ޖަބަލިއްޔާގައި ހަރަކާތްތެރިވަމުންދިޔަ ސިވިލް ޑިފެންސް ޓީމަކަށް އަމާޒުކޮށް އިޒްރާއިލުން ހަމަލާދީފި!

ފަލަސްޠިނުގެ ޣައްޒާގެ ޖަބަލިއްޔާގައި ހަރަކާތްތެރިވަމުން ދިޔަ ސިވިލް ޑިފެންސް ޓީމަކަށް އަމާޒުކޮށް އިޒްރާއިލުން ހަމަލާދީފިއެވެ.

އަލްޖަޒީރާގައި ބުނެފައިވަނީ ޣައްޒާގެ އުތުރުގެ ޖަބަލިއްޔާގެ އަލް ފަޚޫރާ ސަރަހައްދުގައި ހުރި ގެއަކަށް ބޮންއަޅައި ދިން ހަމަލާއެއްގެ ސަބަބުން ޒަޚަމްވި މީހުން އަވަސްފަރުވާއަށް ގެންދިޔުމަށް ހަރަކާތްތެރިވި ސިވިލް ޑިފެންސްގެ ޓީމުގެ މެމްބަރުންނަށް އަމާޒުކޮށް ބަޑީގެ ހަމަލާތައް ދޭ މަންޒަރު  ފެންނަ ވީޑިއޯއެއް ޣައްޒާގެ ފސިވިލް ޑިފެންސް އިން އާންމުކޮށްފައި ވާކަމަށެވެ. 

 ޓެލެގްރާމްގައި ހިއްސާކުރި އެ ވީޑިއޯއިން ފެންނަ ގޮތުގައި ކުއްލި ޙާލަތުގައި ހަރަކާތްތެރިވާ ސިވިލް ޑިފެންސްގެ ޓީމުގެ މީހުން ރޭގަނޑުގެ ވަގުތުގައި އިމާރާތެއް ވެއްޓި ހަލާކުވެފައިހުރި ގައުތަކުގެ ތެރެއިން، މީހުން ހޯދުމުގެ މަސައްކަތް ކުރަމުންދިޔައިރު، އިޒްރާއިލުގެ ސިފައިން ޖަހަމުންދިޔަ ވަޒަންތައް އަމާޒުކުރަމުންދިޔައެވެ.

އަދި އޭގެ އަނެއްދުވަހުގެ ހެނދުނު ސިވިލް ޑިފެންސްގެ  އުޅަނދުތަކުގައި ވަޒަން އަރައިފައވާ ލޯވަޅުތައް ފެންނަން ހުރިއިރު، އެއުޅަނދުތަކުގެ ތެރޭގައ އަލިފާން ނިއްވުމަށް ބޭނުންކުރާ ފަޔާ ޓްރަކެއް ވެސް ހިމެނެ އެވެ.

 މިއަދުގެ ހެނދުނުގެ ވަގުތެއްގައި ވެސް ސިވިލް ޑިފެންސް ޓީމަށް ވަނީ ބައިތް ލާހިޔާގައި އަނިޔާވި ބަޔަކަށް ފަރުވާ ދިނުމަށް ފެށި ދަތުރެއް ނުކުރެވި ކެންސަލް ކުރަންޖެހިފައިވެއެވެ. 

އެފަހަރުވެސް ސިވިލް ޑިފެންސްގެ މިޝަން “އެބޯޓް” ކުރަން ޖެހުނީ އިޒްރާއީލުގެ ސިފައިން އެމީހުންނަށް އަމާޒުކޮށް ބަޑިޖަހާފައިވާތީއެވެ.