އަނބިމީހާއަކީ ފުދުންތެރި މުއްސަންޖަކަސް ފިރިމީހާ އަނބިމީހާ އަށާއި އެދެމީހުންގެ ދަރިންނަށް ޚަރަދު ދޭންޖެހޭ!

އަނބިމީހާ އަކީ ފުދުންތެރި މުއްސަންޖަކަސް ފިރިމީހާ އަނބިމީހާ އަށާއި އެދެމީހުންގެ ދަރިންނަށް ޚަރަދު ދޭންޖެހޭ ކަމަށް މިއަދުގެ ހުކުރު ޚުޠުބާގައި ބުނެފިއެވެ. 

“އަނބިދަރީންނަށް ޚަރަދުކުރުން” މިމައުޟޫއަށް އިއްވި މިއަދުގެ ހުކުރު ޚުޠުބާގައި ބުނެފައިވަނީ އަންހެނުންގެ ތެރޭގައި ހިމެނޭ ޝަރަފުވެރި އެއް ބަޔަކީ އަނބިމީހާކަމަށެވެ. ޒަވާޖީ ޙަޔާތުގެ ބައިވެރިޔަކީ އެއީ ކަމަށާއި، މާތް الله ވަނީ އޭނާއަށް ނަފަޤާތު ދިނުމަށާއި ބޯހިޔާވަހިކަން ތަނަވަސްކޮށްދިނުމަށް ފިރިމީހާގެ މައްޗަށް އަމުރުކުރައްވައިފައި ކަމަށް މިއަދުގެ ޚުޠުބާގައި ބުނެފައިވެއެވެ.

“ނަބިއްޔާ ޞައްލަﷲ ޢަލައިހި ވަސައްލަމް ތަފާތު މުނާސަބަތުތަކުގައި ތަފާތު ތަންތާނގައި އަނބިމީހާއަށް ހެޔޮކޮށް ހިތުމަށް ފަށްފަށުން ގޮވައިލައްވައިފައި ވޭ” ހުކުރު ޚުޠުބާގައި ބުނެފައިވެއެވެ. 

މީގެއިތުރުން ނަބިއްޔާ ޞައްލައްﷲ ޢަލައިހި ވަސައްލަމް ދުނިޔެ ދޫކުރެއްވެވި އާލާސްކަންފުުޅުގައި އޮންނަވައިގެންވެސް އަންހެނުންނަށް ހެޔޮކޮށް ހިތުމަށް ވަޞިއްޔަތް ކުރައްވައިފައިވެއެވެ.

އިސްލާމީ ޝަރީޢަތުގައި ކަނޑައަޅުއްވައިފައިވާ ގޮތުން، ފިރިމީހާ އޭނާގެ އަނބިމީހާއަށް އަދި ބައްޕަ އޭނާގެ ދަރީންނަށް ޚަރަދުކުރުމަކީ، އޭނާގެ މައްޗަށް މާތް الله ވާޖިބުކުރައްވައިފައިވާ ކަމެއްކަމަށް މިއަދުގެ ޚުޠުބާގައި ބުނެފައިވެއެވެ. 

“ތިބާގެ އަނބިމީހާ ފުދުންތެރިއަކަށް ނުވަތަ މުއްސަންޖަކަށް ވިޔަސް ތިބާ އޭނާއަށާއި ދަރީންނަށް ޚަރަދުކުރާންޖެހޭނެ، އެ މީހުންނަށް ކެއިންބުއިމާއި އަންނައުނާއި ބޯހިޔާވަހިކަން ތަނަވަސްކޮށްދޭން ޖެހޭނެ، މިއީ ފިރިމީހާގެ މައްޗަށް ވާޖިބުވެގެންވާކަމެއް” ހުކުރު ޚުތުބާގައި ބުނެފައިވެއެވެ. 

ތިބާގެ އަނބިދަރީންނަށް ރިޒުޤު ތަނަވަސްކޮށްދިނުމަށް ޓަކައި މަސައްކަތްކުރުމަކީ اللهގެ މަގުގައި ޖިހާދުކުރުން ފަދަ ސަވާބު މަތިވެރި ކަމެއްކަމަށް މިއަދުގެ ޚުޠުބާގައި ބުނެފައިވެއެވެ. 

މީގެއިތުރުން އަނބިދަރީންނަށް ހޭދަކުރުމަކީ ގިނަގުނަ ޘަވާބާއި ދަރުމަހުރި ކަމެއް ކަމަށް ޚުޠުބާގައި ބުނެފައިވެއެވެ. އަދި މާތް الله އެންގެވި ގޮތުގެ މަތީން އެކަނލާނގެ މަގުގައި ހޭދަކުރުމަކުން އެއްވެސް މީހަކަށް އެއްވެސް ގެއްލުމެއްނެތް ކަމަށާއި، މާތް الله އެކަމަށް ބަދަލުދެއްވައި އެމީހެއްގެ ތަނަވަސްކަން އިތުރުކޮށްދެއްވާނެކަމަށް ޚުޠުބާގައި ބުނެފައިވެއެވެ. 

“ފިރީންނަކީ މާތް الله ވަރަށް މަތިވެރި އަމާނާތެއް ޙަވާލުކުރައްވައިފައިވާ ބައެއް، އޭނާއަށް ޙަވާލުކުރެވިފައިވާ އެންމެ ބޮޑު އަމާނާތަކީ އޭނާގެ އަނބިދަރީން، އަނބިދަރީންނަށް ޚަރަދުކުރުމަކީ ފިރިމީހާގެ މައްޗަށް ވާޖިބުވާ ކަމަކަށްވާ އިރު އެ ވާޖިބު އަދާކުރުން މަތީ ދެމިތިބުމަކީ ނުހަނު މަތިވެރި ސަވާބާއި ދަރުމަހުރި ކަމެއް، ނަމަވެސް ހިތާމައަކީ މިހާރަކަށް އައިސް ބައެއް ފިރީން އަނބިދަރީންނަށް ޚަރަދުނުކޮށް އެ ކަމަށް އިހުމާލުވަމުންދާ ކަން، އަދި ދެމަފިރީން ވަރިވުމަށް ފަހު ދަރީންނަށް ޚަރަދުނުދީ ފިލައިގެން އުޅޭ މީހުންވެސް މަދެއްނޫން” ހުކުުރުބ ޚުޠުބާގައި ބުނެފައިވެއެވެ.

ކޯޓު މެދުވެރިކޮށް ވެސް ދަރީންނަށް ދޭން ޖެހޭ ޚަރަދު ނުދީ އުޅޭ މީހުން މަދުނޫން ކަމަށާއި، މިއީ އިންތިހާއަށް ހިތާމަކުރާން ޖެހޭ ކަމެއްކަމަށްވެސް ޚުޠުބާގައި ބުނެފައިވެއެވެ. މި ކަންކަމާ ބެހޭ ގޮތުން ޤިޔާމަތްދުވަހުން ސުވާލުކުރެވޭނެ ކަމަށާއި، ވީމާ، މި ގޮތަށް އުޅޭ މީހުން ވަގުތު ފާއިތުވުމުގެކުރީން ތައުބާވެ، اللهގެ ރުހިވޮޑިގަތުން ހޯދުމަށް މަސައްކަތްކުރުމަށް ޚުޠުބާގައު ވަޞިއްޔަތް ކޮށްފައިވެއެވެ. 

ފިރިމީހާ އޭނާގެ މުދަލުން އަނބިދަރީންނަށް ހޭދަނުކުރާ ނަމަ އޭނާގެ އިޛުނައާ ނުލައި އަސާސީ ޙާޖަތްތައް ފުއްދޭ މިންވަރަށް ފިރިމީހާގެ މުދަލުން ނަގައި ހޭދަކުރުން އަނބިމީހާއަށް ހުއްދަވާނެ ކަމަށާއި އެއީ ވައްކަމެއްނޫން ކަމަށް ޚުޠުބާގައި ބުނެފައިވެއެވެ.