ޣައްޒާގައި ކުރިއަށް ގެންދިޔަ ޕޯލިއޯ ވެކްސިން ކެމްޕޭން އިޒްރާއިލްގެ ހަމަލާތަކާއި ހުރެ ހުއްޓާލަން ޖެހިއްޖެ!

ޣައްޒާގައި ޕޯލިއޯ ފެތުރެމުންދާތީ ކުރިއަށްގެންދިޔަ ޕޯލިއޯ ވެކްސިން ކެމްޕޭން އިޒްރާއިލުން ހުއްޓުމެއް ނެތި ދެމުންދާ ހަމަލާތަކުގެ ސަބަބުން ހުއްޓާލަން ޖެހިއްޖެއެވެ. 

ޣައްޒާގެ އުތުރުގައި ކުޑަކުދިންނަށް ޕޯލިއޯ ވެކްސިން ދިނުމަށް ކުރިއަށް ގެންދިޔަ ކެމްޕޭން އިޒްރާއީލުން ދެމުންދާ ބޮމުގެ ހަމަލާތަކުގެ ސަބަބުން ހުއްޓާލައިފައިވާއިރު ޣައްޒާއިން ޕޯލިއޯ ފެނިފައިވަނީ އެބަލި ނުފެންނަތާ 25 އަހަރުފަހުންނެވެ. 

ޣައްޒާއިން ޕޯލިއޯ ފެނިފައިވަނީ އޮގަސްޓު މަހުގެ މެދެއްހާ ހިސާބުގައެވެ. ބަލި ފެނި އެއީ ޕޯލިއޯ ކަން ދަނެގަނެވިފައިވަނީ 10 މަހުގެ ކުއްޖެއް ބައްޔަށް ޕޮޒިޓިވްވެ ވާގިނެތިގެން ދިޔަ ފަހުންނެވެ. ޣައްޒާގައި ޕޯލިއޯ ފެތުރެން ފެށީ ވެކްސިން ދެވެން ނެތުމުން ކަމަށް ވަނީ ބުނެފައެވެ.

ހަމަލާތަކުގެ ސަބަބުން ޕޯލިއޯ ވެކްސިން ކެމްޕޭން ހުއްޓާލައިފައިވަނީ  ގިނަ ބައެއްގެ ގެދޮރު ގެއްލިފައިވާއިރު މީހުން ރައްކާތެރިކަމާއި އެކު ވެކްސިން ދޭ މަރުކަޒުތަކަށް ގެންގޮސް ދެވޭނެ މަގު ނެތުމުން ކަމަށް ގެނައުމާއި ވަދެވޭނެ ގޮތް ނެތުމުގެ ސަބަބުން ކަމަށް ދުނިޔޭގެ ޞިއްޙަތު ޖަމިއްޔާއިން ވަނީ ބުނެފައެވެ.

މިކެމްޕޭން ހުއްޓާލިއިރު، މިއަދު ފެށުމަށް ހަމަޖެހިފައިވާ މިކެމްޕޭނުގެ ފަހު މަރުހަލާގެ އަމާޒަކީ ޣައްޒާގެ  119،000 އަށް ވުރެ ގިނަ ކުދިންނަށް ވެކްސިން ދިނުމެވެ.

ޣައްޒާގެ މިހާރުގެ ހާލަތު އޮތް ގޮތުން ޞިއްޙީ އޮފިޝަލުންނަށް ވެކްސިން ދިނުމުގައި ރައްކާތެރިކަމާއި އެކު ހަރަކާތްތެރި ނުވެވޭނެ ކަމަށް އދ.އިން ވަނީ ބުނެފައެވެ. އަދި ޞިއްޙީ ޚިދުމަތްދޭ ތަންތަންވެސް ހަމަލާތަކުން ސަލާމަތްް ވެފައިނުވާއިރު އެކެމްޕޭނު ކުރިއަށް ގެންދެވޭ ގޮތް ވަނީ ނުވެފައެވެ.

އދ. އިން ހަނގުރާމަ ހުއްޓާލުމަށް ގޮވާލާ ގޮވާލުން ދަނީ ތަކުރާރު ކުރަމުންދާކަން ފާހަގަކޮށްލަން ޖެހެއެވެ.