ނަތަންޔާހޫގެ ގެއަށް ދިން ހަމަލާއަށްފަހު އޭނާ ދިނީ ހަނގުރާމަ ކާމިޔާބުކުރާނެ ކަމުގެ ޔަޤީންކަން!

މިއަދު ލުބްނާނުން އިޒްރާއިލްގެ ބޮޑުވަޒީރު ނަތަންޔާހޫ ޗުއްޓީ ހޭދަކުރާ ގެއަށް އަމާޒުކޮށް ދިން ޑްރޯން ހަމަލާއަށްފަހު މިހާރު ކުރިއަށްދާ ހަނގުރާމަ ކާމިޔާބު ކުރާނެ ކަމުގެ ޔަޤީންކަން ނަތަންޔާހޫ ދީފިއެވެ. 

ސޯޝަލް މީޑިއާގައި ހިއްސާކޮށްފައިވާ ވީޑިއޯ ތަކުގައި ނަތަންޔާހޫ ވަނީ މިހަފްތާގައި އިޒްރާއިލް ސިފައިން ޝަހީދު ކޮށްލި ހަމާސްގެ ލީޑަރު ޔަޙްޔާ ސިންވާރަށް ނިސްބަތްކޮށް ވާހަކަތަކެއް ދައްކައިފައެވެ.

އެގޮތުން ނަތަންޔާހޫ ބުނެފައިވަނީ “އަހަރެމެން އޭނާގެ ބޯކަނޑާލައިފިން، އަހަރެމެންގެ ކުދިން ދިރިތިއްބައި އަންދާލި، އަންހެނުންތައް ރޭޕްކުރި ފިރިހެނުންގެ ބޯތައް ކަނޑާލުމުގެ ފަހަތުގައި ހުރި މާސްޓަރ މައިންޑް މަރާލައިފިން” ނަތަންޔާހޫ ބުނެފައިވެއެވެ.

އޭނާގެ ވާހަކަައިގައި ޔަޙްޔާ ސިންވާރަކީ ޓެރަރިސްޓެއް ކަމަށްވަނީ ސިފަކޮށްފައެވެ. 

ނަތަންޔާހޫ ޔަޙްޔާ ސިންވާރަށް މިފަދަ ތުހުމަތުތަކެއް ކޮށްފައި ވީނަމަވެސް އޭނާގެ މިތުހުމަތުތަކަކީ ދޮގެއްކަން ފޮރެންސިކް ހެކިތަކުން ވަނީ ސާބިތުކޮށްދީފައެވެ. 

ނަތަންޔާހޫ ބުނެފައިވަނީ އިޒްރާއިލުން އިރާންގެ އެހެން ހަނގުރާމަވެރި ޖަމާޢަތްތަކާއި އެކުވެސް ހަނގުރާމަ ކުރިއަށް ގެންދާނެ ކަމަށެވެ. ހަމަމިއާއި އެކު އިޒްރާއިލުން ބިރެއްނެތި ހަނގުރާމަ ކުރާނެ ކަމަށް އޭނާ ބުނެފައިވެއެވެ. 

 ނަތަންޔާހޫގެ މިފަދަ ވާހަކަތަކެއް ސޯޝަލް މީޑިއާ އަށް ދޫކޮށްފައިވާއިރު ޔަޙްޔާ ސިންވާރު ޝަހީދުވެފައި އޮތް މަންޒަރު ދައްކުވައިދޭ ފޮޓޯ ތަކެއް ހިމެނޭ ލީފްލެޓް ތަކެއް އިޒްރާއިލްގެ މަތިންދާބޯޓު ތަކުން ވަނީ ޣައްޒާގެ އެތަން މިތަނަށް އަޅައިފައެވެ. 

އަދި އެލީފްލެޓްތަކުގައި “ހަމާސް އަކަށް ދެން ޣައްޒާގައި ވެރިކަމެއް ނުކުރެވޭނެ” މިފަދަ ޢިބާރާތްތައް ވަނީ ލިޔެފައެވެ. 

“ހަތިޔާރު ބަހައްޓައި ހަނގުރާމަވެރިންގެ ރަހީނުން ދޫކޮށްލައިފިނަމަ ރައްކާތެރިކަމާއި އެކު އުޅެވިދާނެ” އިޒްރާއިލްގެ ލީފްލެޓެއްގައި ލިޔެފައިވެއެވެ. 

ޢަރަބިބަހުން ލިޔެ ޚާން ޔޫނިސް އަށް އަޅައިފައިވާ ލީފްލެޓްތަކުގެ ފޮޓޯތައް މިހާރު ސޯޝަލްމީޑިއާގައި ވެސް ދަނީ ދައުރުވަމުންނެވެ.