ބިން ހެލުމުގެ ލޮޅުން އިޙުސާސް ވިޔަސް ސުނާމީގެ ނުރައްކަލެއް ނެތް: މީޓިއޮރޮލޮޖީ

އިންޑިއާ ކަނޑުގެ އިރުމަތީގައި އޮންނަ ނިކޮބާ އައިލެންޑްސްއަށް އައި ބިންހެލުމުގެ އިހުސާސް ރާއްޖޭގެ ބައެއް ސަރަޙައްދުތަކަށް ކޮށްފައިވީނަމަވެސް، މިކަމާ ގުޅިގެން ރާއްޖެއަށް އެއްވެސް ނުރައްކަލެއް ނެތް ކަމުގައި މޯލްޑިވްސް މީޓިއޮރޮލޮޖިކަލް ސެންޓަރުން ހާމަކޮށްފިއެވެ.

ރޭގެ 11:40 ހާއިރު އައި މި ބިންހެލުމާ ގުޅިގެން މާލެ އާއި ހުޅުމާލެއަށް މި ބިންހެލުމުގެ ލޮޅުން އިޙުސާސް ކުރެވިގެން މީޓިއޮރޮލޮޖީއަށް އެކަމުގެ ރިޕޯޓުތައް ލިބިފައިވާކަމަށް ވެސް ހާމަކޮށްފައިވެއެވެ. 

އަދި ގދ. ކާޑެއްދޫގައި ޤާއިމްކޮށްފައި ހުންނަ ސުނާމީ ވާރނިން މީޓަރަށް ބިންހެލުން ރެކޯޑު ކުރެވިފައިވާކަމަށް ވެސް މީޓިއޮރޮލޮޖީއިން ވަނީ ހާމަކޮށްފައެވެ. 

Earthquake information. pic.twitter.com/WEBfIEST42

— Maldives Meteorology (@MetMaldives) July 29, 2025

ނަމަވެސް މިކަމުގެ ސަބަބުން ސުނާމީގެ އެއްވެސް ނުރައްކަލެއް ކުރިމަތިވެދާނެކަމަށް ލަފާނުކުރެވޭކަމަށް އެ އިދާރާއިން ވަނީ ހާމަކޮށްފައެވެ. 

ބިންހެލުމާ ގުޅިގެން އިންޑިއަން ސުނާމީ އާލީ ވޯނިން ސެންޓަރު (އައިޓީއީޑަބްލިއުސީ)އިން ރޭ ހާމަކުރި މަޢުލޫމާތުގައި ބުނީ،  މި ބިންހެލުން އައިސްފައި ވަނީ ކަނޑުގެ 43 ކިލޯމީޓަރު އަޑިއަށް ކަމަށާއި އަދި މި ބިންހެލުމުގެ ސަބަބުން އިންޑިއާގެ ކަނޑުގެ އެއްވެސް ޤައުމަކަށް ނުރައްކަލެއް ނެތްކަމަށެވެ. 

އަދި ބިންހެލުން އައި ނިކޮބާ އައިލެންޑްސްއަށް ވެސް އެއްވެސް ގެއްލުމެއް ލިބުނު ކަމަކަށް އެއްވެސް ފަރާތަކުން ރިޕޯޓުކޮށްފައެއް ނުވެއެވެ.

މި ބިންހެލުން އައިސްފައި ވަނީ ރާއްޖެއާ 2،215 ކިލޯމީޓަރު ދުރުން 6.2 މެގްނިޓިއުޑްގެ ބާރުމިނުގައެވެ.