އިޒްރާއިލް ސިފައިން ހިޞާރުކޮށްފައިވާ ޖަބަލިއްޔާ ސަރަހައްދުން ފާއިތުވި 19 ދުވަހު 770 މީހަކު ޝަހީދުކޮށްލައިފި!

އިޒްރާއިލް ސިފައިން ހަތިޔާރާއި އެކު ވަށާލައި ހިޞާރުކޮށްފައިވާ ޖަބަލިއްޔާގެ ސަރަހައްދުން ފާއިތުވި 19 ދުވަހުގެ ތެރޭގައި 770 މީހަކު ޝަހީދުކޮށްލައިފައިވާ ކަމަށް އަލްޖަޒީރާގައި ރިޕޯޓުކޮށްފިއެވެ.

ޣައްޒާގެ އުތުރު ފަރާތުގައި އޮންނަ ޖަބަލއިްޔާއަށް އިޒްރާއީލުން ހުއްޓުމެއް ނެތި ދެމުންދާ ޢަސްކަރީ ހަމަލާތަކަށް ފަހު 770 އަށް ވުރެ ގިނަ ފަލަސްތީނު މީހުން ޝަހީދު ވެފައިވާއިރު 1،000 އަށް ވުރެ ގިނަ މީހުން ވަނީ  ޒަޚަމްވެފައެވެ. 

 ފަލަސްޠީނުގެ ދައުލަތުގެ މީޑިއާއިން ނެރުނު ބަޔާނެއްގައި ބުނެފައި ވަނީ އަންހެނުން ހިމެނޭ ގޮތަށް 200 އަށް ވުރެ ގިނަ އާންމުން "ރަހީނުކޮށްފައިވާ" ކަމަށެވެ. އަދި ކެނޑިފައިވާ މުވާޞަލާތީ ޚިދުމަތުގެ ސަބަބުން ގިނަ ޢަދަދެއްގެ ބަޔަކު ވީނުވީއެއް ނޭނގި ގެއްލިފައިވާ ކަމަށްވެސް އެބަޔާނުގައި ބުނެފައިވެއެވެ. 

 ޣައްޒާގެ އުތުރު ސަރަހައްދުތަކުގައި ޒަޚަމްވެފައިވާ އަދި ބަލިމަދުކަމުގެ ސަބަބުން ބޭސްފަރުވާއަށް ބޭނުންވާ 100،000 އަށް ވުރެ ގިނަ މީހުންން އެބަތިބިކަމަށް އަލްޖަޒީރާގައި ބުނެފައިވެއެވެ. 

 އިޒްރާއީލުގެ އަސްކަރިއްޔާއިން އެ ސަރަހައްދުގެ ޞިއްޚީ ނިޒާމަށް އެތައް ގެއްލުންތަކެއް ދީފައިވާއިރު ހަތަރު ހޮސްޕިޓަލް ވަނީ ހަލާކުކޮށްލައިފައެވެ. އެކަމުގެ ސަބަބުން ފަރުވާއަށް ބޭނުންވާ ފަރާތްތަކަށް ވަނީ ފަރުވާނުދެވިފައެވެ. 

އިޒްރާއިލް ސިފައިން ޣައްޒާގެ އުތުރަށް ދެމުންދާ ހަމަލާތަކުގައި ޣައްޒާގެ ޕޮލިސް ޗީފް މާޒިން އަލް ކަހްލޫތް ވަނީ ޝަހީދުކޮށްލައިފައެވެ. މާޒިން ޝަހީދު ކޮށްލައިފައިވަނީ ޖަބަލިއްޔާ ރެފިއުޖީ ކޭމްޕްގައި ހުންނަ އަލް ޔަމާން އަލް ސައީދު ހޮސްޕިޓަލް ކައިރީގައި ހުއްޓައި އިޒްރާއީލުގެ ި ސިފައިން ދިން ޑްރޯން ހަމަލާއެއްގައެވެ.