ޖަބަލިއްޔާ އަދި މަޣާޒީ އަށް ދިން ހަމަލާތަކުގައި 44 މީހަކު ޝަހީދުކޮށްލައިފި!

ޣައްޒާގެ އުތުރުގައި އޮންނަ ޖަބަލިއްޔާ ރެފިޔުޖީ ކޭމްޕަށާއި މަޣާޒީ ކޭމްޕަށް އިޒްރާއިލްގެ ޢަސްކަރިއްޔާއިން ދިން ހަމަލާތަކުގައި ފަލަސްޠީނުގެ 44 މީހަކު ޝަހީދުވެއްޖެއެވެ. 

ހަމަމިއާއި އެކު މިހަމަލާތަކުގައި މިހާތަނަށް 80 އަށްވުރެ ގިނަ މީހަކަށް އެކިވަރުގެ އަނިޔަތައް ލިބިފައިވާ ކަމަށްވެސް އަލްޖަޒީރާގައި ބުނެފައިވެއެވެ. 

އެގޮތުން ޖަބަލިއްޔާއަށް ދިން ހަމަލާއެއްގެ ސަބަބުން 33 މީހަކު ޝަހީދުވެފައިވެއެވެ. އަދި އެސަރަހައްދަށް ދިން ދެވަނަ ހަމަލާއެއް އެސަރަހައްދުގެ ގެއަކަށް އަރައި އެގެއިން ހަތަރު މީހަކު ޝަހީދުވެފައިވާ ކަމަށް އަލްޖަޒީރާގައި ބުނެފައިވެއެވެ.

ޖަބަލިއްޔާ ސަރަހައްދަށް އިޒްރާއިލް ޢަސްކަރިއްޔާއިން ޓޭންކަރުތަކާއި އެކު ވަދެގަނެފައިވާއިރު ދުވާލަކު ދިހަވަރަކަށް ގެއަށް އަމާޒުކޮށް ވައިގެ ހަމަލާއާއި ޖަބަލިއްޔާއަށް ބިމުގެ މަގުން އަރައިގަނެފައިވާ ސިފައިން ދޭ ހަމަލާތައް ދަނީ އަމާޒުވަމުންނެވެ.

 އަދި އެސަރަހައްދުގެ މުވާޞަލާތީ ގުޅުންތަކާއި ކަރަންޓުގެ ޚިދުމަތްވެސް ކެނޑިފައިވާ ކަމުގެ ރިޕޯޓްތައް އަންނަނީ ކުރަމުންނެވެ.

 ފާއިތުވި ދެ ހަފުތާގެ ތެރޭގައި އިޒްރާއީލުން ޣައްޒާގެ އުތުރުގައި ހިންގަމުންއަންނަ ޢަސްކަރީ އޮޕަރޭޝަންތަކުގައި 450 އަށް ވުރެ ގިނަ މީހުން ވަނީ ޝަހީދުވެފައެވެ.

ޣައްޒާގެ މެދުތެރޭގައި އޮންނަ ދެއިރް އަލްބަލަހްގައި ހުންނަ މަޣާޒީ ރެފިއުޖީ ކޭމްޕްގައި ހުރި ގެއަކަށް އިޒްރާއީލުގެ އަސްކަރިއްޔާއިން ރޭގެ ވަގުތެއްގައި ދިން ހަމަލާއެއްގައި ފަސް މީހުން ވަނީ ޝަހީދުވެފައެވެ.

ފަލަސްޠީނުގެ ރަސްމީ ނޫސް އެޖެންސީ ވަފާ އިން ރިޕޯޓްކޮށްފައިވާ ގޮތުގައި ޝަހީދުވި މީހުންގެ އަދަދު މިހާރު ވަނީ 11 އަށް އަރާފައެވެ. 

އަދި އެސަރަހައްދުން އިތުރު މީހުން ގެއްލިފައިވާއިރު، ޝަނާއާ އާއިލާއަށް ނިސްބަތްވާ ހަލާކުވެފައިވާ ގޭގެ ގައުތަކުގެ ދަށުގައި ތާށިވެފައިވާނެ ކަމަށް ބެލެވޭކަމަށްވެސް ވަފާއިން ވަނީ ރިޕޯޓު ކޮށްފައެވެ.