ޕީޕީއެމް ސެނެޓްގެ ކުއްލި ބައްދަލުވުމެއް: ޕާޓީގެ ނައިބުރައީސް އަކަށް ޚާރިޖީ ވަޒީރު ޙަލީލް!

ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)ގެ ސެނެޓުގެ ކުއްލި ބައްދަލުވުމެއް ބާއްވައިފިއެވެ. 

މިބައްދަލުވުމުގައި އެޕާޓީގެ ނައިބު ރައީސްގެ މަޤާމަށް ސަރުކާރުގެ ޚާރިޖީ ވަޒީރު ޑރ ޢަބްދުﷲ ޙަލީލް ވަނީ އައްޔަނުކޮށްފައެވެ.

ޕާޓީގެ ނައިބު ރައީސްގެ މަޤާމަށް ޙަލީލް އައްޔަނުކުރުމުގެ އިތުރުން އެޕާޓީގެ ސެކެރެޓަރީ ޖެނެރަލް (އެސްޖީ)ގެ މަޤާމަށް ދަރުމަވަންތަ ހޮސްޕިޓަލުގެ ސީއީއޯ ޢަބްދުއްރައްޒާޤް ޙަލީމް ވަނީ އައްޔަނުކޮށްފައެވެ. 

މިއަދު މެންދުރު ފަހު ބޭއްވި އެ ޕާޓީގެ ސެނެޓް ބައްދަލުވުމުގައި ރިޔާސަތު ބެލެހެެއްޓެވީވެސް މި ދެ ބޭފުޅުންގެ އިތުރުން، އެ ޕާޓީގެ ނައިބު ރަައީސް ދިފާއީ ވަޒީރު ޣައްސާން މައުމޫނެވެ.

ޕީޕީއެމް/ޕީއެންސީގެ އޮފިޝަލަކު މީޑިއަށް ވިދާޅުވެފައިވަނީ، ޕީޕީއެމްގައި ހުސްވެފައިވާ ނައިބު ރައީސްގެ މަޤާމަށް ޑރ. ޙަލީލް އަދި އެސްޖީ ކަމަށް ޙަލީމް ސެނެޓްގެ އިއްތިފާޤުން އިންތިޚާބު ކޮށްފައިވާ ކަަމަށެވެ.

މި ބައްދަލުވުމުގައި، ބައެއް މީޑިއާ ތަކުން ބުނެފައިވާ ގޮތައް، ޕީޕީއެމް އުވާލަން މަޝްވަރާ ކުރެވިފައި ނުވާ ކަމަށްވެސް އެ އޮފިޝަލް ވަނީ ވިދާޅުވެފައެވެ. 

ޕީޕީއެމްއަކީ މިވަގުތު ރާއްޖޭގައި އޮތް ދެވަނައަށް އެންމެ ބޮޑު ޕާޓީއެވެ. އެެންމެ ބޮޑު ޕާޓީއަކީ އިދިކޮޅު އެމްޑީޕީއެވެ.