ޚަބަރު
2ކިލޯގެ މަސްތުވާތަކެތި ރާއްޖެ އެތެރެކުރަން އުޅުނު ދެމީހަކު ހައްޔަރުކޮށްފި!
ރާއްޖެ އެތެރެކުރަން އުޅެނިކޮށް އަތުލައިގަތް މަސްތުވާތަކެތީގެ ޕެކްތަކެއް. ފޮޓޯ:ކަސްޓަމްސް
ރާއްޖެއަށް 2ކިލޯގެ މަސްތުވާތަކެތި އެތެރެކުރަން އުޅުނު ދެމީހަކު ހައްޔަރުކޮށް ބަންދުގެ މުއްދަތު ޖަހައިފިއެވެ.
2ކިލޯގެ މަސްތުވާ ތަކެތި ރާއްޖެ އެތެރެކުރަން އުޅުނު މައްސަލާގައި ހައްޔަރުކޮށް މުއްދަތު ޖަހައިފައިވަނީ އިންޑިއާއަށް ނިސްބަތްވާ މުހައްމަދު ޝޯއިބް، 41، އާއި އޭނާގެ އަންހެނުން އައިޝާ، 38، ގެ މައްޗަށެވެ.
މިދެމީހުން ހައްޔަރުކޮށްފައިވަނީ އެދެމީހުން ރާއްޖެއަށް މަސްތުވާތަކެތި ޓްރެފިކް ކުރުމުގެ ކުށުގެ ތުހުމަތުގައި ވެލާނާ އިންޓަނޭޝަނަލް އެއާޕޯޓުންނެވެ.
އެ ދެ މީހުން ރާއްޖެ އައި އިރު ލަގެޖުގެ ތެރެއިން ފޮރުވާފައި ހުރި ދެ ކިލޯގެ މަސްތުވާތަކެތި ފެނިފައިވާ ކަމަށް ފުލުހުންގެ އިންވެސްޓިގޭޝަން އޮފިސަަރު (އައިއޯ) ކްރިމިނަލް ކޯޓުގައި ވިދާޅުވެފައިވެއެވެ.
ބަންދު އަމުރުގައިވާ ގޮތުން ފުލުހުން ވަނީ އެ ދެ މީހުން ކުށް ކުރި ކަމަށް ތުހުމަތެއް އުފެދޭ ވަރަށް ހެކި ހުށަހަޅައިފައެވެ. އަދި ސީނަށް ދިޔަ ފުލުހުންގެ ބަޔާން ވެސް ކޯޓަށް ހުށަހަޅާފައިވެއެވެ.
ކްރިމިނަލް ކޯޓުުގެ ގާޒީ އިބްރާހިމް ޒިހުނީ ނިންމެވީ އެ ދެ މީހުން ވެެސް ތިން ދުވަހަށް ކަސްޓޯޑިއަލް ޖަލެއްގައި ބަންދުކުރުމަށެވެ. އަމުރުގައިވާ ގޮތުން ބަންދަށް ކުރު މުއްދަތެއް ދީފައި ވަނީ އެ ދެ މީހުންނަށް ހިންދީ ބަސް އެނގޭ ތަރުޖަމާނަކު ހަމަޖެހިފައި ނުވުމުންނެވެ.
ނަމަވެސް، އައިއޯއަށް ހިންދީ ބަސް އެނގޭ ކަމަށް ވިދާޅުވުމުން ބަންދު މަޖިލީހުގައި ހިނގައި ދިޔަ ކަންތައްތައް އެ ދެމަފިރިންނަށް ތަރުޖަމާކޮށްދީފައިވަނީ އައިއޯ މެދުވެރިކޮށެވެ.
އެ ދެ މީހުންނަށް ވެސް ވަނީ ވަކީލަކު ހަމަޖެއްސުމުގެ ފުރުސަތު އޮތް ކަންވަނީ އަންގައިފައެވެ.
