ސަރ އެލެކްސް ފާގަސަންގެ މެންޗެސްޓަރގެ ސަފީރުކަމުން ވަކިކުރަނީ

މެންޗެސްޓަރ ޔުނައިޓެޑްގެ އެންމެ ކާމިޔާބު މެނޭޖަރު ސަރ އެލެކްސް ފާގުސަން، 2024-25 ވަނަ އަހަރުގެ އިނގިރޭސި ޕްރިމިއަރ ލީގު ސީޒަން ނިމުމާއެކު، ކުލަބުގެ ސަފީރުކަމުގެ މަޤާމުން ވަކިވާނެ ކަމަށް ރިޕޯޓުތަކުން ހާމަކޮށްފިއެވެ. މިއީ ކުލަބުން ޚަރަދު ކުޑަކުރުމުގެ ގޮތުން އަޅަމުންދާ ފިޔަވަޅުތަކުގެ ތެރެއިން އެޅޭ ފިޔަވަޅެއް ކަމަށް ބެލެވެއެވެ.

 އީއެސްޕީއެންގެ ރޮބް ޑޯސަންގެ ރިޕޯޓުގައި ބުނެފައިވާ ގޮތުގައި، ސަރ ޖިމް ރެޓްކްލިފް މި އަހަރުގެ ފެބްރުއަރީ މަހު ކުލަބުގެ މައިނޯރިޓީ ހިއްސާއެއް ގަތުމަށްފަހު، މެންޗެސްޓަރ ޔުނައިޓެޑުން ވަނީ ޚަރަދު ކުޑަކުރުމުގެ ގޮތްތަކެއް ހޯދަން ފަށާފައެވެ. މި ގޮތުން ޖުލައި މަހު ޑޯސަން ރިޕޯޓުކުރި ގޮތުގައި، މެންޗެސްޓަރ ޔުނައިޓެޑުން ވަނީ މުވައްޒަފުންގެ ހަތަރުބައިކުޅަ އެއްބައި މަޤާމުތައް އުވާލާފައެވެ. މިއީ މުވައްޒަފުންގެ އަދަދު މަދުކޮށްގެން 45 މިލިއަން ޕައުންޑް (58.8 މިލިއަން ޑޮލަރު) ސަލާމަތްކުރުމަށް އެޅި ފިޔަވަޅެކެވެ.

1986 އިން 2013 އަށް މެންޗެސްޓަރ ޔުނައިޓެޑްގެ މެނޭޖަރުކަން ކުރެއްވި ފާގުސަން، ވަޒީފާއިން މުސްކުޅިކުރެއްވުމަށްފަހު ކުލަބުގެ ސަފީރެއްގެ ގޮތުގައި މަސައްކަތްކުރައްވަމުން ގެންދަވައެވެ. މި މަޤާމުގައި އޭނާއަށް އަހަރަކު 2 މިލިއަން ޕައުންޑްގެ މުސާރައެއް ލިބިވަޑައިގަންނަވާ ކަމަށް ރިޕޯޓުތަކުން ދައްކައެވެ.

 ފާގުސަންގެ މުހިންމުކަމާއި އޭނާގެ އަސަރު ދައްކުވައިދޭ ކަމަކީ، އޭނާ މެނޭޖަރުކަން ކުރެއްވި އެންމެ ފަހު ސީޒަނަށްފަހު، މެންޗެސްޓަރ ޔުނައިޓެޑުން އީޕީއެލް ޗެމްޕިއަންކަން ހޯދާފައި ނުވާތާ މިހާރު 10 އަހަރަށްވުރެ ގިނަ ދުވަސްވެފައިވުމެވެ. އަދި 2011 ގެ ފަހުން ޗެމްޕިއަންސް ލީގުގެ ފައިނަލަކަށްވެސް ކުލަބުން ގޮސްފައެއް ނުވެއެވެ.