އޮޑިޓަރ ޖެނެރަލްގެ އޮފީހަށް 114 މިލިއަން ރުފިޔާގެ ބަޖެޓެއް ފާސްކޮށްދީފި!

އޮޑިޓަރ ޖެނެރަލްގެ އޮފީހަށް 114 މިލިއަން ރުފިޔާގެ ބަޖެޓެއް ފާސްކޮށްފިއެވެ. 

މަޖިލީހުގެ މިއަދުގެ ޖަލްސާގައި މާލިއްޔަތު ކޮމިޓީގެ މުޤައްރިރު ޤާސިމް އިބްރާހިމް، އޮޑިޓަރ ޖެނެރަލްގެ އޮފީހުން ހުށަހެޅި ބަޖެޓަށް މާލިއްޔަތު ކޮމިޓީން ގެނައި ބަދަލުތަކާ އެކު, ޖުމްލަ 114،497،312 ރުފިޔާގެ ބަޖެޓެއް ކަނޑައެޅުމަށް ނިންމި ނިންމުމުގެ ރިޕޯޓް އިއްވަވާފައިވެއެވެ.

އޭގެ ތެރެއިން ރިކަރަންޓު ޚަރަދުގެ ގޮތުގައި ހަމަޖައްސައިފައިވާ ބަޖެޓުގެ ޖުމުލައަކީ 80 މިލިއަން ރުފިޔާއެވެ.

މާލިއްޔަތު ކޮމިޓީން ނިންމި ނިންމުމާ އެއްގޮތަށް އޮޑިޓް އޮފީހުގެ ބަޖެޓު ފާސްކުރަން މަޖިލީހުގެ ތަޅުމުގައި މިއަދު ނެގި ވޯޓުގައި ބައިވެރިވެވަޑައިގެނެވީ 75 މެންބަރުންނެވެ. އެހުރިހާ މެމްބަރުންވެސް ވަނީ މާލިއްޔަތު ކޮމިޓީން ނިންމާފައިވާ ގޮތަށް އިތުރު އެއްވެސް ބަދަލެއް ނުގެނެސް އެ ބަޖެޓް ފާސްކުރަން ވޯޓް ދެއްވައިފައެވެ.

މަޖިލީހަށް މިއަދު އެ ބަޖެޓު ހުށަހެޅުމުން މަޖިލީހުގެ ތަޅުމުގައި ވެސް އޮޑިޓަރ ޖެނެރަލްގެ އޮފީހުގެ ބަޖެޓާ ގުޅޭ ގޮތުން ބަހުސްކުރެއްވީ މަދު މެންބަރުންތަކެކެވެ. އިދިކޮޅު އެމްޑީޕީންވެސް ވަނީ މާލިއްޔަތު ކޮމިޓީގެ ނިންމުމަށް ތާއީދު ކޮށްފައިކަން ފާހަގަ ކޮށްލަންޖެހެއެވެ.