މިސަރުކާރުން އިސްކަންދެނީ ދުރުހިސާބުތަކަށް ފަތުރުވެރިކަން ގެންދަން: ވަޒީރު ފައިސަލް

މިސަރުކާރުން އިސްކަންދެނީ ފަތުރުވެރިކަން ނެތް ދުރުހިސާބުތަކަށް ފަތުރުވެރިކަން ގެންދަންކަމަށް ފަތުރުވެރިކަމާ ބެހޭ ވަޒީރު އިބްރާހިމް ފައިސަލް ވިދާޅުވެއްޖެއެވެ. 

ވަޒީރު ފައިސަލް މިހެން ވިދާޅުވީ މިއަދު ރައްޔިތުންގެ މަޖިލީހުގެ ޖަލްސާއަށް ވަޑައިގެން އެމަޖިލީހުގެ މެމްބަރުންގެ ސުވާލުތަކަށް ޖަވާބުދެއްވަމުންނެވެ.

އެގޮތުން ތ. އަތޮޅުގައި ޓޫރިޒަމް ނެތުމަކީ ރައްޔިތުންގެ ކަންބޮޑުވުމެއް ކަން ފާހަގަކުރައްވައި ތިމަރަފުށީ ދާއިރާގެ މެންބަރު އަޙުމަދު ރިޔާޒް ދެއްކެވި ވާހަކަފުޅަށް ޖަވާބު ދެއްވަމުން ވަޒީރު ފައިސަލް ވިދާޅުވީ މިހާތަނަށް ޓޫރިޒަމް ފުޅާ ވެފައި އޮތީ މާލެ ކައިރި އަތޮޅުތަކުގައި އެކަނި ކަމަށެވެ.

މީގެއިތުރުން ރާއްޖޭގައި އެންމެ ބޮޑަށް ފަތުރުވެރިކަން ފުޅާވެ ތަރައްޤީ ވެފައިވަނީ މާލެ އަތޮޅާއި ރ. އަތޮޅާއި ބ. އަތޮޅާއި ވ. އަތޮޅާއި، އއ. އަތޮޅާއި އދ. އަތޮޅުގައި ކަމަށް ވަޒީރު ފައިސަލް ފާހަގަކުރެއްވެވިއެވެ.

ވަޒީރު ފައިސަލްގެ ވާހަކަފުޅުގައި އިތުރަށް ވިދާޅުވެފައިވަނީ ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ ސަރުކާރުން ފަތުރުވެރިކަމުގެ ސިނާއަތުގެ އިންވެސްޓްމަންޓްތައް ކުރުމުގައި އެންމެބޮޑު އިސްކަމެއްދޭނީ ދުރު ހިސާބު އަތޮޅުތަކުގެ ރަށްތަކަށް ކަމަށެވެ.

ވަޒީރު ފައިސަލް ވިދާޅުވީ ރާއްޖޭގެ ދުރު ހިސާބުތަކުގައި ރިސޯޓް ތަރައްޤީކުރުމަށް ބޭނުންވާ އިންވެސްޓްމަންޓްތައް ހޯދުމަށް ސަރުކާރުން މަސައްކަތްކުރަމުންދާކަމަށެވެ. މިގޮތުން އިންވެސްޓަރުން ހޯދުމަށް ކުރިއަށްއޮތް އަހަރު އެކިއެކި ޤައުމުތަކުގައި އިންވެސްޓްމަންޓް ފޯރަމްތައް ބޭއްވުމަށް ނިންމާފައިވާކަމަށް އޭނާ ވިދާޅުވިއެވެ. 

ފަތުރުވެރިކަމާ ބެހޭ ވަޒީރު ފައިސަލް އިތުރަށް ވިދާޅުވީ ރައީސްގެ އެ ވަޢުދުފުޅު ފުއްދުމަށްޓަކައި ފަތުރުވެރިކަން ނެތް ތަންތަނަށް އިންވެސްޓަރުން ހޯދުމަށް ތައިލެންޑް، ސިންގަޕޫރު، ދުބާއީ އަދި އިންޑިއާގައި އަންނަ އަހަރުގެ ކުރީކޮޅު އިންވެސްޓަރުންނަށް ހާއްސަކޮށް ފޯރަމްތަކެއް ބޭއްވުމަށް ނިންމާފައިވާކަމަށެވެ.

މިގޮތުން އަންނަ އަހަރުގެ ފުރަތަމަ އަދި ދެވަނަ ކުއާޓަރުގައި މި ފޯރަމްތައް ބޭއްވިގެންދާނޭކަމަށް ވެސް އޭނާ ވިދާޅުވިއެވެ.

ފައިސަލް އިތުރަށް ވިދާޅުވީ ހދ.ހަނިމާދޫގައި ތަރައްޤީކުރަމުންދާ އެއާޕޯޓްގެ މަސައްކަތް ނިމެންވާއިރަށް އެ ސަރަހައްދުގެ ޓޫރިޒަމް ކެޕޭސިޓީ 4،000 ބެޑަށް ފުޅާކުރުމަކީ ސަރުކާރުގެ އަމާޒުކަމަށެވެ.

ރާއްޖޭގައި ރިސޯޓް ހެދުމަށް ދޫކޮށްފައިވާ ރަށްތަކުގެ ތެރެއިން މިހާތަނަށް 58 ރަށެއް ތަރައްޤީ ނުކުރެވި އޮތްކަން ފާހަގަކުރައްވަމުން ފައިސަލް ވިދާޅުވީ، މީގެ ތެރެއިން ގިނަ ރަށްތައް ހުރީ ހދ އަތޮޅުގައި ކަމަށެވެ.