ވެލާނާ އިންޓަނޭޝަނަލް އެއަރޕޯޓު ތަރައްޤީކޮށް އަޕްގްރޭޑްކުރުމަށް ޗައިނާ އިން ނެގި ލޯނު ރީފައިނޭންސްކޮށްފި!

ވެލާނާ އިންޓަރނޭޝަނަލް އެއަރޕޯޓު ތަރައްޤީކޮށް އަޕްގްރޭޑްކުރުމަށް ޗައިނާގެ ޗައިނާގެ އެކްސްޕޯޓް އިމްޕޯޓް ބޭންކް (އެގްޒިމް) ބޭންކުން 2015ވަނަ އަހަރު ނެގި 378 މިލިއަން ޑޮލަރުގެ ލޯނު ދެއްކުމަށް ބޭނުންވާ 75 މިލިއަން ޑޮލަރު ރީފައިނޭންސް ކޮށްފިއެވެ.

މިދިޔަ މަހުގެ 23ވަނަ ދުވަހު ސޮއި ކުރެވުނު މި އެއްބަސްވުމާގުޅޭ ސިޓީ، އިއްޔެ އޮތް މާލިއްޔަތު ކޮމިޓީގެ ބައްދަލުވުމުގައި ހާމަކޮށްފައިވެއެވެ.

އެ ސިޓީގައިވާ ގޮތުން 74،767،599.98 ޑޮލަރު ރިފައިނޭންސް ކުރުމަށް އެއްބަސްވުމެއްގައި ސޮއިކޮށްފައިވާއިރު، މި ދަރަނި ރިފައިނޭންސްކުރި މައިގަނޑު ސަބަބުތަކަކީ މެދުރާސްތާގައި ދައްކަންޖެހޭ ދަރަނި ދެއްކުމުގައި ދައުލަތަށް ލުއިތަކެއް ހޯދުމެވެ. އަދި ދައުލަތުގެ ރިޒާވުން ކުރަންޖެހޭ ހޭދަ ކުޑަކުރެވި ދައުލަތުގެ މާލީ ހާލަތު ރަނގަޅުކުރުމެވެ.

ދަރަނި ރިފައިނޭންސްކުރުމަކީ ނަގައިފައިވާ ދަރަންޏެއް ދެއްކުމަށް އިތުރު ދަރަންޏެއް ނެގުމެވެ. އަދި ކުރީގެ ލޯނުތަކުގެ ޝަރުތުތައް އާ ލޯނަށް ބަދަލުވުމެވެ.

ޗައިނާއިން ނަގާފައިވާ މި ލޯނުގެ ދަށުން ދައްކަންޖެހޭ ފުރަތަމަ އިންޓަރެސްޓް ޕޭމަންޓު ދައްކަން ޖެހެނީ 21 ޖެނުއަރީ 2025ގައެވެ. އެއަށްފަހު ކޮންމެ އަހަރެއްގެ 21 ޖެނުއަރީ އަދި 21 ޖުލައިގައި އިންޓަރެސްޓް ޕޭމަންޓުތައް ދައްކަން ޖެހޭނެއެވެ.

މިދަރަނި އަނބުރާ ދައްކައި ނިންމަން ޖެހެނީ 2030ވަނަ އަހަރުގެ ނިޔަލަށެވެ.