ޚަބަރު
އޭއައިގެ ފަންނިއްޔާތާ ގުޅޭ ޤާނޫނީ ފްރޭމްވަރކެއް ހިމެނޭގޮތަށް މާސްޓަރޕްލޭނެއް އެކުލަވައިލެއްވުމަށް ރައީސް ނިންމަވައިފި!
ރައީސް ޑރ މުޙައްމަދު މުއިއްޒު. ފޮޓޯ: ރައީސް އޮފީސް
އާޓިފިޝަލް އިންޓަލިޖެންސްގެ ފަންނިއްޔާތާ ގުޅޭ ޤާނޫނީ ފްރޭމްވަރކެއް ހިމެނޭގޮތަށް މާސްޓަރޕްލޭނެއް އެކުލަވައިލެއްވުމަށް ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ނިންމަވައިފިއެވެ.
ރައީސް މުޢިއްޒުގެ މިނިންމެވުމަކީ އާޓިފިޝަލް އިންޓެލިޖަންސްގެ ފަންނިއްޔާތު މެދުވެރިކޮށް އިޤްތިޞާދީ ފައިދާ އެންމެ ފުރިހަމަ ގޮތުގައި ރާއްޖެއަށް ހޯދޭނެ ގޮތްތަކާއި، އެކަމުގެ ސަބަބުން ދިމާވެދާނެ ނުރައްކާތެރި ޙާލަތްތަކުން ސަލާމަތްވާނެ ގޮތްތަކާއި، އެ ޓެކްނޯލޮޖީގެ ބޭނުން ހިފުމުގައި ދިވެހިރާއްޖޭގައި ޢަމަލުކުރާނެ ޤާނޫނީ ފްރޭމްވަރކެއް ހިމެނޭ ގޮތަށް އަދި މިފަދަ ކަންކަމުގައި ސަރަޙައްދީ ޤައުމުތަކުން ޢަމަލުކުރަމުންދާ ގޮތްތައްވެސް ބައްލަވައި ވަޒީރުންގެ މަޖިލީހުގެ ލަފާފުޅުގެ ދަށުން ނިންމަވައިފައިވާ ނިންމެވުމެކެވެ.
ރައީސް މުއިއްޒު މިކަން ނިންމަވައިފައިވަނީ 16 އޮކްޓޫބަރު ވީ އަންގާރަ ދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި މަޝްވަރާކުރެއްވުމަށް ފަހު ކަމަށް ރައީސް އޮފީހުންވަނީ ވިދާލުވެފައެވެ.
އިއްޔެގެ ވަޒީރުންގެ މަޖިލީހުގެ ބައްދަލުކުރެއްވުމުގައި ރައީސް މުޢިއްޒު ވަނީ އާޓިފިޝަލް އިންޓެލިޖަންސްގެ ފަންނިއްޔާތާ ގުޅޭ މާސްޓަރޕްލޭނެއް އެކުލަވައިލެއްވުމަށްފަހު، މިކަމާ ގުޅޭ ކަރުދާސްތައް، ދާޚިލީ ސަލާމާތާއި ފަންނިއްޔާތާ ބެހޭ ވުޒާރާއާއި، ވިޔަފާރި އާއި އިޤްތިޞާދީ ތަރައްޤީއާއި ބެހޭ ވުޒާރާއިން ވަޒީރުންގެ މަޖިލީހަށް ހުށަހެޅުއްވުމަށް ކަނޑައަޅުއްވާފައެވެ.
