ކިއުބާގައި ކަރަންޓު ކެނޑުމުގެ ސަބަބުން މުޅި ޤައުމު އަނދިރިކަމުގެ ތެރެއަށް

ކިއުބާގެ މުޅި ޤައުމަށް ކަރަންޓު ކެނޑި، އެ ޤައުމުގެ ކަރަންޓު ވިއުގަ ހަލާކުވުމާ ގުޅިގެން މުޅި ޤައުމު އަނދިރިކަމުގެ ތެރެއަށް ވެއްޓިއްޖެއެވެ. މި ހާދިސާ ހިނގީ ހުކުރު ދުވަހު ކަމަށްވާއިރު، އޭގެ ދެ ދުވަސް ފަހުން އައި ޓްރޮޕިކަލް ސްޓޯމް އޮސްކާ ކެޓަގަރީ 1 ގެ ހަރިރިކޭނަކަށް ބަދަލުވެ، ކިއުބާއަށް ބޮޑެތި ގެއްލުންތަކެއް ލިބުނެވެ.

 މި ވަގުތު ބައެއް ސަރަހައްދުތަކަށް ކަރަންޓު ލިބެމުންދާ ކަމަށް ވީނަމަވެސް، މިލިއަނުން ގުނާލެވޭ އަދަދެއްގެ މީހުން އަދިވެސް ކަރަންޓު ނުލިބި ތިބި ކަމަށް ވަނީ ރިޕޯޓުކުރެވިފައެވެ. ޚާއްޞަކޮށް ވިލެޖް ސަރަހައްދުތަކާއި އިރުމަތީ ސަރަހައްދުތަކަށް ކަރަންޓު ނުލިބޭ ކަމަށް ބުނެވެއެވެ.

 މި ކަރަންޓު ކެނޑުމަކީ އެތައް އަހަރެއްގެ އިހުމާލާއި، އިޤްތިޞާދީ ހީނަރުކަމާއި، ކިއުބާއަށް ތެޔޮ ލިބުމަށް ދިމާވެފައިވާ ދަތިތަކުގެ ނަތީޖާއެއް ކަމަށް ބެލެވެއެވެ. އަދި މި މައްސަލައަށް ދާއިމީ ހައްލެއް ލިބޭނެ ކަމަކަށް ނުބެލެވެއެވެ.

 ކިއުބާގެ ސަރުކާރުން އާންމުކޮށް ކަރަންޓު ސަލާމަތްކުރުމަށްޓަކައި ގަޑިތަކަކަށް ކަރަންޓު ކަނޑާލާ ކަމަށް ވީނަމަވެސް، މިފަހަރުގެ ކަރަންޓު ކެނޑުމަކީ މުޅިން ތަފާތު ކަމެކެވެ. މި ކަރަންޓު ކެނޑުމުގެ ސަބަބުން އާންމު ރައްޔިތުންގެ ދިރިއުޅުމަށް ވަރަށް ބޮޑެތި ދަތިތަކާ ކުރިމަތިލާން ޖެހިފައިވެއެވެ. ގޭގައި ފިނިކުރުމާއި، ކާބޯތަކެތި ފިނިކޮށް ބެހެއްޓުމާއި، ކެއްކުމާއި، ބޯފެން ހޯދުމާއި، ދޮވެ ސާފުވުމަށް ބޭނުންވާ ފެން ހޯދުމަށް ދަތިވެފައިވެއެވެ.

 މި ހާދިސާ ފެށުނީ ހުކުރު ދުވަހުގެ މެންދުރު ވަގުތެއްގައި، އެންޓޯނިއޯ ގުއިޓެރަސް ޕަވަރ ޕްލާންޓް ހުއްޓާލުމާ ގުޅިގެންނެވެ. މި ޕްލާންޓަކީ ކިއުބާގެ އެންމެ ބޮޑެތި ޕަވަރ ޕްލާންޓްތަކުގެ ތެރެއިން އެއް ޕްލާންޓެވެ. މި ޕްލާންޓް ހުއްޓާލުމުގެ ކުރިން ކިއުބާގެ 8 ތަރމޯ އިލެކްޓްރިކް ޕްލާންޓުގެ ތެރެއިން 7 ޕްލާންޓް ވަނީ މަރާމާތުކުރަމުން ނުވަތަ މަސައްކަތް ނުކުރާ ހާލަތުގައެވެ.

ކިއުބާގެ ސަރުކާރުން މި ހާދިސާއަށް ޒިންމާ ނަގައި، މި ކަމަށް ހައްލު ހޯދުމަށް މަސައްކަތްކުރަމުންދާ ކަމަށް ބުނެފައިވެއެވެ. އަދި ކިއުބާގެ ރައީސް މިގުއެލް ޑިއަޒް-ކަނެލްވެސް ވަނީ މުޅި ޤައުމަށް ކަރަންޓު ރުޖޫޢަކުރުމަށް ސަރުކާރުން ދުވާލާއި ރޭގަނޑު މަސައްކަތްކުރަމުންދާ ކަމަށް ބުނެފައެވެ.

 މި ވަގުތު ބައެއް ހޮސްޕިޓަލުތަކަށް ފުރިހަމައަށް ކަރަންޓު ލިބެމުންދާ ކަމަށް ވީނަމަވެސް، އަނެއްބައި ހޮސްޕިޓަލުތައް ހިންގަމުންދަނީ ޖަނަރޭޓަރުގެ އެހީގައެވެ. ނަމަވެސް ގިނަ އަދަދެއްގެ ކިއުބާގެ ރައްޔިތުންނަށް ޖަނަރޭޓަރު ބޭނުންކުރުމުގެ ފުރުޞަތު ނުލިބެއެވެ. އަދި ޖަނަރޭޓަރު ހިންގުމަށް ބޭނުންވާ ތެލުގެ ދަތިކަންވެސް ދިމާވެފައިވެއެވެ. މިކަމަކީ ކަރަންޓު ކެނޑިފައިވާ މުއްދަތު ދިގުލައިގެން ދާނަމަ ބޮޑު މައްސަލައަކަށް ވެދާނެ ކަމެކެވެ.

 ހޯމަ ދުވަހުގެ ނިޔަލަށް ވެރިރަށް ހަވާނާގެ ގިނަ ސަރަހައްދުތަކަށް ކަރަންޓު ލިބެމުންދާ ކަމަށް ހަކަތައާ ބެހޭ އޮފިޝަލުން މަޢުލޫމާތު ދީފައިވެއެވެ. އަދި އެންޓޯނިއޯ ގުއިޓެރަސް ޕަވަރ ޕްލާންޓްވެސް މަރާމާތުކޮށް، އަލުން މަސައްކަތް ފަށާފައިވާ ކަމަށް ބުނެފައިވެއެވެ. މިކަމުގެ ސަބަބުން އެހެން ސަރަހައްދުތަކަށްވެސް ކޮންމެވެސް ވަރަކަށް ކަރަންޓު ލިބެމުންދާ ކަމަށް ބުނެވެއެވެ. ނަމަވެސް،ކިއުބާގެ އިރުމަތީ ކޮޅުގައި ހުރި ސަރަހައްދުތަކަށް އަދިވެސް ކަރަންޓު ނުލިބޭ ކަމަށް ވަނީ ރިޕޯޓުކުރެވިފައެވެ.

 މި ހާދިސާއަކީ ކިއުބާގެ ނާޒުކު އިޤްތިޞާދީ ހާލަތާއި، ތަރައްޤީގެ ދަތިތަކާއި، ބައިނަލްއަޤްވާމީ ސިޔާސީ މަޝްރަހުގައި ކިއުބާގެ ނާޒުކު ހާލަތު ދައްކުވައިދޭ ކަމެއް ކަމަށް ބެލެވެއެވެ. މި ކަރަންޓު ކެނޑުމުގެ މައްސަލައަށް ދާއިމީ ހައްލެއް ހޯދުމަށް ގިނަ ގޮންޖެހުންތަކެއް ހުރި ކަމަށް ފާހަގަކުރެވެއެވެ.