އެމްޑީޕީ ސަރުކާރުން 2 ބިލިއަން ރުފިޔާ ޚަރަދު ކުރި މައްސަލަ ބެލުން އަވަސްކުރުމަށް މާރިޔާ ގޮވައިލައްވައިފި!

ފާއިތުވި ސަރުކާރުން ޤާނޫނާއި ޤަވާއިދާ ޚިލާފަށް ޚަރަދުކުރި ކަމަށްބުނާ 2 ބިލިއަން ރުފިޔާގެ މައްސަލަ ލަސްނުކޮށް ބެލުމަށް އެސަރުކާރުުގެ ދިފާއީ ވަޒީރު މާރިޔާ އަޙުމަދު ދީދީ ވިދާޅުވެއްޖެއެވެ. 

އިއްޔެ ސަރުކާރުން ބޭއްވި ނޫސްވެރިންގެ ބައްދަލުވުމެއްގައި 2 ބިލިއަން ރުފިޔާގެ މައްސަލަ އާއި ގުޅޭ ކަންކަން ވަނީ ހިއްސާކުރައްވައިފައެވެ.

މިކަމާއި ގުޅިގެން މާރިޔާ އެކްސްގައި ކުރެއްވެވި ޕޯސްޓެއްގައި ވިދާޅުވެފައިވަނީ ބަލަންޖެހޭކަމަށްދެކޭ މައްސަލަ ލަސްނުކޮށް ބަލާ، އެކަންކުރުން އެއީ މާލީ ހިސާބު، ޤާނޫންގައިވާ ގޮތުގެމަތީން، ހާމަ ކުރަން ދައްކާ ބަހަނާއަކަށް ވެގެންނުވާނެ ކަމަށެވެ. 

އިއްޔެގެ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން މާލީ ވަޒީރު މޫސާ ޒަމީރު ވިދާޅުވީ ދައުލަތުގެ މާލީ ހާލަތު ބަޔާންކޮށްދޭ، ވީކްލީ ފިސްކަލް ޑިވެލޮޕްމަންޓްސްގެ ނަމުގައި ކޮންމެ ހަފުތާއަކު މާލީ ވުޒާރާއިން ޤަވާއިދުން ނެރެމުންދިޔަ ރިޕޯޓު، މިދިޔަ ޖޫން މަހުން ފެށިގެން ނެރެފައި ނުވާ މައްސަލައަށް އަލިއަޅުއްވައި ލައްވައިފައިވެއެވެ. 

އެގޮތުން ވަޒީރު މޫސާ ޒަމީރު ވިދާޅުވީ އަހަރު ދެބައިވިއިރު ޚަރަދުތަކުގައި ބޮޑެތި ފަރަގުތަކެއް ހުރިކަން ފާހަގަކުރެވިގެން، އެ ރިޕޯޓް ނެރުން އޭރުގެ މާލީ ވަޒީރުގެ މަގާމުގައި ހުންނެވި މުހައްމަދު ޝަފީޤް ހުއްޓާލައްވައި، އެކަން ހިނގާފައިވާ ގޮތް ބެއްލެވި ކަމަށެވެ.

އެގޮތުން 2023 ވަނަ އަހަރުގެ ތެރޭގައި ބޭރުގެ އެހީގެ ދަށުން ހިންގާ ޕްރޮޖެކްޓްތަކަށް ބޭރުގެ މާލީ އިދާރާ ތަކުން ދޫކޮށްފައި ހުރި ދޮޅު ބިލިއަނާއި ދެ ބިލިއަން ރުފިޔާއާ ކައިރި ކުރާ ޢަދަދެއް މި އަހަރުގެ ތެރޭގައި ރެކޯޑްކޮށްފައިވާކަން ފާހަގަކުރެވުނު ކަމަށް ވަޒީރު ވިދާޅުވިއެވެ.

އެހެންވެ މިދިޔަ އަހަރާއި އޭގެ ކުރީ އަހަރުތަކުގައި ޕޯސްޓްކުރަން އެދިފައިވާ ޖުމްލަ 2.5 ބިލިއަން ރުފިޔާގެ ބިލުތަކަށް މި އަހަރުގެ ބަޖެޓުން ޖާގަ ދޭން ޖެހިފައިވާ ކަމަށާއި އޭގެއިތުރުން ވެސް މިފަދަ ބިލުތައް އެކި ވުޒާރާތަކުގައި ހުރުން އެކަށީގެންވާ ކަމަށް ވެސް ވަޒީރު ވިދާޅުވިއެވެ.

އެކަން ދެނެގަތުމުގެ މަސައްކަތް އޮޑިޓަރ ޖެނެރަލްގެ އޮފީހާއެކީ ކުރައްވަމުން ގެންދަވާ ކަމަށްވެސް މާލީ ވަޒީރު މޫސާ ޒަމީރު ވިދާޅުވި އެވެ.

މީގެ އިތުރުން، މިދިޔަ އަހަރުގެ ބަޖެޓުގައި ޕޯސްޓްކޮށްފައިހުރި، އެހެން ނަމަވެސް 2023 ވަނަ އަހަރުގެ ކޭޝްޕްލޯއިން ފައިސާ އަދާ ނުކުރެވި ހުރި 3 ބިލިއަނެއްހާ ރުފިޔާ މި އަހަރުގެ ކޭޝްފްލޯއިން އަދާކޮށްފައިވާ ކަން ވެސް ވަޒީރު ވަނީ ފާހަގަ ކުރައްވައިފައެވެ.

ވަޒީރު މޫސާ ޒަމީރު ވިދާޅުވީ މިކަމާ ގުޅޭގޮތުން ކުރިއަށް ދާނެ ގޮތުގެ ލަފާ އަށް އޮޑިޓަރ ޖެނެރަލް އަރިހުގައި ލިޔުމުން އެދިފައިވާނެ ކަމަށާއި، އަދި މިކަމުގައި ކުރިއަށް ދާނީ ބަންޑާރަ ނައިބުގެ ކިބައިން ލިބޭ ލަފާއާ ވެސް އެއްގޮތަށް ކަމަށެވެ.

މިދިޔަ ސަރުކާރުގައި ޚަރަދުތައް ރިކޯޑު ކުރުމުގައި ވަރަށް ބޮޑަށް އިހުމާލުވެފައިވާ ކަން ވަޒީރު ފާހަގަކުރެއްވެވިއެވެ.