ފަސްމިލިއަން ގަސް ޕްރޮގްރާމް: އެމްޕީއެލް އިން އެއްމިލިއަން ގަސް އިންދަނީ!

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙުކޮށްދެއްވި ފަސް މިލިއަން ގަސް އިންދުމުގެ ޕްރޮގްރާމްގެ ދަށުން، އެއް މިލިއަން ގަސް އިންދުމުގެ މަސައްކަތް މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން ފަށައިފިއެވެ.

މޯލްޑިވްސް ޕޯޓްސް ލިމިޓެޑް، އެމްޕީއެލް އިން ވިދާޅުވީ މި އަހަރުގެ ދުނިޔޭގެ ތިމާވެށީގެ ދުވަހުގެ މުނާސަބަތާއި ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އިފްތިތާހުކޮށްދެއްވި ފަސް މިލިއަން ގަސް އިންދުމުގެ ޕްރޮގްރާމްގެ ދަށުން، އެއް މިލިއަން ގަސް އިންދުމުގެ މަސައްކަތް މޯލްޑިވްސް ޕޯޓްސް ލިމިޓަޑް (އެމް.ޕީ.އެލް) އިން ފަށާފައިވާ ކަމަށެވެ.

 އެގޮތުން މި ޙަފްލާ ކުރިއަށްގެންގޮސްފައިވަނީ ތިލަފުށީގައި ވިޔަފާރި ބަނދަރު އެޅުމަށް ހަމަޖައްސާފައިވާ ސަރަހައްދުގައެވެ. މި ޙަފްލާފައި އެމް.ޕީ.އެލްގެ ސީ.އީ.އޯ މުޙައްމަދު ވަޖީހް އިބްރާހީމް ވަނީ އެއް މިލިއަން ގަސް އިންދުމުގެ ޕްލެޖްގައި ސޮއިކުރައްވައި، މޫސުމީ ބަދަލުތަކާއި ތިމާވެއްޓާއި ހަކަތާއާ ބެހޭ ވަޒީރު ޠާރިޤު އިބްރާހީމަށް ޕްލެޖްގެ ލިޔުން  ހަވާލުކުރައްވާފައެވެ.

 މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ތާރިޤް އިބްރާހީމް ވަނީ އެމްޕީއެލް އިން މި މަސައްކަތުގައި ބައިވެރިވުމުން އެކުންފުންޏަށް ޝުކުރުއަދާކޮށްފައެވެ. އަދި މިހާތަނަށް ރައީސްގެ މި ވަޢުދުފުޅުގެ ދަށުން ކުންފުނިތަކުގެ ތެރެއިން މިހާތަނަށް އެންމެ ގިނަ ގަސް އިންދުމަށް ހަމަޖެހިފައި އެމްޕީއެލްއިން ކަމަށް ވަޒީރު ވިދާޅުވިއެވެ. 

 5 މިލިއަން ގަސް އިންދުމުގެ ޕްރޮގްރާމަކީ މިއަހަރުގެ ޖޫން މަހު  ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙު ކޮށްދެއްވި ހަރަކާތެކެވެ. މިއީ ރާއްޖޭގައި މިހާތަނަށް ހިންގާ ގަސް އިންދުމުގެ އެންމެ ބޮޑު ޕްރޮގްރާމެވެ. ރައީސް މާލޭގެ މޭޔަރު ކަމުގައި ހުންނެވިއިރު ކައުންސިލުންވެސް ވަނީ އެއްލައްކަ ގަސް އިންދުމުގެ ޕްރޮގްރާމެއް ފަށާފައެވެ.