ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތައް ވީހާވެސް އަވަހަށް ރަޖިސްޓަރ ކުރުމަށް އިލްތިމާސް ކޮށްފި!

ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތައް ވީހާވެސް އަވަހަށް ރަޖިސްޓަރ ވުމަށް މޯލްޑިވްސް މަނިޓަރީ އޮތޯރިޓީ އިން އިލްތިމާސްކޮށްފިއެވެ.

އެމްއެމްއޭއިން ނެެރެފައިވާ ނޫސްބަޔާނެއްގައި ބުނެފައިވަނީ ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކުގެ ތެރެއިން ޓީޖީއެސްޓީ ދައްކާ ފަރާތްތަކުން ބޭރުފައިސާއާ ބެހޭ ޤަވާޢިދުގެ ދަށުން ވީހާވެސް އަވަހަށް އެ އޮތޯރިޓީގައި ރަޖިސްޓަރވުމަށް އިލްތިމާސްކުރާކަމަށެވެ. 

 ބޭރުފައިސާއާ ބެހޭ ޤަވާޢިދުގެ ދަށުން، އެ އޮތޯރިޓީގައި ރަޖިސްޓާވާން ޖެހޭ އެންމެ ފަހު ތާރީޚަކީ 30 އޮކްޓޫބަރު 2024 އަށް ކަމަށްެވެސް ބުނެފައިވެއެވެ. 

 ރަޖިސްޓާވާނީ އެމްއެމްއޭ އެފްއެކްސް ރެޖިސްޓްރޭޝަން ޕޯޓަލް https://extranet.mma.gov.mv/foreign-exchange ގައި ވާ ރަޖިސްޓްރޭޝަން ފޯމް މެދުވެރިކޮށް ކަމަށާއި، މިކަމާ ގުޅޭގޮތުން އިތުރު މަޢުލޫމާތު ސާފުކުރުމަށް ގުޅުއްވާނީ 301-2121 އަށް ކަމަށާއި، އީމެއިލް އިންނަމަ [email protected] އަށް ކަމަށް އެމްއެމްއޭ އިން ބުނެފައިވެއެވެ. 

މަނީޗޭންޖިން ވިޔަފާރިއާ ބެހޭ ޤަވާއިދުގެ ދަށުން އެމްއެމްއޭއިން ވަނީ ރާއްޖޭގައި ޓޫރިޒަމް ވިޔަފާރިކުރާ ތަންތަނަށް، އެތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައެވެ.

އެގޮތުން ކެޓަގަރީ އޭގައި ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭ ގޮތަށް ވަނީ ހަމަޖައްސާފައެވެ.

ކެޓަގަރީ ބީގައި ހިމެނޭ ތަންތަނުން މާރުކުރަންޖެހޭކަމަށް ކަނޑައަޅާފައިވަނީ ޓޫރިސްޓަކަށް 25 ޑޮލަރެވެ. ކެޓަގަރީ ބީގެ ގޮތުގައި ކަނޑައަޅާފައިވަނީ 50 ކޮޓަރި، ނުވަތަ އެއަށްވުރެ މަދުން ކޮޓަރި ހުންނަ ތަންތަނެވެ.