ރާއްޖެއިން ބޭރަށް ގެންދަން އުޅުނު 81،000 ޑޮލަރު ދައުލަތަށް ނަގަން ޙުކުމް ކޮށްފި!

ރާއްޖެއިން ބޭޭރަށް ގެންދަން އުޅުނު 81،000 ޑޮލަރު ދައުލަތަށް ނަގަން ކްރިމިނަލް ކޯޓުން ޙުކުމް ކޮށްފިއެވެ.

މިމައްސަލައަކީ ރާއްޖެއިން ބަންގްލަދޭޝްއަށް ފުރަން އުޅުނު ބަންގްލަދޭޝްގެ ރައްޔިތެއް ކަމަށްވާ، ޝަހްމީން އިސްލާމް ޝަގުރް އަތުން، ހޯދައިފައިވާ 81،130 ޔޫއެސް ޑޮލަރުގެ މައްސަލައެވެ. އޭނާގެ އަތުން އެފައިސާ ހޯދައިފައިވަނީ އޭނާ ފުރަން ވެލާނާ އިންޓަރނޭޝަނަލް އެއަރޕޯޓަށް ގޮސް ހުއްޓައި ހުސްވި އޮގަސްޓު މަހުގެ ތެރޭގައެވެ. އަދި އެފައިސާ ހޯދައިފައިވަނީ އޭނާ ގެންގުޅު ކަޅު ކުލައިގެ ބެކްޕެކެއް ބަލައި ފާސްކުރުމުގެ ތެރޭގައި އޮތް ހުދުކުލައިގެ ކޮތަޅެއް ތެރެއިންނެވެ. 

އޭނާގެ މައްޗަށް ކުރެވޭ ދައުވާ އަކީ، ދިވެހިރާއްޖޭގެ ކަސްޓަމްސްގެ ޤާނޫނުގެ 97 ވަނަ މާއްދާގެ (ހ) އާ ޙަވާލާދީ އެ މާއްދާގެ (ރ) އާއި (ބ) ގެ ދަށުން، ދިވެހިރާއްޖެއިން ސިއްރުން މުދާ ބޭރު ކުރަން އުޅުމުގެ ދައުވާއެވެ.

އެ މައްސަލައިގައި އޭނާ ކްރިމިނަލް ކޯޓަށް ޙާޒިރުކުރުމުން، އޭނާ ސިއްރުން މުދާ ބޭރުކުރުން އުޅުނު ކަމަށް އިޢުތިރާފްވެފައިވާތީ، އެ މައްސަލަ އޭނާގެ މައްޗަށް ސާބިތުވިކަމަށް ކަނޑައަޅާފައިވެއެވެ.

އެގޮތުން އެ މައްސަލައިގައި އޭނާ އާއި ޕްރޮސެކިއުޓާ ޖެނެރަލް (ޕީޖީ)ގެ އޮފީހާއެކު ވެފައިވާ އިޢުތިރާފުގެ އެއްބަސްވުމުގެ ދަށުން އަދަބާ މެދު އެއްބަސްވެފައިވާތީވެ، އެ މައްސަލަ ބެއްލެވި ފަނޑިޔާރު އަދަބު ވެސް ކަނޑައެޅުއްވީ އެ އެއްބަސްވުމުގައިވާ ގޮތުގެ މަތީންނެވެ.

އެ މައްސަލައިގައި ޝަރީޢަތުން އަދަބު ކަނޑައެޅުމުގައި ރިޢާޔަތްކޮށްފައިވަނީ ވެސް، ޝަރީޢަތުން ބަލައިގަތުމަށް ނިންމި އިޢުތިރާފުގެ އެއްބަސްވުމަށެވެ.

އެ އެއްބަސްވުމުގައި ވަނީ، އޭނާގެ އަތުން ފެނުނު 81،130 ޑޮލަރު ދައުލަތަށް ނެގުމަށް އެއްބަސްވެފައެވެ. އަދި އެ އެއްބަސްވުމުގެ ދަށުން، ކުށުގެ އަދަބެއްގެ ގޮތުގައި 12،000 ރުފިޔާ އިން އޭނާ ޖޫރިމަނާ ކުރުމަށް ވެސް ވަނީ ކަނޑައަޅާފައެެވެ.

އެހެން ނަމަވެސް، އެ މައްސަލައިގައި ހިމެނޭ މީހާގެ އަމިއްލަ ފައިސާގެ ތެރޭގައި ހިމެނޭ 4،500 ޑޮލަރާއި، 350 ޔޫރޯ ވަނީ ކަސްޓަމްސް އިން ހިފަހައްޓާފައިކަަމަށް އޭނާ ބުނެއެވެ. އަދި ކޯޓުން ކަނޑައަޅައިފައިވާ  ޖޫރިމަނާ ދެއްކޭނީ އެ ފައިސާ ލިބުމުން ކަމުގައި ޝަހްމީން ކޯޓުގައި ބުނެފައިވެއެވެ.

އެކަމާ ގުޅިގެން، އެ މައްސަލަގައި ޙުކުމް ކުރާތާ ފަސް ދުވަހުގެ ތެރޭގައި އެ ފައިސާ އޭނާއާ ހަވާލުކުރެވޭނެ ކަމަށް ދައުލަތުގެ ފަރާތުން ވަނީ ބުނެފައެވެ.

އެ މައްސަލައިގައި ކޯޓުން ކުރި ޙުކުމުގައި ވަނީ، އިއްޔެ އިން ފެށިގެން 15 ދުވަހުގެ ތެރޭގައި އެ ފައިސާ މީރާއަށް ދެއްކުމަށް އޭނާގެ މައްޗަށް ޙުކުމްކޮށްފައެވެ. އަދި 81،130 ޑޮލަރު ކަސްޓަމްސްއަށް ނެގުމަށް ވެސް ޙުކުމްކޮށްފައިވެއެވެ.