ޣައްޒާގެ އުތުރުގައި ތިބި ފަލަސްޠީނުގެ ރައްޔިތުން އިޒްރާއިލް ސިފައިންގެ ހަމަލާތަކުގެ ތެރެއިން އެސަރަހައްދު ދޫކޮށްދަނީ!

ޣައްޒާގެ އުތުުރުގެ ސަރަހައްދަށް އިޒްރާއިލް ސިފައިން ދެމުންދާ ހަމަލާތަކުގެ ތެރެއިން ސަލާމަތްތެރިކަން ހޯދުމަށް އެސަރަހައްދުގައި ތިބި ފަލަސްޠީނުގެ ރައްޔިތުން އެސަރަހައްދު ދޫކޮށް ދާން ފަށައިފިއެވެ. 

ހަނގުރާމައިގެ ސަބަބުން ވަރުބަލިވެފައިވާ ޣައްޒާގެ ނިކަމެތި ރައްޔިތުން އެސަރަހައްދު ދޫކޮށް ދަމުންދާއިރުވެސް ޣައްޒާގެ އުތުުރު ސަރަހައްދު ވަށަލައިގެން ތިބި އިޒްރާއިލްގެ ހައްދުފަހަނަ އެޅި ސިފައިން ދަނީ ހަމަލާތައް ހުއްޓުމެއްނެތި ކުރިއަށްގެންދަމުންނެވެ.

އިޒްރާއީލުގެ ސިފައިން ހުއްތުމެއްނެތި ދެމުންދާ ހަމަލާތަކުގެ ސަބަބުން އެސރަަހައްދުގައި އެތައް ބަޔަކު ވަނީ ތާށިވެެފައެވެ. ހަމަލާތައް ދީ އެސަރަހައްދުގެ ރައްޔިތުންގެ ހިތްތަކުގައި ބިރުވެރިކަން އިންތިހާއަށް ބޮޑަށް ގޮސްފައިވާއިރު، އެސަރަހައްދު ދޫކޮށް އެތަން ހުސްކޮށް ދިޔުމަށް އިޒްރާއިލް ސިފައިން ދަނީ ހުއްޓުމެއްނެތި އަންގަމުންނެވެ. 

 ފަލަސްޠީނުގެ ރެފިޔުޖީންނާއި ބެހޭ އދ.ގެ އިދާރާއިން ބުނެފައިވަނީ ގާތްގަނޑަކަށް 400،000 އެއްހާ ފަލަސްޠީނުގެ ރައްޔިތުން އުތުރު ޣައްޒާގައި ތާށިވެފައި ތިބޭނެ ކަމަށެވެ. އޭގެ ތެރޭގައި ޣައްޒާގެ ޖަބަލިއްޔާ ރެފިޔުޖީ ކޭމްޕުގައި ތިބި މީހުންވެސް ހިމެނޭކަމަށް ބުނެފައިވެއެވެ. 

ޔޫއެންއާރުޑަބްލިއުއޭ ގެ ތަރުޖަމާނު ލޫއީސް ވޯޓަރިޖް ބުނެފައިވަނީ ޖަބަލިއްޔާ ހިމެނޭ ގޮތަށް ޣައްޒާގެ އުތުރުގެ ސަރަހައްދުތަކުން ދިހަހާސް މީހުން ގެދޮރު ދޫކޮށްފައިވާ ކަމަށެވެ. 

އިޒްރާއީލުން ގިނަ ޢަދަދެއްގެ ބޮމުގެ ހަމަލާތައް ދީ މަގުތައް ހަލާކުވުމުން ޕެރެމެޑިކްސް އާއި އެމްބިއުލާންސްތަކަށް ޒަޚަމްވެފައިވާ މީހުންނާއި މަރުވެފައިވާ މީހުންނާ ހަމައަށް ދެވޭނެ ގޮތެއް ވަނީ ނެތިފައެވެ. އިސްރާއީލުން އޮކްޓޯބަރު މަހުގެ ހަ ވަނަ ދުވަހު ޣައްޒާގެ އުތުރު ސަރަހައްދުތައް ވަށާލި ފަހުން އެ ސަރަހައްދުން މަދުވެގެން 450 މީހުން މަރުވެފައިވާ ކަމަށް އަލްޖަޒީރާގައި ޕެރެމެޑިކްސް ގެ މީހަކަށް ހަވާލާދީވަނީ ބުނެފައެވެ. 

”އަހަރެމެނނަށް ކޮންމެ ހިނދުކޮޅަކު ވެސް އަނިޔާތަކާއި އެކު ތިބިމީހުންނާން ޝަހީދުން ގެ ޚަބަރުތައް އަންނަނީ ލިބެމުން، އެހެން ނަމަވެސް މަގުތައް ބަންދުވެފައި ހުރުމުން ޒަޚަމްވާ މީހުން ލޭއޮހޮރި މަރުވަންދެން ޖެހެނީ ތިބެން” ސިވިލް ޑިފެންސް ޕެރަމެޑިކް މުޢުތާޒް  އަޔޫބް ބުނެފައިވެއެވެ.

ވަދެވޭ މަގުތައް މަދުވުމުން މިހާރުވެސް ބޮޑެތި ދަތިތަކެއް ދަނީ ވަމުންކަމަށާއި، މިދަތިތައް ދަނީ އިތުރުވަމުން ކަމަށްވެސް އޭނާ ވަނީ ބުނެފައެވެ. 

ފަލަސްތީނުގެ ހެލްތު މިނިސްޓްރީން ރިޕޯޓްކޮށްފައިވާ ގޮތުގައި ޣައްޒާގެ އުތުރުގެ އެންމެ ހޮސްޕިޓަލެއް ފިޔަވައި އެހެން ހުރިހާ ހޮސްޕިޓަލެއްގެ ޚިދުމަތް ވަނީ މެދު ކެނޑިފައެވެ.