ނެތިދިޔުމުގެ ބިރުހީވެފައިވާ ދިރޭތަކެތި އެތެރެކޮށްފިނަމަ 30،000 ރުފިޔާއިން ޖޫރިމަނާކުރަނީ!

ދުނިޔެއިން ނެތިދިޔުމުގެ ބިރުހީވެފައިވާ ދިރޭތަކެތި ޤާނޫނާއި ޤަވާއިދުގެ ދަށުން ދޫކުރާ ހުއްދަޔާއެކު މެނުވީ އެތެރެކޮށްފި ނަމަ އެ އެތެރެކުރި ކޮންމެ އެއްޗަކަށް -/30,000 ރުފިޔާގެ މަގުން އެ އެއްޗެއް އެތެރެކުރާ ފަރާތެއް ޖޫރިމަނާ ކުރެވޭ ގޮތަށް ޤަވާއިދު އިސްލާހުކޮށްފިއެވެ.

ދިރޭ ތަކެތީގެ ބައިނަލްއަޤްވާމީ ވިޔަފާރި ކޮންޓްރޯލްކުރުމަށް ދޫކުރާ ހުއްދައާއި ވިޔަފާރިކުރާ ފަރާތްތަކާއި ތަކެތި ރަޖިސްޓަރީކުރުމާ ގުޅޭ ޤަވާއިދުގެ ދަށުން ހުއްދަނެތި ނެތިދިޔުމުގެ ބިރުހީވެފައިވާ ދިރޭ ތަކެތި އިމްޕޯޓްކުރުމާއ،ި އެކްސްޕޯޓްކުރުމާއި، ރީއެކްސްޕޯޓްކުރުމާއި،ކަނޑުން އެތެރެކުރުމަކީ މަނާކަމެކެވެ.

މި ޤަވާއިދަށް އެއްވަނަ އިސްލާހު ގެނެސް ބުރާސްފަތިދުވަހު ވަނީ ގެޒެޓުގައި ޝާއިއުކޮށްފައެވެ.

އެ އިސްލާހުގައުވާގޮތުން، ނެތިދިޔުމުގެ ބިރު ހީވެފައިވާ، ދިރޭ އެއްޗެއްގެ ބައެއް ނުވަތަ އެއިން އެއްޗެއްގެ އުފެއްދުމެއް ޤާނޫނާއި ޤަވާއިދުގެ ދަށުން ދޫކުރާ ހުއްދަޔާއެކު މެނުވީ އިމްޕޯޓްކުރުމާއ،ި އެކްސްޕޯޓްކުރުމާއ،ި ރީއެކްސްޕޯޓްކުރުމާއ،ި ކަނޑުން އެތެރެކުރުމަކީ މަނާކަމެއް ކަމަށާއި އެފަދަ ކަމެއް ކޮށްފިނަމަ -/10000 ރުފިޔާ އިން ޖޫރިމަނާ ކުރެވޭނެ އެވެ.

އަދި އެއިން އެއްޗެއްގެ އުފެއްދުމެއް ޤާނޫނާ ޚިލާފަށް އަމިއްލަ ބޭނުމަށް ގެންގުޅުމާއ،ި ކޮންޓްރޯލްކުރުމާއ،ި ވިއްކުމާއ،ި ވިއްކުމަށް މަސައްކަތްކުރުމާއ،ި އާންމުންނަށް ފެންނަ ތަންތަނުގައި ބެހެއްޓުމަކީ ވެސް މަނާ ކަމެއް ކަމަށާއި އެފަދަ ކަމެއް ކޮށްފިނަމަ ވެސް -/10000 ރުފިޔާ އިން ޖޫރިމަނާ ކުރެވޭނެ ކަމަށް ބުނެފައި ވެއެވެ.

މި ޤަވާއިދުގެ ދަށުން ހުށަހަޅާ ހުށަހެޅުމަށް ދައްކާ ހުއްދައިގެ ފީއަކީ 150 ރުފިޔާއެވެ. އެ ދޫކުރާ ހުއްދައިގެ ޝަރުތުތަކާ ޚިލާފުވުމަކީ ވެސް ގަވާއިދުގެ ދަށުން މަނާކަމެއް ކަމަށް ވާއިރު އެފަދަ އަމަލެއް ކޮށްފިނަމަ، 5000 ރުފިޔާއިން ފެށިގެން 50،000 ރުފިޔާއާ ހަމައަށް ޖޫރިމަނާ ކުރެވެއެވެ.

މީގެ ކުރިން ގަވައިދުގައި އޮންނަނީ އެފަދަ ދިރުމެއް އެތެރެކުރުމަށް ބޭނުންވާ ހުއްދަނެތި އެތެރެ ކުރާ ފުރަތަމަ ފަހަރު -/10000 ރުފިޔާ، ދެވަނަ ފަހަރު -/20000 ރުފިޔާ ތިން ވަނަ ފަހަރު -/40000 ރުފިޔާ އަދި އޭގެ ފަހުން އެފަދަ ކަމެއް ތަކުރާރު ކުރާ ކޮންމެ ފަހަރަކު އެއްމިލިއަން ރުފިޔާއަށްވުރެ ބޮޑު ނުވާ އަދަދަކުން ޖޫރިމަނާ ކުރެވޭނެ ކަމަށެވެ.

ނެތިދިޔުމުގެ ބިރުހީވެފައިވާ ދިރޭ ތަކެތީގެ ބައިނަލްއަޤްވާމީ ވިޔަފާރި ކޮންޓްރޯލްކުރުމުގެ ޤާނޫނަކީ 2022 ވަނަ އަހަރުގެ އޮކްޓޯބަރ މަހުން ފެށިގެން ރާއްޖޭގައި ޢަމަލު ކުރަމުން އަންނަ ޤާނޫނެކެވެ.