ޚަބަރު
ޖައިކާގެ ރެސިޑެންޓް ރެޕްރެޒެންޓެޓިވް އިސްރަށްވެހިންގެ ނާދީއަށް ޒިޔާރަތްކުރައްވައިފި
ޖައިކާގެ ރެސިޑެންޓް ރެޕްރެޒެންޓެޓިވް އިސްރާވެހިންގެ ނާދީއަށް ޒިޔާރަތްކުރެއްވުން ފޮޓޯ: މިނިސްޓްރީ އޮފް ސޯޝަލް އެންޑް ފެމެލީ ޑިވެލޮޕްމެންޓް
މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓުން ސޯޝަލް މީޑިއާގައި މިއަދު ހާމަކުރެއްވި ގޮތުގައި، ޖަޕާން އިންޓަރނޭޝަނަލް ކޯޕަރޭޝަން އެޖެންސީ (ޖައިކާ) ގެ ރެސިޑެންޓް ރެޕްރެޒެންޓެޓިވް އޮނަރަބަލް ޓާކީ މޮޓޫ އާއި އެ ބޭފުޅާގެ ވަފުދު އިސްރަށްވެހިންގެ ނާދީއަށް ރަސްމީ ޒިޔާރަތެއް ކުރައްވައިފިއެވެ.
މި ޒިޔާރަތުގައި ވަފުދަށް ދިވެހި ސަގާފަތާއި އިސްރަށްވެހިންނަށް ފޯރުކޮށްދެވޭ އެކި މުނިފޫހިފިލުވުމުގެ ހަރަކާތްތައް ބައްލަވާލެއްވުމުގެ ފުރުސަތު ލިބިވަޑައިގަތެވެ. މީގެ އިތުރުން، ޖަޕާނުގައި އިސްރަށްވެހިންނަށް ހިންގޭ ޕްރޮގްރާމްތަކާ ބެހޭ މަޢުލޫމާތު ވަފުދުން ހިއްސާކުރެއްވިއެވެ. އަދި ދިވެހިރާއްޖޭގެ އިސްރަށްވެހިންގެ ދުޅަހެޔޮކަން އިތުރަށް ރަނގަޅުކުރުމަށް އެއްބާރުލުން ދެވިދާނެ ދާއިރާތަކާ ބެހޭ ގޮތުން މަޝްވަރާކުރެވުނެވެ.
މި ޒިޔާރަތަކީ ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކޮށް، އިސްރަށްވެހިންގެ ދުޅަހެޔޮކަމަށް އަމާޒުކޮށްގެން ކުރިއަށް ގެންދެވިދާނެ މަޝްރޫޢުތަކާ ބެހޭ ގޮތުން މަޝްވަރާކުރުމަށް ލިބުނު މުހިންމު ފުރުސަތެއް ކަމުގައި މިނިސްޓްރީން ފާހަގަކުރަށްވާފައިވެއެވެ. އަދި މިފަދަ ބައްދަލުވުންތަކުގެ ސަބަބުން ދެ ގައުމުގެ ދެމެދުގައި އޮތް އެއްބާރުލުން އިތުރަށް ހަރުދަނާވެގެންދާނެ ކަމަށް ބެލެވެއެވެ.
