108 ކޮކެއިން ބުލެޓް ރާއްޖެއަށް އެތެރެކުރި މީހަކަށް 12 އަހަރުގެ ޖަލު ޙުކުމެއް އިއްވައިފި!

ދިރުވާލައިގެން 108 ކޮކެއިން ބުލެޓް ރާއްޖެއަށް އެތެރެކުރި މީހަކަށް 12 އަހަރުގެ ޖަލު ޙުކުމެއް ކްރިމިނަލް ކޯޓުން އިއްވައިފިއެވެ.

ކްރިމިނަލް ކޯޓުން 12 އަހަރުގެ ޖަލު ޙުކުމް އިއްވައިފައިވަނީ ގާނާ އަށް ނިސްބަތްވާ މީހެއް ކަމަށްވާ އައްޕިއަހް ޖޭމްސް ގެ މައްޗަށެވެ.

ކްރިމިނަލް ކޯޓުގެ ޙުކުމުގައި ބުނެފައިވަނީ އެމީހާ ޤަތަރު އެއާވޭސްގެ ފްލައިޓަކުން ޖޫން 12 ގައި ރާއްޖެ އައުމުން އޭނާ ހައްޔަރުކުރީ ކަސްޓަމު އޮފިސަރުންނަށް ޝައްކު ކުރެވޭ ކަންތައްތަކެއް ފާހަގަ ކުރެވިގެން ކަމަށެވެ. އަަދި ޝައްކު ކުރެވި ސްކޭން ކުރިއިރު ދިރުވާލައިގެން މަސްތުވާތަކެތި އެތެރެ ކޮށްފައިވާ ކަމަށް ޝައްކު ކުރެވިގެން، އައިޖީއެމްއެޗްއަށް ގޮސް ހެދި އިތުރު ސްކޭންތަކަށްފަހުގައި ކަމަށްެވެސް އެޙުކުމްގެ ޚުލާސާ ރިޕޯޓުގައި ވަނީ ބުނެފައެވެ. 

އެއަށްފަހު އޭނާ ފުލުހުންގެ ބެލުމުގެ ދަށުގައި ހުރިއިރު، އެކި ފަހަރުމަތިން ބޮޑުކަމުދިޔަ ތަކެތިން 108 ބުލެޓުގެ ބަރުދަނުގައި 1461.9389 ގްރާމް ގެ ކޮކެއިން ހުރި ކަމަށް ތަހުލީލު ރިޕޯޓްތަކުން ދެއްކިކަމަށް ވެސް ކްރިމިނަލް ކޯޓުގެ ޙުކުމްގައި ވަނީ ބުނެފައެވެ.

ދައުލަތުގެ ފަރާތުން އޭނާގެ މައްޗަށް ކުރި ދައުވާއަށް އޭނާ އިޢްތިރާފުވުމުން، ދައުލަތާ އެކު އޭނާ ވަނީ އިޢްތިރާފްގެ އެއްބަސްވުމެއް ހަދައިފަ އެވެ.

އިޢްތިރާފް އެއްބަސްވުމުގެ ދަށުން އޭނާގެ މައްޗަށް އަދަބެއްގެ ގޮތުގައި 12 އަހަރާއި ހަ މަސް ދުވަހުގެ ޖަލު ހުކުމަކާއި އެކު ޖޫރިމަނާގެ ގޮތުގައި 100،000ރ. އިން ދެއްކުމަށް ވަނީ ކަނޑައަޅާފައެވެ.

އެއާއިއެކު، ކްރިމިނަލް ކޯޓުން ވަނީ، އޭނާ ތަހުޤީޤުގެ މުއްދަތަށް ބަންދުގައި ހުރި ހަތަރު މަހާއި 10 ދުވަސް އުނި ކުރުމަށްފަހު އޭނާގެ މައްޗަށް އިއްވީ 12 އަހަރާއި އެއް މަހާއި 20 ދުވަހުގެ ޖަލު ޙުކުމެއް އިއްވާފައެވެ.

ހަމައެއާއިއެކު، ޖޫރިމަނާގެ ފައިސާ 1 އަހަރުގެ ތެރޭގައި ދެއްކުމަށް ވެސް އޭނާގެ މައްޗަށް ކްރިމިނަލް ކޯޓުން ވަނީ އަމުރުކޮށްފައެވެ.