ނަތަންޔާހޫގެ ގެއަށް އަމާޒުކޮށް ލުބްނާނުން ޑްރޯން ހަމަލާއެއް ފޮނުވާލައިފި!

އިޒްރާއިލްގެ ބޮޑުވަޒީރު ބެންޖަމިން ނަތަންޔާހޫގެ ގެއަށް އަމާޒުކޮށް ލުބްނާނުން ޑްރޯން ހަމަލާއެއް ފޮނުވައިލައިފިއެވެ. 

ލުބްނާނުން ދިން ޑްރޯން ހަމަލާ އަމާޒުކޮށްފައިވަނީ ނަތަންޔާހޫ ޗުއްޓީ ހޭދަ ކުރާ ގެއަކަށް ކަމަަށް އަލްޖަޒީރާގައި ރިޕޯޓު ކޮށްފައިވެއެވެ.

އިޒްރާއިލްގެ މައި ސިޓީ ކަމަށް އެމީހުން ބުނާ ތެލްއަވީވް އަށް އަމާޒުކޮށް ދެމުންދާ ހަމަލާތަކުގެ ސަބަބުން މުޅި ތެލްއަވީވްގައި ސައިރެންގެ އަޑު ވަނީ ގުގުމާލައިފައެވެ. 

ނަތަންޔާހޫގެ ތަރުޖަމާނު ބުނެފައިވަނީ ލުބުނާނުން ފޮނުވާލި ތިން ޑްރޯންގެ ތެރެއިން އެއް ޑްރޯން ހޮނިހިރު ދުވަހު ސީސަރިއާ ޓައުންގައި ހުންނަ ނަތަންޔާހޫގެ ގެއަށް އަރައިފައިވާ ކަމަށެވެ. އަދި އެވަގުތު ނަތަންޔާހޫ އެގޭގައި ނެތް ކަމަށްވެސް ތަރުޖަމާނު ވަނީ ބުނެފައި ކަމަށް އަލްޖަޒީރާގައި ބުނެއެވެ. 

އަދި މި ހަމަލާގެ ސަބަބުން އެއްވެސް މީހަކަށް އަނިޔާއެއް ލިބިފައިނުވާ ކަމަށްވެސް ވަނީ ބުނެފައެވެ. 

ލުބްނާންގެ ޑްރޯން ހަމަލާތަކާއި ބެހޭ ގޮތުން އިޒްރާއިލުން ބުނެފައިވަނީ ލުބްނާނުން ފޮނުވާލި ތިން ޑްރޯންގެ ތެރެއިން ދެޑްރޯން އިޒްރާއިލްގެ ޢަސްކަރިއްޔާއިން ހުއްޓުވައިފައިވާ ކަމަށެވެ. 

ހަމަމިއާއިއެކު ލުބުނާނުން އިޒްރާއީލުގެ އުތުރު ހުރަސްކޮށް ޖުމްލަ 100 އަށް ވުރެ ގިނަ ރޮކެޓް ފޮނުވާލައިފައިވާ ކަމަށާއި މަދުވެގެން 13 މީހަކު މިހަމަލާތަކުގައި ޒަޚަމްވެފައިވާ ކަމަށެވެ. 

އިޒްރާއީލުގައި އަލްޖަޒީރާގެ ނޫސްވެރިން މަސައްކަތް ކުރުން ވަނީ މަނާކޮށްފައެވެ. މިސަބަބާއި ހުރެ އިޒްރާއިލްގައި ހިނގާ ކަންކަން ސީދާ އެތަނުން އަލްޖަޒީރާއަށް ރިޕޯޓު ނުކުރެވޭތީ އިޒްރާއިލުގައި ހިނގަމުން އަންނަ ކަންކަން އަލްޖަޒީރާއިން ރިޕޯޓު ކުރަމުން އަންނަނީ އުރުދުންގެ ޢައްމާނުންނެވެ. 

އަލްޖަޒީރާގެ ނޫސްވެރިޔާ ނޫރު އޮދޭ ޢައްމާނުން ރިޕޯޓުކުރަމުން ބުނެފައިވަނީ ނަތަންޔާހޫގެ ގެއަށް ދިން ހަމަލާ އިޒްރާއިލުން ސިފަކުރަނީ ނަތަންޔާހޫ މަރާލަން ދިން ހަމަލާއެއްގެ ގޮތުގައި ކަމަށެވެ.

އެކަން ޔަޤީން ކުރެވޭނެ ގޮތެއް ނެތް، އަދި މި ހަމަލާއަކީ ނަތަންޔާހޫ މަރާލުމަށް ދިން ހަމަލާއެއް ކަމަށް ޔަޤީންކޮށް ބުނާނެ ގޮތެއް ނެތް، އެކަމަކު އެއީ އިޒްރާއީލުގެ ސަލާމަތީ އިދާރާއިން މި ހަމަލާއާއި މެދު ދެކެނީ މިގޮތައް - ނޫރު ބުނެފައިވެއެވެ.