ޚަބަރު
އިސްލާމީ ވަޒީރު ޑރ ޝަހީމަށް މަރުގެ އިންޒާރު ދިން މައްސަލައެއް ފުލުހުން ބަލަނީ!
ވަޒީރު ޑރ މުޙައްމަދު ޝަހީމް ޢަލީ ސަޢީދު. ފޮޓޯ: އިސްލާމީ ކަންތައްތަކާއި ބެހޭ ވުޒާރާ
އިސްލާމީ ކަންތައްތަކާ ބެހޭ ވަޒީރު ޑރ މުޙައްމަދު ޝަޙީމް ޢަލީ ސަޢީދަށް މަރުގެ އިންޒާރުދިން މައްސަލައެއް ދިވެހި ފުލުހުންގެ ޚިދުމަތުން ބަލަންފަށައިފިއެވެ.
ދިވެހި ފުލުހުންގެ ޚިދުމަތުން މިކަމާއި ގުޅިގެން ބުނެފައިވަނީ އިސްލާމީކަންތައްތަކާ ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދަށް މަރުގެ އިންޒާރުދިން މައްސަލަ، ސިޓީއަކުން އިއްޔެ ހުށަހަޅާފައިވާ ކަމަށެވެ. އަދި މިމައްސަލަ އެމުއައްސަސާއިން ތަހުޤީޤު ކުރަމުންއަންނަ ކަމަށްވެސް ވަނީ ބުނެފައެވެ.
މިކަމާއި ގުޅޭ އިތުރު ތަފްސީލެއް ފުލުހުން ހާމަކޮށްފައެެއް ނުވެއެވެ.
ސިޔާސީ ދާއިރާގައި މަސައްކަތް ކުރައްވާ ފަރާތްތަކަށް މަރުގެ އިންޒާރުފަދަ ނުރައްކާތެރި އިންޒާރުތައް ދޭތެރެއަކުން ދެއެވެ.
އެގޮތުން ދާދި ފަހަކުން ރައީސުލްޖުމްހޫރިއްޔާ ޑރ މުޙައްމަދު މުޢިއްޒަށްވެސް ސޯޝަލް މީޑިއާގައި މިފަދަ އިންޒާރެއް ދީފައިވެއެވެ.
ފުލުހުން ވަނީ އެމައްސަލާގައި ހިމެނޭ މީހާ ހައްޔަރުކޮށްފައެވެ.
