ބޭރުގައި ކިޔަވާކުދިންގެ ބީއެމްއެލް އެކައުންޓުގެ ޑެބިޓް އަދި ކްރެޑިޓް ކާޑުގެ ލިމިޓު އެބޭންކުން ބޮޑުކޮށްފި!

ރާއްޖެއިން ބޭރުގައި ކިޔަވާ ދިވެހި ކިޔަވާކުދިންގެ ބޭންކް އޮފް މޯލްޑިވްސްގެ އެކައުންޓްގެ ޑެބިޓް އަދި ކްރެޑިޓް ކާޑުގެ ލިމިޓް 750 އެމެރިކާ ޑޮލަރުން، 1200 އެމެރިކާ ޑޮލަރަށް ބޮޑުކުރުމަށް ވަޒީރުންގެ މަޖިލީހުގެ ލަފާފުޅާއި އެކު ރައީސުލްޖުމްހޫރިއްޔާ ޑރ މުޙައްމަދު މުޢިއްޒު ނިންމެވި ނިންމެވުމާއި އެއްގޮތައް ބީއެމްއެލް އިން އެބޭންކުން ބޮޑުކޮށްފިއެވެ.

ބީއެމްއެލް އިން ވަނީ މިއަދު އެކަން އިޢުލާނުކޮށްފައެވެ. އެގޮތުން އެބޭންކުން ބުނެފައިވަނީ ރާއްޖެއިން ބޭރުގައި ތިބި ދަރިވަރުންނަށް ޑެބިޓް ކާޑުގެ  ލިމިޓް، 1 ނޮވެންބަރު 2024 ފެށިގެން، 1200 އެމެރިކާ ޑޮަލަރަށް ބޮޑުކޮށްފައިވާކަމަށެވެ. 

ރައީސް ޑރ މުޢިއްޒު ރާއްޖެއިން ބޭރުގައި ކިޔަވާ ކުދިންގެ ކާޑު ލިމިޓް ބޮޑު ކުރުމަށް ނިންމެވީ މިދިޔަ އަހަރުގެ ޑިސެމްބަރު މަހުގެ 24 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައެވެ. އެގޮތަށް ރައީސް މުޢިއްޒު ނިންމެވީ އެދުވަހު ބޭއްވި ވަޒީރުންގެ މަޖިލީހުގެ ބައްދަލުވުމުގައި މާލީ ވުޒާރާއިން ހުށަހެޅުއްވި ކަރުދާހުގެ މައްޗަށް މަޝްވަރާ ކުރެއްވުމަށް ފަހުއެވެ.

އެގޮތުން، ބީއެމްއެލްގެ ޑެބިޓް އަދި ކްރެޑިޓް ކާޑުގެ ލިމިޓު މަތިކުރުމަށް ބޭނުންވާ ބޭރު ފައިސާ ހޯދައި، އެމްއެމްއޭގެ އިންޓަވެންޝަން ސިޔާސަތުގެ ތެރެއިން ބީއެމްއެލްއަށް ބޭރު ފައިސާ ފޯރުކޮށްދީގެން ބީއެމްއެލްއަށް މިކަން ތަންފީޒުކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމާ ގުޅޭގޮތުން މަޝްވަރާކުރައްވާފައިވާ ކަމަށް ރައީސް އޮފީހުން ބުނެއެވެ.