެރުމެއް ކަމަށެވެ.
