ހުޅުމާލޭގައި މަތީ ފަންތީގެ ތިން ހޮޓަލެއް ތަރައްޤީކޮށް ހިންގަން ހުޅުވާލައިފި!

ހުޅުމާލޭގައި މަތީ ފަންތީގެ ތިން ހޮޓަލެއް ތަރައްޤީކޮށް ހިންގުމަށް ހައުސިންގ ޑިވެލޮޕްމަންޓް ކޯޕަރޭޝަނުން ހުޅުވާލައިފިއެވެ. 
އެޗްޑީސީ އިން ހުޅުވާލައިފައިވަނީ ހުޅުމާލޭ ދެވަނަ ފިޔަވަހީގެ އިންޓަގްރޭޓެޑް ޓޫރިޒަމް ޒޯން، އާބަން އައިލްގައި މަތީފަންތީގެ ތިން ހޮޓެލް ތަރައްޤީކޮށް ހިންގުމަށެވެ. 
އަދި އެކަމަށް ޝައުޤުވެރިވާ ފަރާތްތަކުން އެކްސްޕްރެޝަން އޮފް އިންޓްރެސްޓް (އީއޯއައި) ހުށަހެޅުމުގެ ފުރުސަތު މިއަދުން ފެށިގެން އެކޯޕަރޭޝަނުން ވަނީ ހުޅުވައިލައިފައެވެ. 

އެޗްޑީސީއިން ކުރި އިޢުލާނުގައި ބުނެފައިވަނީ، އެ ހޮޓެލްތަކަކީ އެންމެ ޒަމާނީ ވަސީލަތްތަކާއެކު ފެންވަރު ރަނގަޅު ޚިދުމަތް ދެވޭ ގޮތަށް، ރާއްޖެ ޒިޔާރާތްކުރާ ފަތުރުވެރިންނަށް ހާއްސަކޮށްގެން ތަރައްޤީކުރާ މަތީ ފަންތީގެ ހޮޓެލްތަކެއް ކަމަށެވެ.
އެ މަޝްރޫޢު ދޫކުރުމުގައި އިސްކަންދޭނީ ލޭންޑް ލީސް މޮޑެލްއަށް ނަމަވެސް އެ ކޯޕަރޭޝަނަށް ހުށަހަޅާ އީއޯއައިތައް އެހެން މޮޑެލްތަކަށް ވެސް ހުށަހެޅިދާނެ ކަމަށް އެޗްޑީސީއިން ބުނެ އެވެ.
އެޗްޑީސީއިން ބުނީ އެއް ފަރާތަށްވުރެ ގިނަ ފަރާތުން އެ މަޝްރޫއުތަކަށް ޝައުގުވެރިކަން ފާޅުކޮށް ޕްރޮޕޯސަލް ހުށަހަޅައިފިނަމަ މަޝްރޫއު ހަވާލު ކުރާނީ އެންމެ ފުރިހަމަ ޕްރޮޕޯސަލް ހުށަހަޅާ ފަރާތަކަށް ކަމަށެވެ.
އީއޯއައިތައް އިވެލުއޭޓް ކުރުމުގައި ބެލުމަށް ހަމަޖެހިފައިވަނީ:-
·    ޕްރޮޕޯސްކޮށްފައިވާ ބިޒްނަސް މޮޑަލް
·    އޮޕަރޭޓަރުގެ އެކްސްޕީރިއެންސް
އެޗްޑީސީއިން ބުނީ އާބަން އައިލްގައި ހޮޓެލް ތަރައްޤީކޮށް ހިންގަން ޝައުޤުވެރިވާ ފަރާތްތަކުން އީމެއިލް މެދުވެރިކޮށް މި މަހުގެ 29 ވަނަ ދުވަހުގެ މެންދުރުފަހު 2 ގެ ކުރިން އީއޯއައި ހުށަހަޅަންވާނެ ކަމަށެވެ.
އެ މަޝްރޫއާ ގުޅޭ އިތުރު މަޢުލޫމާތު އެ ކުންފުނީގެ ވެބްސައިޓުން ލިބެން ހުންނާނެ ކަމަށާއި އިތުރު މަޢުލޫމާތު އީމެއިލް މެދުވެރިކޮށް ސާފުކުރެވޭނެ ކަމަށް އެޗްޑީސީއިން ބުނެ އެވެ.