ކުޅިވަރު / ޚަބަރު
އެފްއޭއެމް ޚިޔާނާތް: ޕެންޓްހައުސް އަތުލި މައްސަލަ ހައިކޯޓުން ބަލައެއް ނުގަތް!

އެފްއޭއެމްގެ ކުރީގެ ރައީސް ބައްސާމް ޢަދީލް ޖަލީލް.
ފުޓުބޯޅަ އެސޯސިއޭޝަން އޮފް މޯލްޑިވްސްގެ ރައީސް އަކަށް ކުރިން ހުރި ބައްސާމް ޢަދީލް ޖަލީލް އެމަޤާމުގައި ހުރި އިރު އެފްއޭއެމްގެ ފައިސާއިން ގަތް ޕެންޓްހައުސް ދައުލަތަށް ނެގުމުން އަނބުރާ އެތަން ހޯދަން ހައިކޯޓަށް ހުށައެޅުމުން އެމައްސަލަ ބަލައިނުގަތުމަށް އެކޯޓުން ނިންމައިފިއެވެ.
ހުޅުމާލޭގައި ހުންނަ ބައްސާމްގެ ދެ ޕެންޓްހައުސް ފުލުހުންނާ ހަވާލުކުރަން ބައްސާމަށް އަންގައިފައިވަނީ ހުޅުމާލެ މެޖިސްޓްރޭޓްް ކޯޓުންނެވެ. އެކޯޓުގެ މިއެންގުމަށް މިމަހުގެ ކުރީކޮޅު ބައްސާމް ވަނީ އެ ދެ ޕެންޓްހައުސް ފުލުހުންނާ ހަވާލުކޮށްފަ އެވެ.
ހުޅުމާލޭ މެޖިސްޓްރޭޓް ކޯޓުގެ އަމުރު އިސްތިއުނާފްކުރަން ބައްސާމްގެ ފަރާތުން ހައި ކޯޓަށް ހުށަހެޅި މައްސަލާގައި އެކޯޓުން ބުނީ މައްސަލަ ބަލައިނުގަތުމަށް ރަޖިސްޓްރާ ނިންމަވާފައިވާ ކަމަށެވެ. ނަމަވެސް އެގޮތަށް ނިންމި ސަބަބެއް ހާމަކޮށްފައެއް ނުވެ އެވެ. އަދި ރަޖިސްޓްރާގެ އެ ނިންމެވުން ފަނޑިޔާރުންގެ މަޖިލީހުގައި އިސްތިއުނާފް ކުރުމުގެ ފުރުސަތު މައްސަލަ ހުށައެޅި ފަރާތައް އޮންނާނެ އެވެ.
އެފްއޭއެމްގެ ޚިޔާނަތުގެ މައްސަލައާއި ގުޅިގެން ފުލުހުން ވަނީ އެމައްސަލަ ތަހުޤީޤުކޮށްފައެވެ. އެތަހުޤީޤަށް ފަހު ފުލުހުން ބުނެފައިވަނީ ކޮވިޑްގެ ހާލަތުގައި ފީފާ މެދުވެރިކޮށް އެފްއޭއެމުން ނެގި ލޯނުގެ ފައިސާއިން އޭރު އެފްއޭއެމްގެ ރައީސް ކަމުގައި ހުރި ބައްސާމް, ދެޕެންޓް ހައުސް ގަނެފައިވާކަމަށެވެ.
އެގޮތުން އެކަމަށް އެފްއޭއެމްގެ 3 މިލިއަނަށްވުރެ ގިނަ ރުފިޔާ ހަރަދުކޮށްފައިވާ ކަމަށް ފުލުހުން ބުނެފައިވެއެވެ. އަދި މި ފައިސާ އަކީ އެފްއޭއެމުން ޑޮލަރު މާރުކުރުމުގެ ނަމުގައި އެކި ކުންފުނިތަކަށް ދޫކޮށްފައިވާ ޑޮލަރަށް، ލިބުނު ދިވެހި ރުފިޔާ ކަން އެނގިފައިވާ ކަމަށް ވެސް ފުލުހުން ބުނެފައިވެއެވެ.
މީގެ އިތުރުން އެފްއޭއެމުން އަމީން ކޮންސްޓްރަކްޝަންސްއަށް 14 އޭޕްރީލް 2021 ގައި އެއް މިލިއަން ޑޮލަރު ޖަމާކުރިކަން ވެސް ފާހަގަކުރެވިފައިވާ ކަމަށް ފުލުހުން ބުނެފައިވެއެވެ. އަދި މިއީ ކޮވިޑު ރިލީފް ލޯނެއްގެ ގޮތުގައި ފީފާ އިން އެފްއޭއެމް އަށް ދޫކޮށްފައިވާ 1.9 މިލިއަން ޑޮލަރުގެ ތެރެއިން ބައެއް ކަމަށްވެސް ބުނެފައިވެއެވެ.
މީގެ އިތުރުން މި ޑޮލަރަށްވާ ފައިސާ އެފްއޭއެމްއަށް ލިބިފައި ނުވާ ކަމަށާއި, މި ފައިސާ އެފްއޭއެމްްއަށް ލިބުނުކަން ދެއްކުމަށް ލިޔެކިޔުމެއްވެސް ތައްޔާރުކޮށްފައިވާ ކަމަށް ފުލުހުން ވަނީ ބުނެފައެވެ.