ބިދޭސީންގެ މައްސަލަ – އެއްވެސް ވެރިޔަކަށް ހައްލުނުކުރެވުނު މައްސަލަ ހައްލުކުރައްވަނީ ރައީސް މުޢިއްޒު

ރައީސް ޑރ. މުޙައްމަދު މުޢިއްޒު ވެރިކަމަށް ވަޑަައިގަތް އިރު ގައުމު ވަނީ ބިދޭސީންގެ މައްސަލަތަކުން ފުނިޖެހިފައެވެ. ގަވާއިދާ ހިލާފަށް އުޅޭ ބިދޭސީންނާއި ބޮއްސުންލާފައިވާ ބިދޭސީ ވިޔަފާރިތަކާއި ބިދޭސީން ގެންގުޅޭ ފަރާތްތަކުން ދައުލަތަށް ނުދައްކާ ހުރި ފީތައް ބިލިއަނުން ހުއްޓެވެ. ބިދޭސީން ކާބޯތަކެތި ހަދާ ތަންތަނުގެ ސާފުތާހިރުކަން ހުރީ އެހާ ދަށުގައެވެ. އެއްވެސް ސަރުކާރަކުން އެންމެ އެދެވޭ ގޮތެއްގައި ބިދޭސީންގެ މައްސަލަ ހައްލުކުރަން މަސައްކަތްކޮށްފައި ނުވެއެވެ.  

 މި ޤައުމުގައި އެތައްހާސް، އެތައް ލައްކައެއްގެ، އަދަދުވެސް ނޭނގޭހާ ގިނަ ބޭރުމީހުން މަސައްކަތް ކުރަމުންދާ ވާހަކަ އަޅުގަނޑުމެން އަބަދުވެސް މި އަޑު އަހަނީ. ޤައުމުގެ މިނިވަންކަމަށް ބުރޫއަރާ ކަންތައްތަކުގެ ތެރޭގައި، އެ ޤައުމެއްގައި، އެ ޤައުމެއްގެ ރައްޔިތުން ނޫން ބަޔަކު އުޅެމުންދާނަމަ، އެ ބަޔަކާބެހޭ މަޢުލޫމާތު ނޭނގޭނަމަ، އެކަން ވެގެންދާނެ. މިދިޔަ ދުވަސްތަކުގައި މިކަމަށް އެކަށީގެންވާ ޙައްލެއް ނައިސް އޮތީމަ، މި ހިސާބަށް މި މައްސަލަ ގޮސްފައި މި އޮތީ

ރައީސް ޑރ. މުޙައްމަދު މުޢިއްޒު، "ނާރެސް ޕޯޓަލް" އަދި "އޮޕަރޭޝަން ކުރަނގި" ފޭސް 2 އިފުތިތާހުކުރުމުގެ ރަސްމިއްޔާތުގައި

 ރައީސް ޑރ. މުޙައްމަދު މުޢިއްޒުގެ ސަރުކާރުން ބިދޭސީންގެ މައްސަލަ ހައްލުކުރުމަށް އެއްވެސް ސަރުކާރަކުން ނުކުރާ މަސައްކަތް ކުރަން ފެއްޓެވިއެވެ. ދިވެހިންނަށް ވަޒީފާގެ ފުރުސަތުތައް ފަހިކުރުމާ، ގަވާއިދާ ހިލާފަށް އުޅޭ ބިދޭސީން ހޯދައި ފިޔަވަޅު އެޅުމާއި ޑީޕޯރޓްކުރުމާއި ބިދޭސީން ކާބޯ ތަކެތި ތައްޔާރުކުރާ ތަންތަނުގެ ސާފުތާހިރުކަން ކަށަވަރުކުރުމަށް ބަލާ ފާސްކުރުމާއި ބިދޭސީ މަސައްކަތްތެރިން ގެންގުޅޭ ކުންފުނިތަކުން ދައުލަތަށް ނުދައްކާ ހުރި ފައިސާ ހޯދުމާއި ބިދޭސީންގެ މައުލޫމާތު އެއްކުރުމުގެ ހަރުދަނާ މަސައްކަތްތައް ފެށިއެވެ.  

މި ސަރުކާރު ހަވާލުވި އިރު ވިސާ ފީ އާއި ވޯކް ޕާމިޓް އަދި ކޯޓާ ފީގެ ގޮތުގައި ދައުލަތަށް 1.7 ބިލިއަން ރުފިޔާ ނުލިބި އޮތެވެ. ބިދޭސީ ފީ ތަކުން ދައުލަތަށް ނުލިބިވާ ފައިސާ ހޯދުމުގެ މަސައްކަތް ޖޫން މަހު ފަށައި މިހާތަނަށް ވަނީ ބިލިއަނަކަށް ވުރެ ގިނަ ރުފިޔާ ދައުލަތަށް ހޯދާފައެވެ. މިއީ އެއްވެސް ސަރުކާރަކަށް ކުރަން ނުކުރުނު ކަމެކެވެ.

ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ވަކި މީހަކަށް ގާތް މީހަކަށް ނުބަލައި، ދައުލަތަށް ދައްކަން ޖެހޭ ފައިސާ ނުދައްކާ ފަރާތްތަކުގެ މައުލޫމާތު ހާމަކޮށްފައެވެ. ގާނޫނާ ގަވާއިދުތައް ހިނގާ ގާނޫނުގެ ވެރިކަމެއް ހިންގަން ފަށާފައެވެ. ރާއްޖޭގައި އުޅޭ ހުރިހާ ބިދޭސީންގެ ފޮޓޯ އާއި އިނގިލީގެ ނިޝާން ނަގަން ފަށައި، ގަވާއިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް މިދިޔަ މެއި މަހު ފެށި އޮޕަރޭޝަން "ކުރަނގި"ގެ ދަށުން 8،000 އަށް ވުރެ ގިނަ ބިދޭސީންގެ މައުލޫމާތު މިހާތަނަށް ވަނީ ނަގާފައެވެ. މިހާތަނަށް 96 ރަށެއްގައި ކުރަނގި އޮޕަރޭޝަން ކުރިއަށް ގެންގޮސް 21 ރަށެއްގައި މަސައްކަތް ވަނީ ނިންމާފައެވެ.

ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ރައީސް ޑރ. މުޙައްމަދު މުޢިއްޒުގެ އިސްނެގެވުމުގެ ދަށުން އިމިގްރޭޝަނުންވެސް ދަނީ ހަރަކާތްރި މަސައްކަތްތަކެއް ކުރަމުންނެވެ.  މިދިޔަ އަހަރުގެ ނޮވެމްބަރު މަހުން ފެށިގެން 3،500 އަށްވުރެ ގިނަ ބިދޭސީން ބަލައި ފާސްކޮށް، ގަވާއިދާ ހިލާފަށް އުޅުނު 800 އަށްވުރެ ގިނަ މީހުން އިމިގްރޭޝަންގެ ބެލުމުގެ ދަށަށް ވަނީ ގެނެސްފައެވެ. 4،000 އަށް ވުރެ ގިނަ ބިދޭސީން ވަނީ ޑީޕޯރޓްކޮށްފައެވެ. އިމިގްރޭޝަނުން ދަނީ މާރުކޭޓްތަކާއި ސައިހޮޓާ ތަކާއި ކާބޯތަކެތި ތައްޔާރުކުރާ ތަންތަނާއި ސްޕާތައް މެދުކެނޑުމެއް ނެތި ފާސްކުރަމުންނެވެ. މިއީ އެއްވެސް ސަރުކާރެއްގައި އިމިގްރޭޝަނުން ބިދޭސީންގެ މައްސަލަ ހައްލުކުރަން ކޮށްފައި ނުވާ މިންވަރުގެ މަސައްކަތެވެ. 

ބިދޭސީން ކަޅުބާޒާރުގައި ޑޮލަރު ވިއްކުމާއި ރާއްޖޭން ބޭރަށް ގަވާއިދާ ހިލާފަށް ޑޮލަރު ބޭރުކުރުން ހުއްޓުވުމަށްވެސް ސަރުކާރުން ދަނީ ވަރުގަދަ މަސައްކަތްތަކެއް ކުރަމުންނެވެ. އެމްއެމްއޭއިން ވަނީ ފީތައް ބޮޑުކޮށް، ފައިސާ މާރުކުރާ ތަންތަނުގެ ވެރިންނަށް ދިވެއްސަކަށް ނޫނީ ނުވެވޭ ގޮތަށް،  ބިދޭސީން އެ ފަދަ ތަންތާ ނުތިބެވޭ ގޮތަށް ފައިސާ މާރުކުރުމާ ގުޅޭ އާ ގަވައިދެއް އެކުލަވާލާފައެވެ. އަދި ރާއްޖެއިން ބޭރުކުރަން މަސައްކަތްކުރި ގިނަ އަދަދުގެ ޑޮލަރު އެކި ފަހަރު މަތިން އެއާރޕޯޓުން އަތުލައިގަނެފައިވެއެވެ. ޑޮލަރުގެ ވަގު ވިޔަފާރިކުރާ ބިދޭސީން ޑީޕޯޓުކޮށްފައިވެއެވެ. 

މިއީ ރައީސް ޑރ. މުޙައްމަދު މުޢިއްޒުގެ ސަރުކާރުން ބިދޭސީންގެ މައްސަލަ ހައްލުކުރުމަށް ސަރުކާރަށް އަހަރެއް ނުވަނީސް ކޮށްފައިވާ ގިނަގުނަ މަސައްކަތްތަކެވެ. އެއްވެސް ވެރިއަކަށް ސަރުކާރަކަށް މީގެ ކުރިން ކުރަން ނުކެރުނު މަސައްކަތެވެ. އެންމެންގެ މައްޗަށް ގާނޫނު ހިންގައި ގާނޫނު ހިނގާ ދައުލަތެއްކަން ރައްޔިތުންނަށް ކަށަވަރުކޮށްދީފައެވެ. ދުވަސްވީ މައްސަލަތައް މި ސަރުކާރުން ހައްލުކުރާނެ ކަމުގެ އިތުބާރު ރައްޔިތުންނަށް ބޮޑެވެ. ބިދޭސީންގެ މައްސަލަ ހައްލުކުރުމަށް ސަރުކާރުން ދަނީ ނަމޫނާ ދައްކަމުންނެވެ.