ބުޅާ މަހުން އެއްވެސް ކާއެއްޗެއް ތައްޔާރުކޮށް ވިއްކާފައިވާ ކަމުގެ ހެއްކެއްނެތް: ފުލުހުން

ބުޅާ މަހުން އެއްވެސް ކާއެއްޗެއް ތައްޔާރުކޮށް ވިއްކާފައިވާ ކަމުގެ ހެއްކެއް ފެނިފައިނުވާ ކަމަށް ދިވެހި ފުލުހުންގެ ޚިދުމަތުން ބުނެފިއެވެ. 

މިމައްސަލައަކީ އާންމުންގެ ބަޔަކު ސަރުކާރުގެ ކަމާއި ބެހޭ ފަރާތްތަކަށް ހުށައެޅުމުން ބަލަން ފެށި މައްސަލައެކެވެ. މިމައްސަލަ ހުށައެޅުނީ ރާއްޖޭގައި މަސައްކަތް ކުރާ ބަންގްލަދޭޝްގެ ރައްޔިތެއް ކަމަށްވާ އަރަފާތު ހޮސެއިންއާއި ދެކޮޅަށެވެ. އޭނާގެ މައްޗަށް ކުރެވުނު ތުހުމަތަކީ މާލޭގެ މަގުތަކުން ބުޅާ ހިފައިގެން އޭނާ ދިރިއުޅެމުންއައި ތަނުގައި ބުޅާ ކަތިލުމަށްފަހު، އޭގެ މަހުން ކާބޯތަކެތި ހަދާކަމުގެ ތުހުމަތެވެ.

މިތުހުމަތު ތަކާއި ގުޅިގެން އަރަފާތު ހޯދުމުގެ ނޯޓިސް މޯލްޑިވްސް އިމިގްރޭޝަނުން ނެރެފައިވަނީ 19 އޮގަސްޓު 2024 ވަނަ ވީ ދުވަހުއެވެ. އިމިގްރޭޝަނާއި ފުލުހުން ގުޅިގެން އޭނާ ހޯދުމަށް ކުރި މަސައްކަތުން އޭނާ ހައްޔަރު ކޮށް މިފާއިތުވި ސެޕްޓެންބަަރު މަހު އޭނާ ވަނީ ޑީޕޯޓު ކޮށްލައިފައެވެ.

މިމައްސަލާގެ ތަހުޤީޤަށް ފަހު ފުލުހުންގެ ޚިދުމަތުން މިއަދު ބުނެފައިވަނީ ބުޅާމަސް އަޅައިގެން އަރަފާތު ކާބޯތަކެތި ތައްޔާރުކުރިކަމުގެ އެއްވެސް ހެއްކެއް ލިބިފައި ނުވާކަމަށެވެ. އަދި އޭނާގެ މައްޗަށް ޖިނާއީ ތަހުޤީޤެއް ހިންގޭވަރަށް ހެއްކާއި ގަރީނާވެސް ލިބިފައި ނުވާކަމަށް ފުލުހުން ބުނެފައިވެއެވެ. އެހެންކަމުން ފުލުހުން މިމައްސަލާގައި ހިންގި ތަހުޤީޤު ނިންމާލައިފައިވާ ކަމަށް ވެސް ފުލުހުން ވަނީ ބުނެފައެވެ.

ރާއްޖޭގައި ޤަވާއިދާ ޚިލާފަށް އުޅޭ ބިދޭސީން ދެނެގަނެ ފިޔަވަޅުތައް އެޅުމުގެ މަސައްކަތް އަދިވެސް އިމިގްރޭޝަނުން ކުރަމުންދެއެވެ. މިމަސައްކަތުގެ ދަށުން އާންމު ސާފުތާހިރުކަން ކުޑަ ކޮށް ކާބޯތަކެތި ހަދައި ވިއްކާ އެތައް ވިޔަފާރިއެއްވެސް ވަނީ ހުއްޓުވައިފައެވެ.

އަދި ޤަވާއިދާ ޚިލާފަށް އުޅޭ އެތައް ބިދޭސީންނެއް ހިފައި ޑީޕޯޓު ކޮށްފައިވާ ކަންވެސް ފާހަގަ ކުރެވެއެވެ. ރާއްޖޭގައި ޤަވާއިދާ ޚިލާފަށް އުޅޭ ބިދޭސީންގެ މައްސަލައަށް ހައްލެއް ހޯދުމަށް ފަށައިފައިވާ މަސައްކަތަކީ ރައީސުލްޖުމްހޫރިއްޔާ ޑރ މުޙައްމަދު މުއިއްޒުގެ ސީދާ އެންގެވުމުގެ ދަށުން ކުރަމުންދާ މަސައްކަތެކެވެ.