ސަޕްލިމެންޓަރީ ބަޖެޓް ދިރާސާކުރުމަށް ކޮމިޓީއަށް ފޮނުވައިފި!

ސަރުކާރުގެ ފަރާތުން އިއްޔެ ރައްޔިތުންގެ މަޖިލީހަށް ހުށައެޅި ސަޕްލިމެންޓަރީ ބަޖެޓްގެ ބަހުސް ނިންމައި ބަޖެޓް ދިރާސާކުރުމަށް ކޮމިޓީއަށް ފޮނުވައިފިއެވެ. 

ސްޕްލިމެންޓަރީ ބަޖެޓް މަޖިލީހަށް ސަރުކާރުގެ ފަރާތުން ހުށައަޅުއްވައި ދެއްވައިފައިވަނީ ދައުލަތުގެ މާލީ ވަޒީރު މޫސާ ޒަމީރެވެ. މިއަހަރުގެ ބަޖެޓަށް އިތުރުކުރުމަށް ހުށައަޅައިފައިވަނީ 5.1 ބިލިއަން ރުފިޔާއެވެ.  

މަޖިލީހުގެ ތަޅުމުގައި ބަޖެޓް ބަހުސް އިއްޔެ ކުރިއަށްދިޔައިރު، ސަރުކާރަށް ނިސްބަތްވާ މެމްބަރުން ވިދާޅުވެފައިވަނީ، މި ބަޖެޓަކީ ރައްޔިތުންނަށް ފާގަަތި ބަޖެޓަކަށް ވާނޭކަމަށެވެ. އަދި މިއީ ދެފުށްފެންނަ އުސޫލަކުން ހުށަހެޅުނު ބަޖެޓެއް ކަމަށްވެސް އެމެމްބަރުން ވިދާޅުވެފައިވެއެވެ. 

އިދިކޮޅަށް ނިސްބަތްވާ މެމްބަރުން ވަނީ ސަޕްލިމަންޓަރީ ބަޖެޓަށް ވަރަށްބޮޑަށް ފާޑުވިދާޅުވެ ވާހަކަ ދައްކަވާފައި ވާކަން ފާހަގަކޮށްލަން ޖެހެއެވެ. އެގޮތުން މިއަހަރަށް ފާސްކުރި ބަޖެޓުން ކުރިކަމެއް ފެންނަން ނެތްއިރު، ސަރުކާރުން ވަނީ އިންތިހާއަށް އުފެއްދުންތެރި ނޫން ހަރަދުތަކެއް ކޮށްފައިކަން އިދިކޮޅު މެމްބަރުން ވަނީ ފާހަަގަކޮށްފައެވެ.

ސަރުކާރުން ސަޕްލިމެންޓަރީ ބަޖެޓެއް ހުށަހެޅިއިރު، މިއަހަރަށް ކަނޑައެޅި ބަޖެޓުން، މިދިޔަ މަހުގެ ނިޔަލަށް ބަޖެޓުގެ 74 އިންސައްތަ ހޭދަކުރެވިފައިވާކަމަށް މާލީ ވުޒާރާއިން ބުނެއެވެ.

ސަޕްލިމެންޓަރީ ބަޖެޓާ ގުޅޭގޮތުން މާލީ ވުޒީރު މޫސާ ޒަމީރު ވިދާޅުވީ ކުރީ ސަރުކާރާ ޚިލާފަށް، މި ސަރުކާރުން ސަޕްލިމަންޓަރީ ބަޖެޓް ހުށަހަޅާފައިވަނީ މާލިއްޔަތުގެ ޤާނޫނުގައި ވާގޮތަށް ކުރިއަށް އޮތް މަސްތަކުގައި ހިނގާނެކަމަށް ލަފާކުރާ ޚަރަދުތައް ކުރިއާލާ ރައްޔިތުންގެ މަޖިލީހަށް އިޢުލާނުކޮށް ހުއްދަ ހޯދުމަށް އެދުމުގެ ތެރެއިން ކަމަށެވެ.

ފާއިތުވި ތަނުގައި ސަރުކާރުން ސަޕްލިމެންޓަރީ ބަޖެޓު ހުށަހަޅާފައިވަނީ ޚަރަދު ކުރުމަށްފަހުގައިކަން 19 ވަނަ މަޖިލީހުގެ ރިޔާސަތުންވެސް ވަނީ އެ މަޖިލީހުގައި ތަކުރާރުކޮށް ފާހަގަކޮށްފައެވެ.