ރައީސް މުޢިއްޒު ނަޞްރުގެ ދުވަހުގެ ސިފައިންގެ މައުރަޒު 2024 ހުޅުއްވައިދެއްވައިފި

ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، މިއަދު ހެނދުނު ނޭޝަނަލް އާޓް ގެލެރީގައި ބޭއްވުނު ޚާއްޞަ ރަސްމިއްޔާތެއްގައި ނަޞްރުގެ ދުވަހުގެ ސިފައިންގެ މައުރަޒު 2024 ހުޅުވައިދެއްވައިފިއެވެ. މައުރަޒު ހުޅުވައިދެއްވުމަށްފަހު ރައީސުލްޖުމްހޫރިއްޔާ ވަނީ މައުރަޒު ބައްލަވާލައްވާފައެވެ.

މި މައުރަޒުގައި 1988 ވަނަ އަހަރުގެ ނޮވެންބަރު 3 ވަނަ ދުވަހު ރާއްޖެއަށް ކުރިމަތިވި އުދުވާނީ ހަމަލާގައި ލިބުނު ގެއްލުންތަކާއި، އެ ދުވަހު ނަޞްރު ހޯދުމަށް ސިފައިން ދެއްކި ހިތްވަރު ދައްކުވައިދޭ 200 އަށްވުރެ ގިނަ ޑިސްޕްލޭ ހިމެނެއެވެ. މީގެ އިތުރުން، އެހެން އަހަރުތަކާ ޚިލާފަށް މިއަހަރުގެ މައުރަޒުގައި ނަޞްރުގެ ދުވަހު ބޭނުންކުރެވުނު ބައެއް އަސްލު ހަތިޔާރާއި އެހެނިހެން ތަކެތިވެސް އާންމުންނަށް ބެލުމަށް ބަހައްޓާފައިވެއެވެ.

މައުރަޒުގެ މައިގަނޑު އެއް މަޤްޞަދަކީ ނަޞްރުގެ ދުވަހުގެ މަޢުލޫމާތު މިއަދުގެ ޖީލަށް ފޯރުކޮށްދިނުމެވެ. މި މައުރަޒު ނޮވެންބަރު 3 އިން 9 އަށް ނޭޝަނަލް އާޓް ގެލެރީގައި ކުރިއަށްދާނެއެވެ. އާންމުންނަށް މައުރަޒު ބެލުމަށް ހުޅުވާފައި ހުންނާނީ ކޮންމެ ދުވަހެއްގެ ހެނދުނު 9:00 އިން މެންދުރު 12:00 އަށް، މެންދުރުފަހު 2:00 އިން ހަވީރު 6:00 އަށް، އަދި ރޭގަނޑު 8:00 އިން 10:00 އަށެވެ.

މައުރަޒު ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުޙައްމަދު، ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފް، ސިފައިންގެ އިސްވެރިން، ވަޒީރުން އަދި ދައުލަތުގެ އެހެނިހެން އިސްވެރިން ބައިވެރިވެވަޑައިގެންނެވިއެވެ.

މިއަހަރުގެ ނަޞްރުގެ ދުވަހުގެ ފާހަގަކުރުން ފެށިގެން ދިޔައީ ބޮޑު ޖަމާޢަތުގައި ކުރެވުނު ފަތިސް ނަމާދުންނެވެ. އޭގެފަހުން ރައީސުލްޖުމްހޫރިއްޔާގެ ދެކަނބަލުން ވަނީ 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި ގާޑް މައުންޓް ކުރުމުގެ ރަސްމިއްޔާތު ޝަރަފުވެރިކޮށްދެއްވާފައެވެ.