މެޑިކަލް ކުނި މެނޭޖް ކުރާ ފެސިލިޓީއެއް ފުރަތަމަ ފަހަރަށް ރާއްޖޭގެ ރަށެއްގައި ގާއިމްކޮށްފި!

މެޑިކަލް ކުނި މެނޭޖް ކުރާ ފެސިލިޓީއެއް ފުރަތަމަ ފަހަރަށް ހއ.ބާރަށުގައި ގާއިމްކޮށްފިއެވެ. 

މި ފެސިލިޓީ ހއ.ބާރަށުގައި ގާއިމްކޮށް އެތަން ވަނީ މިއަދު ޞިއްޙީ ވުޒާރާއާ ހަވާލުކޮށްފައެވެ. 

އެ ފެސިލިޓީ އަދި ނެޝަނަލް ހެލްތު ލެބޯރެޓަރީގެ މަސައްކަތް ހަރުދަނާ ކުރުމަށް ހެވީމެޓަލްސް ޓެސްޓު ކުރެވޭ އައިސީޕީ އެމްއެސް މެޝިން ޞިއްޙީ ވުޒާރާއާ ހަވާލު ކުރުމަށް އެއްބަސްވުމުގައި މިއަދު ސޮއިކޮށްފައިވާއިރު، މޫސުމަށް އަންނަ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޠާރިޤް އިބްރާހިމެވެ. އަދި ޞިއްޙީ ވުޒާރާގެ ފަރާތުން ސޮއިކުރެއްވީ ވަޒީރު ޢަބްދުﷲ ނާޒިމް އިބްރާހިމެވެ.

މިއީ ގްލޯބަލް އެންވަޔަރަންމަންޓް ފެސިލިޓީ (ޖީއީއެފް) ގެ މާލީ އެހީއާއި ޔުނައިޓަޑްނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގެ އެހީތެރިކަމާއެކު، މޫސުމަށް އަންނަ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއިން ކުރިއަށްގެންދާ "އެލިމިނޭޓިންގ ޕާސިސްޓަންޓް އޯގަނިކް ޕޮލިއުޓަންޓްސް ތްރޫ ސައުންޑް މެނޭޖްމަންޓް އޮފް ކެމިކަލްސް" (ޕޮޕްސް) މަޝްރޫއުގެ ދަށުން ކުރެވޭ މަސައްކަތެކެވެ.

ތިމާވެށްޓާ ބެހޭ ވުޒާރާއިން ބުނެފައިވަނީ، މި އެއްބަސްވުމުގެ ދަށުން ހަވާލުކުރެވުނު ފެސިލިޓީގައި ޞިއްޙީ ދާއިރާއިން އުފެދޭ ކުނި ހަރުދަނާ އުސޫލުތަކާ އެއްގޮތަށް މެނޭޖުކުރުމަށް ރަށު ފެންވަރުގައި ނައްތާލުމަށް އެންމެ ރަނގަޅު ޓެކްނޮލޮޖީ އަދި ތިމާވެށްޓާ ރައްޓެހި އުސޫލުތައް ތަޢާރަފު ކުރެވޭނެ ކަމަށެވެ. އަދި ނޭދެވޭ ގޮތުގައި ކުނި ނައްތާލުމުން ޖައްވަށް ބޭރުވާ ވިހަ މާއްދާތައް މަދުކުރެވޭނެ ކަމަށްވެސް ވިދާޅުވިއެވެ.

އެ ވުޒާރާއިން އިތުރަށް ބުނެފައިވަނީ، މިކަމުގެ ސަބަބުން ވެއްޓަށާއި ބާރަށުގައި ދިރިއުޅޭ ރައްޔިތުންގެ ޞިއްޙަތަށް ކުރިމަތިވެދާނެ ނޭދެވޭ އަސަރުތަކުން ރައްޔިތުންރައްކާތެރި ކުރެވޭނެ ކަމަށްވެސް ވިދާޅުވިއެވެ.

މި ފަހުމުނާމާގެ ދަށުން ފޯރުކޮށްދީފައިވާ އައިސީޕީ އެމްއެސް އަކީ ފެން، ފަސްގަނޑު ސެޑިމެންޓްސް އަދި އިންސާނުންގެ ލޭގައި ވެސް ހެވީ މެޓަލްސް) މަރކުއިރީ،ކެޑްމިއަމް، ލެޑް) ފަދަ ހެވީ މެޓަލްސް މާއްދާ ހުންނަ މިންވަރު ދެނެގަނެވޭނެއެވެ.

މި އެއްބަސްވުމުގެ ދަށުން ތިމާވެށްޓާ ބެހޭ ވުޒާރާގެ ފަރާތުން މި މެޝިނަށް ބޭނުންވާ ކެމިކަލް ރިއެޖެންޓްތައް ނެޝަނަލް ހެލްތު ލެބޯރެޓަރީއަށް މި އަހަރު ނިމުމުގެ ކުރިން ފޯރުކޮށްދިނުމަށް ވަނީ ހަމަޖެހިފައެވެ.

ޕޮޕްސް މަޝްރޫއުގެ ދަށުން ކުރަމުންދާ މަސައްކަތްތަކުގެ ތެރޭގައި ހއ. ބާރަށު ޞިއްޙީ މަރުކަޒުގައި ގާއިމުކޮށްފައިވާ މެޑިކަލް ކުނި މެނޭޖްކުރުމުގެ ފެސިލިޓީގެ އިތުރުން، ނުރައްކާތެރި ކެމިކަލް ހިމެނޭ ކުނި ސްޓޯރ ކުރުމަށް އައްޑޫ ސިޓީގައި އިންޓެރިމް ހަޒަރޑަސް ކެމިކަލް ވޭސްޓް ސްޓޯރޭޖް ފެސިލިޓީއަކާއި ރ. ވަންދޫގައި ހަޒަރޑަސް ކެމިކަލް އެންޑް ވޭސްޓް މެނޭޖްމަންޓް ސިސްޓަމްއެއް ގާއިމްކުރުން ހިމެނެއެވެ.