ދަރުމަވަންތަ ހޮސްޕިޓަލާއި އިން ވެގެން އޮންނަ ހުސްބިމުގައި ކެންސަރު ހޮސްޕިޓަލް އަޅަނީ!

ދަރުމަވަންތަ ހޮސްޕިޓަލާއި އިން ވެގެން އޮންނަ ހުސްބިމުގައި 25 ބުރީގެ ކެންސަރު ހޮސްޕިޓަލެއް އެޅުމަށް ނިންމައިފިއެވެ.

މިކަން ހާމަކޮށްފައިވަނީ މާލޭ ސަރަހައްދުގައި ހިމެނޭ ހުރިހާ ހޮސްޕިޓަލަކުން ދޭ ޚިދުމަތް ރަނގަޅު ކުރުމަށް ކުރަމުންދާ މަސައްކަތާއި ނިމިފައިވާ މަސައްކަތް ހާމަކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް އެވެ. 

ޢަބްދުއްރައްޒާޤް ވިދާޅުވީ ދަރުމަވަންތަ ހޮސްޕިޓަލާއި އިންވެގެން އޮންނަ ހުސްބިމުގައި އަޅާ މި ކެންސަރު ހޮސްޕިޓަލުން އިތުރު ދާއިރާތަކުގެ ގިނަ ޚިދުމަތްތައް ވެސް ލިބޭނެ ކަމަށެވެ.

ކެންސަރު ހޮސްޕިޓަލް އަޅާނީ އައިޖީއެމް ހޮސްޕިޓަލް ބިމުގައި މިހާރު ޕާކިން އޭރިއާ އޮތް ހުސް ބިމުގައި. އެއީ 25 ބުރީގެ އިމާރާތެއް

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހިމް އަބްދުއްރައްޒާޤް ޙަލީމް ވިދާޅުވިއެވެ.

އިތުރަށް އިބްރާހިމް ޢަބްދުއްރައްޒާޤް ވިދާޅުވެފައިވަނީ، އެ މަސައްކަތުގެ ފުރަތަމަ މަރުހަލާގައި ހަދާ ޑިޒައިނާއި ކޮންސެޕްޓްގެ މަސައްކަތް މިހާރު ވަނީ ނިމިފައި ކަމަށެވެ. އަދި އަންނަ އަހަރަށް ކަނޑައަޅާ ބަޖެޓުގައި އޭގެ ތަފްޞީލީ ކުރެހުންތަކާއި ކޮންޓްރެކްޓް ހަދަން ކުރަންޖެހޭ މަސައްކަތްތައް ކުރުމަށް ހަމަޖެހިފައިވާ ކަމަށެވެ. 

މީގއިތުރުން ހޮސްޕިޓަލްގެ އެނދުގެ ޢަދަދާއި ޚިދުމަތްތަކުގެ ތަފްސީލްތައް ހިއްސާކުރާނީ ތަފްޞީލީ ކުރެހުންތަކަށްފަހު ކަމަށްވެސް ޢަބްދުއްރައްޒާޤް ވިދާޅުވިއެވެ. 

ކެންސަރަށް ޚާއްސަ ހޮސްޕިޓަލެއް ރާއްޖޭގައި ޤާއިމުކުރަން ނިންމީ، އެ ބަލީގެ ބަލިމީހުން ގިނަވެ އެބައްޔަށް ހޯދަން ޖެހޭ ޚިދުމަތްތައް ރާއްޖެއިން ބޭރުން ހޯދުމަށް މިހާރު ވެސް ރައްޔިތުންނާ ސަރުކާރުން ބޮޑު ހޭދައެއް ކުރަމުންދާތީއެވެ. ސަރުކާރުގެ އަމާޒަކީ ކެންސަރު ހޮސްޕިޓަލްގެ މަސައްކަތް ނިންމާ މި ދައުރު ތެރޭގައި ޚިދުމަތައް ގެނައުމެވެ.

އޭނާ އިތުރަށް ވިދާޅުވެފައިވަނީ އާބާދީ އިތުރުވި މިންވަރަށް މާލޭ ސަރަހައްދުގައި، ޞިއްޙީ ޚިދުމަތްތަކާ އެނދުގެ އަދަދު އިތުރުކުރެވިފައި ނެތް ކަމަށެވެ. 

އެހެންކަމުން މާލޭ ސަރަޙައްދުގައި ޞިއްޙީ ޚިދުމަތްތައް ފުޅާކުރުމުގައި މިވަގުތު އެންމެ ބޮޑު އަމާޒެއް އޮތީ އެނދު އިތުރުކުރުމަށް ކަަމަށްވެސް ޢަބްދުއްރައްޒާޤް ވިދާޅުވިއެވެ. އަދި ޞިއްޙީ ދާއިރާ އިތުރަށް ފުޅާ ކުރުމަށް ކުރަންޖެހޭ ކަންތައްތައް ހަރުދަނާ ކުރުން ކަމަށް ސަރުކާރުން ނިންމާފައިވާ ކަމަށް އިބްރާހިމް ޢަބްދުއްރައްޒާޤު ހަލީމް ވިދާޅުވިއެވެ.

މާލޭ ސަރަޙައްދުގެ އާބާދީ ދިވެހީންނާއި ބިދޭސީން ހިމެނޭހެން 212،000 އިން މައްޗަށް އަރައެވެ. އެހެންކަމުން މިދިޔަ އެއް އަހަރު އެންމެ ބޮޑު އިސްކަމެއް ދީފައިވަނީ އެނދުގެ އަދަދު އިތުރުކުރުމަށް ކަމަށް ޙަލީމް ވިދާޅުވިއެވެ. 

އަދި ވޯޑާއި އިމަޖެންސީ ރޫމާއި އެހެން ބައެއް ޚިދުމަތްތައް ހިމެނޭހެން މި އަހަރު ނިމުމުގެ ކުރިން އިތުރު 172 އެނދު ޚިދުމަތަށް ގެނެވޭނެކަމަށް ވަނީ ބުނެފައެވެ.