ނަޑެއްލާ ޖެޓީ ކައިރީގައި ސައިކަލަކާއި ޕިކަޕެއް ޖެހި އެކްސިޑެންޓެއް ހިނގައިފި

ގދ. ނަޑެއްލާ ޖެޓީ މަގުން ބާރު ސްޕީޑުގައި ދުއްވި ސައިކަލެއް ކޮންޓްރޯލް ނުވެ ގޮސް، މަޑުކޮށްފައި އޮތް ރަށު ޕިކަޕެއް ކައިރީގައި ހުރި މީހެއްގެ ގައިގައި ޖެހިފައިވާ ކަމަށް ރޭ ދަންވަރު 12:05 ހާއިރު ފުލުހުންނަށް ރިޕޯޓު ކޮށްފައެވެ.

މި އެކްސިޑެންޓުގައި ސައިކަލުގައި ތިބި ދެ މީހުން (ދެ މީހުންވެސް 18 އަހަރު) އަދި ޕިކަޕް ކައިރީގައި ހުރި މީހާ (47 އަހަރު) އަށް އަނިޔާވެގެން ތިނަދޫ، ޑރ. އަބްދުލް ސަމަދު މެމޯރިއަލް ހޮސްޕިޓަލަށް ގެންގޮސްފައިވެއެވެ. އަދި ސައިކަލް ދުއްވި މީހާ އާއި ޕިކަޕް ކައިރީގައި ހުރި މީހާ މިއަދު މާލެ ގެނެސް އޭޑީކޭ ހޮސްޕިޓަލުގައި ދަނީ ފަރުވާދެމުންނެވެ. ސައިކަލް ދުއްވާފައިވަނީ ލައިސަންސް ނެތް މީހެކެވެ.

މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.