އީރާންގެ އައު ދެމިސައިލަށް ނަންދީފައިވަނީ އެމެރިކާގެ ހަމަލާގައި ޝަހީދުވީ އަސްކަރީ ކޮމާންޑަރުންގެ ނަމުން

އެމެރިކާއިން އިރާނުގެ މިސައިލް ޕްރޮގްރާމް ހުއްޓާލުމަށް ގޮވާލާފައިވާއިރުވެސް، އިރާނުން ވަނީ އެޤައުމުގެ އަސްކަރީ ކޮމާންޑަރުން ކަމަށްވާ ޤާސިމް ސުލައިމާނީ އާއި އަބޫ މަހުދީ އަލް-މުހަންދިސްގެ ނަމުގައި އާ ދެ މިސައިލް ތަޢާރަފުކޮށްފައެވެ. މި ދެ މިސައިލް ތަޢާރަފުކުރީ އެމެރިކާ ސިފައިންގެ ހަމަލާއެއްގައި މިދިޔަ ޖެނުއަރީ މަހު މި ދެ ކޮމާންޑަރުން ޝަހީދުވީ ފަހުންނެވެ.

އިރާންގެ ސަރުކާރުގެ ޓީވީން މި މިސައިލްތަކުގެ ފޮޓޯތައް ދައްކާލަމުން ބުނެފައިވަނީ، މީގެ ސަބަބުން އިރާނުގެ ދިފާޢީ ބާރު އިތުރަށް ވަރުގަދަވެގެންދާނެ ކަމަށެވެ. އިރާނުގެ ދިފާޢީ ވަޒީރު އަމީރު ހާތަމީ ވިދާޅުވީ، "ޝަހީދު ޤާސިމް ސުލައިމާނީ"ގެ ނަމުގައި ހަދާފައިވާ ސަރަހައްދު-އިމަޓީ މިސައިލްގެ ދުރަށް ފޮނުވޭނެ މިންވަރަކީ 1,400 ކިލޯމީޓަރު ކަމަށާއި، "ޝަހީދު އަބޫ މަހުދީ"ގެ ނަމުގައި ހަދާފައިވާ ކްރޫޒް މިސައިލްގެ ދުރަށް ފޮނުވޭނެ މިންވަރަކީ 1,000 ކިލޯމީޓަރަށް ވުރެ ދުރަށް ކަމަށެވެ.

އިރާނުގެ ރައީސް ހަސަން ރޫހާނީ ވިދާޅުވީ، "މިސައިލްތައް، ޚާއްސަކޮށް ކްރޫޒް މިސައިލްތަކަކީ އަޅުގަނޑުމެންނަށް ވަރަށް މުހިންމު އެއްޗެއް… ދެ އަހަރު ނުވެ 300 ކިލޯމީޓަރުން 1,000 ކިލޯމީޓަރަށް ދުރަށް ފޮނުވޭނެ މިންވަރު އިތުރުކުރެވުމަކީ ވަރަށް ބޮޑު ކާމިޔާބީއެއް" ކަމަށެވެ. އެމަނިކުފާނު އިތުރަށް ވިދާޅުވީ، "އަޅުގަނޑުމެންގެ އަސްކަރީ ބާރާއި މިސައިލް ޕްރޮގްރާމްތަކަކީ ދިފާޢީ ސިފައެއްގައި ހިންގާ ޕްރޮގްރާމްތަކެއް" ކަމަށެވެ.

މޭޖަރ ޖެނެރަލް ސުލައިމާނީއަކީ އިރާނުގެ އިލައިޓް ކުޑްސް ފޯސްގެ ވެރިޔާއެވެ. އިރާގުގެ މިލިޝިއާ ކޮމާންޑަރު އަބޫ މަހުދީ އަލް-މުހަންދިސްއާއެކު، އޭނާ މަރާލެވުނީ މިދިޔަ ޖެނުއަރީ މަހު ބަޣުދާދު އެއަރޕޯޓުގައި އެމީހުން ދަތުރުކުރި ކޮންވޯއީއަށް އެމެރިކާއިން ދިން ހަމަލާއެއްގައެވެ.

މި މިސައިލްތައް ތަޢާރަފުކުރިއިރު، އދ.އިން އިރާނުގެ މައްޗަށް ކަނޑައަޅާފައިވާ ހަތިޔާރު އުފެއްދުން މަނާކުރުން އަންނަ އޮކްޓޯބަރު މަހު ހަމަވާނެއެވެ. 2015 ވަނަ އަހަރު ބޮޑެތި ބާރުތަކާއެކު އިރާނުން ސޮއިކުރި ނިއުކްލިއަރ އެއްބަސްވުމުގެ ދަށުން މި މުއްދަތު ހަމަވާނެއެވެ. ނަމަވެސް އެމެރިކާއިން ދަނީ މި މުއްދަތު އިތުރުކުރުމަށް މަސައްކަތް ކުރަމުންނެވެ.

2018 ވަނަ އަހަރު އެމެރިކާގެ  ރައީސް ޑޮނަލްޑް ޓްރަމްޕް ނިއުކްލިއަރ އެއްބަސްވުމުން ވަކިވެ، އިރާނުގެ މައްޗަށް ހަރުކަށި ދަތިކުރުމުގެ ފިޔަވަޅުތައް އަލުން އަނބުރާ ލެވުނުފަހުން، ޓެހެރާނާއި ވޮޝިންޓަންއާ ދެމެދު ވަނީ  ނުތަނަވަސްކަން އިތުރުވެފައެވެ. ވޮޝިންޓަންއިން ބުނަނީ އޭގެ މަޤްސަދަކީ އިރާނުގެ ނިއުކްލިއަރ މަސައްކަތަށް އިތުރަށް ހަރުކަށި ހުދޫދުތަކެއް ކަނޑައަޅައި، ބެލިސްޓިކް މިސައިލް ޕްރޮގްރާމް ހުއްޓުވައި، ސަރަހައްދީ ހަނގުރާމަތައް ނިންމުމަށް އިރާނަށް މަޖުބޫރުކުރުން ކަމަށެވެ.

އެމެރިކާގެ ދަތިކުރުމުގެ ފިޔަވަޅުތައް ދެމިހުރިހާ ހިނދަކު މަޝްވަރާތައް ބާއްވަން އިރާނުން ދަނީ ދެކޮޅު ހަދަމުންނެވެ. ބުދަ ދުވަހު އެމެރިކާގެ ޚާރިޖީ ވަޒީރު މައިކް ޕޮމްޕެއޯ ވިދާޅުވީ، އދ. ސެކިއުރިޓީ ކައުންސިލުން އިރާނުގެ މައްޗަށް ނިންމާފައިވާ ހަތިޔާރު މަނާކުރުމުގެ މުއްދަތު އިތުރުކުރުމަށް ވޮޝިންޓަންއިން ކުރި މަސައްކަތަށް ދެކޮޅު ހެދުމުން، ބުރާސްފަތި ދުވަހު ނިއުޔޯކުގައި އދ. ސެކިއުރިޓީ ކައުންސިލްގައި އިރާނުގެ މައްޗަށް "ސްނެޕްބެކް" ނުވަތަ އެމެރިކާގެ ހުރިހާ ދަތިކުރުމުގެ ފިޔަވަޅެއް އަލުން އަނބުރާ ލެއްވުމަށް ރައީސް ޓްރަމްޕް އޭނާއަށް އިރުޝާދު ދެއްވާފައިވާ ކަމަށެވެ.