އިސްރާއީލުން އަނެއްކާވެސް ހަމަލައެއް ދީފާނެކަމަށް އީރާނުގެ އަސްކަރީ ބާރުތައް ހައި އެލާޓަށް

އިޒްރޭލުން އަނެއްކާވެސް އަސްކަރީ ހަމަލާއެއް ދީފާނެ ކަމުގެ ބިރު ބޮޑުވެފައިވާތީ، އީރާނުން އެ ޤައުމުގެ ހަތިޔާރުއެޅި ފައުޖުތައް ފުރިހަމަ ހައި އެލާޓަށް ގެނެސްފައިވާ ކަމަށް އީރާނުގެ މީޑިއާތަކުން ހޯމަ ދުވަހު ރިޕޯޓްކޮށްފިއެވެ.

 މި ނިންމުން ހާމަވީ ސަރަހައްދީ ހަމަނުޖެހުންތައް ކުރިއަށްދާ ދަނޑިވަޅެއްގައާއި، ޖޫން 24 ވަނަ ދުވަހުން ފެށިގެން ހަނގުރާމަ ހުއްޓާލުމުގެ އެއްބަސްވުން ވަރަށް ބަލިކަށި ހާލަތެއްގައިވާ ދަނޑިވަޅެއްގައެވެ.

އީރާނުގެ ދައުލަތުގެ މީޑިއާތަކުން ބުނެފައިވާ ގޮތުގައި، އިޒްރޭލުން އަލަށް ދޭނެ ކޮންމެ ހަމަލާއަކަށް ކުރިމަތިލުމަށް ތެހެރާނުން އަސްކަރީ ތައްޔާރީތައް ނިންމާލާފައިވެއެވެ. އީރާނުގެ ސުޕްރީމް ލީޑަރު އާޔަތުﷲ ޢަލީ ޚާމިނީގެ އިސް ލަފާދެއްވާ ބޭފުޅަކު އިންޒާރު ދެއްވައި ވިދާޅުވީ، އިޒްރޭލުން ދޭނެ ކޮންމެ ހަމަލާއަކަށް ކުރިމަތިލުމުގައި، ކުރިން ދީފައިވާ ހަމަލާތަކަށްވުރެ ބޮޑެތި ރައްދުތައް ދެވޭނެ ކަމަށެވެ.

މި އިންޒާރު ހާމަވީ ޖޫން މަހުގެ ކުރީކޮޅު ހިނގި ބޮޑު ކުރިމަތިލުމަކަށް ފަހުގައެވެ. އެގޮތުން، ޖޫން 13 ވަނަ ދުވަހު އިޒްރޭލުން އީރާނުގެ ސަރަހައްދަށް ވައިގެ ހަމަލާތަކެއް ދީ، އީރާނުގެ ސިފައިންގެ އިސް އޮފިޝަލުންނާއި ނިއުކްލިއާ ސައިންސްވެރިންނަށް އަމާޒުކުރިއެވެ. އީރާނުގެ ރިޕޯޓްތައް ބުނާ ގޮތުގައި، އެއަށް ރައްދު ދިނުމުގެ ގޮތުން އީރާނުން އިޒްރޭލުގެ ސަރަހައްދަށް ބޮޑު އަދަދެއްގެ މިސައިލްތަކެއް ފޮނުވާލާފައިވާއިރު، އެ ހަމަލާތަކުގައި މަދުވެގެން 28 އާންމު ރައްޔިތުން މަރުވިއެވެ.

އެތައްހާސް މިސައިލް، އަދި ޑްރޯންތައް ތައްޔާރުކޮށްފައި

އީރާނުގެ އަސްކަރިއްޔާގެ ތަރުޖަމާނު ވިދާޅުވީ، އެތައްހާށް މިސައިލާއި ހަތިޔާރުއެޅި ޑްރޯންތައް އެކި ތަންތަނަށް ފޮނުވާފައިވާ ކަމަށެވެ. އެނާ އިތުރަށް ވިދާޅުވީ، ހަނގުރާމަ އަނެއްކާވެސް ފެށިއްޖެނަމަ، އީރާނުން އެ ޤައުމުގެ ކުދުސް ފޯސް، ނޭވީ އަދި އަސްކަރިއްޔާގެ ފުރިހަމަ ބާރު ބޭނުންކުރާނެ ކަމަށެވެ.

"އަހަރެމެންގެ ސްޓްރެޓީޖިކް ޔުނިޓްތައް ހަނގުރާމައަށް ތައްޔާރުވެފައިތިބީ،މި ފަހަރު އަހަރެމެން ދޭ ރައްދުގެ ސައިޒު، ކުރިން ދީފައިވާ ހުރިހާ އޮޕަރޭޝަންތަކަށްވުރެ ބޮޑުވާނެ."  ތަރުޖަމާނު

ޓްރަމްޕް-ނަތަންޔާހޫ ބައްދަލުވުމާ ގުޅިގެން ހިތްހަމަ ނުޖެހުން ބޮޑުވެއްޖެ

އެމެރިކާގެ ރައީސް ޑޮނަލްޑް ޓްރަމްޕް، އިޒްރޭލުގެ ބޮޑުވަޒީރު ބެންޖަމިން ނެތަންޔާހޫއާ ދާދި ފަހުން ބައްދަލުކުރެއްވުމާ ގުޅިގެން ވެސް ހާލަތު އިތުރަށް ގޯސްވެފައިވެއެވެ. އީރާނުގެ ދައުލަތުގެ ޓީވީން އެ ބައްދަލުވުމަށް "ކުރިން ލިޔެފައިވާ ތަމްސީލެއް" ގެ ގޮތުގައި ސިފަކޮށް، އިޒްރޭލަށް ތާއީދުކުރުމުގައި ޓްރަމްޕް ތަޢައްސުބުވާ ކަމަށް ތުހުމަތުކުރިއެވެ.

މި ފާޑުކިޔުންތައް ހާމަވީ، ޖޫން މަހު ހިނގި ހަމަލާތަކުގައި ވޮޝިންގޓަންގެ ސީދާ ދައުރެއް އޮތް ކަމުގެ ތުހުމަތުތަކެއް ކުރިން ވެސް ކުރެވިފައިވާ ދަނޑިވަޅެއްގައެވެ. އެ ހަމަލާތަކުގައި އެމެރިކާގެ ވައިގެ ހަމަލާތައް ފޯޑޯ، ނަތަންޒް އަދި އިސްފަހާނުގައި ހުންނަ އީރާނުގެ ނިއުކްލިއާ ފެސިލިޓީތަކަށް ވެސް ދީފައިވާއިރު، އޭގެ ސަބަބުން ބޮޑެތި ގެއްލުންތަކެއް ލިބިފައިވެއެވެ.

ޖޫން މަހުގެ މެދުތެރޭގައި ފެށުނު 12 ދުވަހުގެ ކުރިމަތިލުމުގައި 1،000 އަށް ވުރެ ގިނަ މީހުން މަރުވެފައިވާ ކަމަށް އީރާނުން ބުނެއެވެ. މަރުވި މީހުންގެ ތެރޭގައި އަސްކަރީ މީހުންނާއި އާންމު ރައްޔިތުން ވެސް ހިމެނެއެވެ. އެމެރިކާ އާއި އިޒްރޭލުން އަދިވެސް އެމީހުންނަށް ލިބުނު ގެއްލުންތަކާ ބެހޭ ރަސްމީ އަދަދުތަކެއް ހާމަކޮށްފައެއް ނުވެއެވެ.ޖޫން 24 ވަނަ ދުވަހު ވަގުތީ ހަނގުރާމަ ހުއްޓާލުން ފެށުނު ފަހުން، ދެ ފަރާތް ވެސް ތިބީ ވަރަށް ބޮޑަށް ސަމާލުވެގެންނެވެ.