ޚަބަރު
އެޗްޑީސީ އަށް ދައްކަން ޖެހޭ ފައިސާ ނުދައްކާ މީހުންގެ ނަން ހާމަކުރަނީ!
ހައުސިންގް ޑިވެލޮޕްމެންޓް ކޯޕަރޭޝަން
ހައުސިންގ ޑިވެލޮޕްމެންޓް ކޯޕަރޭޝަން (އެޗްޑީސީ) އަށް ދައްކަން ޖެހޭ ފައިސާ ނުދައްކާ މީހުންގެ ނަން ހާމަކުރަން އެކޯޕަރޭޝަނުން ނިންމައިފިއެވެ.
އެޗްޑީސީ އިން މިއަދު ކުރި އިޢުލާނެއްގައި ބުނެފައިވަނީ، ވިޔަފާރި އުސޫލުން ދެމުން އަންނަ ޚިދުމަތްތަކާއި ދޫކޮށްފައިވާ ތަންތަން އަދި ތަރައްޤީ ކުރަމުން އަންނަ ތަންތަނަށް ފައިސާ ދައްކަން ޖެހި، ނުދައްކާ ހުރި ފަރާތްތަކުން އަންނަ ނޮވެމްބަރު މަހުގެ ނިޔަލަށް ފައިސާ ދައްކާ ޚަލާސްކުރަން އަންގާ ކަމަށެވެ.
އެ މުއްދަތުގެ ތެރޭގައި ފައިސާ ދެއްކުމަށް އުޒުރުވެރިވާ ފަރާތްތަކަށް އިތުރު ނޯޓިސްއެއް ދޭނެ ކަމަށް އިޢުލާނުގައިވެ އެވެ. އެ ނޯޓިސްއާއި އެކު އެ ފަރާތްތަކުގެ މަޢުލޫމާތާއި ދައްކަން ޖެހޭ ފައިސާގެ ތަފްސީލުތައް ވެބްސައިޓްގައި ޝާއިއުކުރާނެ ކަމަށް ވެސް އެޗްޑީސީގެ އިޢުލާނުގައި ބުނެފައިވެއެވެ.
މިއީ އެކުންފުނީގެ ހިންގުން ހަރުދަނާ ކުރުމަށްޓަކައި ކުރަމުން އަންނަ މަސައްކަތްތަކުގެ ތެރެއިން އަޅާ ފިޔަވަޅެއް ކަމަށްވެސް އެކޯޕަރޭޝަނުން ބުނެފައިވެއެވެ.
