އުރަމަތީ ކެންސަރުގެ ނުރައްކާ ކުޑަކުރުމަށް ދިރިއުޅުމުގައި ގެންނަންޖެހޭ މުހިންމު 10 ބަދަލު

1. ދުޅަހެޔޮ ހަށިގަނޑެއް ދެމެހެއްޓުން:
މެނޮޕޯސްގެ ފަހުން އިތުރުވާ ހަށިގަނޑުގެ ހޯމޯން އިސްޓްރޮޖެން އުފެއްދުން އިތުރުވެ، އުރަމަތީ ކެންސަރުގެ ނުރައްކާ މަތިވެއެވެ. ހަށިގަނޑުގެ ބަރުދަން ރަނގަޅު މިންގަނޑެއްގައި ބެހެއްޓުމަށް ރަނގަޅު ކާނާ ކެއުމާއި ގަވާއިދުން ކަސްރަތުކުރުމަކީ ހޯމޯން ލެވެލް ހަމަޖެއްސުމަށާއި ނުރައްކާ ކުޑަކުރުމަށް އެޅޭނެ މުހިންމު ފިޔަވަޅެކެވެ.

2. ޤަވާޢިދުން ކަސްރަތުކުރުން:
ޖިސްމާނީ ހަރަކާތްތަކުން އިސްޓްރޮޖެނާއި އިންސިއުލިންގެ މިންވަރު ދަށްކުރެއެވެ. މި ދެ ހޯމޯނަކީ އުރަމަތީ ކެންސަރާ ގުޅުންހުރި ހޯމޯންތަކެކެވެ. ހަފުތާއަކު މަދުވެގެން 150 މިނެޓުގެ މެދުމިނުގެ ހަލުވި ކަސްރަތު ނުވަތަ 75 މިނެޓުގެ ކަސްރަތުކުރުމަކީ މި ނުރައްކާ ކުޑަކުރުމަށް އެޅިދާނެ ފިޔަވަޅެކެވެ.

3. ބަނގުރާ އަދި މަސްތުވާތަކެތީގެ އިސްތިޢުމާލު ހުއްޓާލުން:
ބަނގުރާ ބުއިމުން އިސްޓްރޮޖެންގެ މިންވަރު މަތިވެ، ޑީއެންއޭއަށް ގެއްލުން ލިބި، އުރަމަތީ ކެންސަރުގެ ފުރުޞަތު އިތުރުވތުރުވެއެވެ. މިފަތަ ނޭދެވޭ އަމަލުން ދުރުހެލިވުމުން މި ނުރައްކާ ވަރަށް ބޮޑަށް ކުޑަކުރެވޭނެއެވެ.

4. ދުންފަތުގެ އިސްތިޢުމާލު ހުއްޓާލުން:
ދުންފަތުގެ އިސްތިޢުމާލަކީ އުރަމަތީ ކެންސަރު ހިމެނޭ ގިނަ ކެންސަރުތަކަކާ ގުޅުންހުރި ކަމެކެވެ. ދުންފަތުގެ އިސްތިޢުމާލު ހުއްޓާލުމުން އުރަމަތީ ކެންސަރުގެ ނުރައްކާ ކުޑަވުމުގެ އިތުރުން ފުއްޕާމެއާއި ހިތުގެ ދުޅަހެޔޮކަން ރަނގަޅުވާނެއެވެ.

5. ފައިދާހުރި ކާނާ އިޚްތިޔާރުކުރުން:
މޭވާ، ތަރުކާރީ، ގޮވާޏް އަދި ރަނގަޅު ޕްރޮޓީން ހިމެނޭ ކާނާ ކެއުމުން ހަށިގަނޑުގެ ދިފާޢީ ނިޒާމު ވަރުގަދަވެ، ކެންސަރުގެ ނުރައްކާ ކުޑަވެއެވެ. އެންޓިއޮކްސިޑެންޓްސް، ފައިބަރ އަދި އޯމެގާ-3 ފަދަ ރަނގަޅު މާއްދާތައް ހިމެނޭ ކާނާއަށް އިސްކަންދިނުމަކީ މުހިންމު ކަމެކެވެ.

6. ވީވަރަކުން ގާތުން ކިރުދިނުން އިތުރުކުރުން:
ދިގު މުއްދަތަކަށް ގާތުން ކިރުދިނުމުން އުރަމަތީ ކެންސަރުގެ ނުރައްކާ ކުޑަވެއެވެ. ޚާއްޞަކޮށް އެއް އަހަރު ނުވަތަ އެއަށްވުރެ ގިނަ ދުވަހު ގާތުން ކިރުދީފައިވާ އަންހެނުންނަށް މީގެ ފެ ފައިދާ ބޮޑެވެ. މިއީ ހޯމޯން ލެވެލް ހަމަޖެއްސުމަށާއި މަންމައާއި ދަރިފުޅު ދެމީހުންނަށްވެސް ރައްކާތެރިކަން ލިބޭ ކަމެކެވެ.

7. ހޯމޯން ރިޕްލޭސްމަންޓް ތެރަޕީ (އެޗްއާރްޓީ) އާ މެދު ސަމާލުވުން:
އިސްޓްރޮޖެނާއި ޕްރޮޖެސްޓެރޯން އެކުލެވޭ އެޗްއާރްޓީ ދިގު މުއްދަތަކަށް ބޭނުންކުރުމުން އުރަމަތީ ކެންސަރުގެ ނުރައްކާ އިތުރުވެއެވެ. އެޗްއާރްޓީ ބޭނުންކުރަން ޖެހިއްޖެނަމަ، ޑޮކްޓަރުގެ ލަފާގެ މަތިން ވީހާވެސް ކުޑަ މިންވަރަކަށް އަދި ކުރު މުއްދަތަކަށް ބޭނުންކުރުމަށް އިސްކަންދޭންވާނެއެވެ.

8. ރޭޑިއޭޝަނަށް ހުށައެޅުން މަދުކުރުން:
ސީޓީ ސްކޭން ފަދަ ބައެއް މެޑިކަލް އިމޭޖިންގ ޕްރޮސީޖަރތަކުން ހަށިގަނޑު ރޭޑިއޭޝަނަށް ހާމަވެއެވެ. މިއީ ވަގުތު ފާއިތުވުމާއެކު އުރަމަތީ ކެންސަރުގެ ނުރައްކާ އިތުރުކުރާ ކަމެކެވެ. މި ފަދަ ޕްރޮސީޖަރތައް ހަދަންވާނީ ކޮންމެހެން ބޭނުންވެގެން އެކަންޏެވެ. އަދި ވީވަރަކުން އެހެން އޮޕްޝަންތައް ބަލައި، އެންމެ ރައްކާތެރި ގޮތް އިޚްތިޔާރުކުރަން މަސައްކަތްކުރަންވާނެއެވެ.

9. ތިމާވެށީގެ ވިހަތަކަށް ސަމާލުވުން:
ބައެއް ކޮސްމެޓިކްސް، ޕްލާސްޓިކް އަދި ޕެސްޓިސައިޑްގައި ހުންނަ ބައެއް ކެމިކަލްތަކަށް ހާމަވުން މަދުކުރުމުން އުރަމަތީ ކެންސަރުގެ ނުރައްކާ ކުޑަކުރެވިދާނެއެވެ. ގުދުރަތީ އަދި އޯގަނިކް އުފެއްދުންތައް އިޚްތިޔާރުކުރުމާއި، ހޫނު ކާނާ ޕްލާސްޓިކް ކޮންޓެއިނަރުގައި ނުބެހެއްޓުމުން ވިހަތަކަށް ހާމަވުން މަދުކުރެވޭނެއެވެ.

10. ގަވާއިދުން ސްކްރީނިންގ ހެދުން:
އުރަމަތީ ކެންސަރު ފަރުވާކުރުމުގައި އަވަހަށް ދެނެގަތުމަކީ ވަރަށް މުހިންމު ކަމެކެވެ. ގަވާއިދުން މެމޮގްރާމް ހެދުމާއި އަމިއްލައަށް އުރަމަތި ޗެކްކުރުމުން އާދަޔާ ޚިލާފު ބަދަލުތައް އަވަހަށް ފާހަގަކުރެވި، ބޭނުންވެއްޖެ ހިނދެއްގައި އަވަސް ފަރުވާ ހޯދުމަށް މަގުފަހިވެގެންދާނެއެވެ.

މި ބަދަލުތައް ދިރިއުޅުމަށް ގެނައުމުން އުރަމަތީ ކެންސަރުގެ ނުރައްކާ ވަރަށް ބޮޑަށް ކުޑަކުރެވޭނެއެވެ. ނަމަވެސް، ކޮންމެ މީހެއްގެ ޞިއްޙީ ހާލަތު ތަފާތުވާނެތީ، މި ކަންކަމާ ގުޅޭގޮތުން ޑޮކްޓަރުގެ ލަފާ ހޯދުމަކީ އެންމެ ރަނގަޅު ގޮތް ކަމުގައި ދަންނަވަމެވެ.