2025 ގެ ބަޖެޓް ހުށައަޅާއިރު ރައީސްގެ މުސާރައިން 50 ޕަސެންޓް ނުނަންގަވާގޮތަށް ނިންމަވައިފި!

ކުރިއަށް އޮތް 2025ގެ ބަޖެޓް ހުށައަޅާއިރު ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ މުސާރައިގެ 50 ޕަސެންޓު ނުނެންގެވުމަށް އެމަނިކުފާނު ނިންމަވައިފިއެވެ.

ރައީސް މުޢިއްޒު މިގޮތަށް ނިންމަވައި އެކަން ހިއްސާ ކުރައްވައިފައިވަނީ އެކްސްގައި ކުރެއްވެވި ޕޯސްޓެއްގައެވެ.

އެގޮތުން އެމަނިކުފާނު ވިދާޅުވީ 2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި ގިނަ ފިޔަވަޅުތަކެއް އެޅުމަށް ވާނީ ނިންމާފައި ކަމަށެވެ.

މިގޮތުން މުސާރައާއި ގުޅޭ ގޮތުން އެޅުމަށް ނިންމާފައިވާ ފިޔަވަޅުތައް 2 އަހަރު ދުވަހުގެ މުއްދަތަށް އެޅުމަށްވާނީ ނިންމާފައި ކަމަށްވެސް އެމަނިކުފާނު ވިދާޅުވިއެވެ.

އެފިޔަވަޅު ތަކަކަކީ:-

1. ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން %10 އުނިކުރުން.
2. ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން %10 އުނިކުރުން.
3. ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން.
4. މިނިވަން މުައައްސަސާތަކުގެ އިސްވެރިންގެ މުސާރައިން %10 އުނިކުރުމަށް ކަމާބެހޭ ފަރާތްތަކަށް ހުށަހެޅުން.
5. ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން %10 އުނިކުރުމަށް އެ ފަރާތްތަކުގައި އެދުން. މި ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާކުރައްވާނެ ކަމަށް ރައީސް މުޢިއްޒު ވިދާޅުވިއެވެ.  

މީގެ އިތުރުން އަޅުގަނޑުގެ މުސާރައިގެ %50 ނުނަގާ ގޮތަށް ހަމަޖައްސަން ދެންނެވިން

ރައީސް ޑރ މުޢިއްޒު ވިދާޅުވިއެވެ.

މިއީ ރާއްޖޭގެ ރައީސެއްގެ މުސާރައިން މިހާ ބޮޑު ބައެއް އުނިކުރުމަށް ރައީސަކު ނިންމެވި ފުރަތަމަ ފަހަރެވެ.