ރޭފަތިހު މާވެޔޮމަގު ފިހާރައަކުން ވައްކަން ކުރިކަމުގެ ތުހުމަތުގައި ތިން މީހަކު ހައްޔަރުކޮށްފި!

ރޭފަތިހު މާވެޔޮމަގު ފިހާރައެއްގެ ދޮރުހަލާކުކޮށްލައި އެފިހާރައިން ވައްކަން ކުރިކަމުގެ ތުހުމަތުގައި، ދިވެހި ފުލުހުންގެ ޚިދުމަތުން ތިން މީހަކު ހައްޔަރުކޮށްފިއެވެ.

މިކަމާއި ގުޅިގެން ފުލުހުން ބުނެފައިވަނީ ރޭ ފަތިހު 4:20 އެހާއިރު ފުލުހުން މާލެ ތެރެ ޕެޓްރޯލް ކުރަމުންދަނިކޮށް މާވެޔޮމަގުގައި ހުރި ފިހާރައެއްގެ ދޮރު ހަލާކުކޮށްލައި ވަދެ ވައްކަން ކޮށްފައިވާކަން ފާހަގަ ކުރެވިފައިވާ ކަމަށެވެ. 

އަދި އެކަން ފާހަގަ ކުރެވިގެން އެސަރަހައްދުގެ ސީސީޓީވީ ފުޓެޖްތައް ބަަލައި ދެނެގަނެ ވައްކަން ކުރިކަމުގެ ތުހުމަތުކުރެވޭ ތިން މީހުން ހޯދައި އެތިން މީހުން ހައްޔަރުކޮށްފައިވާކަމަށެވެ. 

މީގެއިތުރުން އެފިހާރައިން އެމީހުން ވަގަށް ނެގި ކަމަށް ބެލެވޭ ފައިސާއާއި ސިނގެރޭޓް ކާޓޫން ތަކެއް ވަނީ ހޯދައިފައިކަމަށްވެސް ފުލުހުން ބުނެއެވެ. 

މިމައްސަލައާއި ގުޅިގެން ފުލުހުން ހައްޔަރުކޮށްފައިވަނީ ގދ.ވާދޫ އަތަމާގެ، އިހުސާން އިބްރާހިމް، ގދ.ވާދޫ ލިލީމާގެ، މުޙައްމަދު ޞަބާޙް އަދި ރ.އިނގުރައިދޫ ދަނބުރުއްދަށުގެ އިބްރާހިމް މުޙައްމަދު ރަޝީދެވެ.

މިމައްސަލައާއި ގުޅިގެން އެމީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން އިހުސާން އިބްރާހިމް އަށް 30 ދުވަސް އަދި އަނެއް ދެމީހުނަށް 15 ދުވަސް ވަނީ ޖަހައިފައި ވާކަމަށްވެސް ފުލުހުން ބުނެއެވެ.

ފުލުހުން އިތުރަށް ބުނެފައިވަނީ މިމައްސަލަ އިތުރަށް ތަހުޤީޤު ކުރަމުންދާކަމަށެވެ.